KA BUKE ʻALUA A MOSE, I KAPA ʻIA PUKA ʻANA 20 - Ka Baibala Hemolele

1 Nā Kānāwai he ʻUmi o Iēhova. 24 No ke kuahu.

MOKUNA XX.

¹ ¶ ʻŌlelo maila ke Akua i kēia mau ʻōlelo a pau, ʻī maila:

² ¶ “ʻO wau nō Iēhova ʻo kou Akua, ka mea nāna ʻoe i lawe mai nei, mai ka ʻāina ʻo ʻAigupita mai, mai loko mai hoʻi o ka hale hoʻoluhi.

³ ¶ “ʻAʻole ou akua ʻē aʻe i mua o koʻu alo.

⁴ ¶ “Mai hana ʻoe i ke kiʻi i kālai ʻia nou, ʻaʻole ma ka like ʻana o kekahi mea i ka lani i luna, a me ko ka honua i lalo, a ma loko hoʻi o ka wai ma lalo o ka honua;

⁵ mai kūlou ʻoe i lalo iā lākou, ʻaʻole hoʻi e hoʻomana iā lākou; no ka mea, ʻo wau nō Iēhova ʻo kou Akua, he Akua lili; e hoʻopaʻi ana i kā nā mākua hala i nā keiki, a hiki aku i ke kuakahi a me ke kualua o ka poʻe e inaina mai iaʻu,

⁶ a e aloha ana hoʻi i nā tausani o ka poʻe e aloha mai iaʻu, a e mālama hoʻi i koʻu mau kānāwai.

⁷ ¶ “Mai hoʻohiki wahaheʻe ʻoe i ka inoa ʻo Iēhova ʻo kou Akua; no ka mea, ʻaʻole loa e hoʻāpono ʻo Iēhova i ka mea hoʻohiki wahaheʻe i kona inoa.

⁸ ¶ “E hoʻomanaʻo i ka lā Sābati, a e hoʻāno ia.

⁹ “I nā lā ʻeono e hana ai ʻoe i kāu hana a pau;

¹⁰ akā, ʻo ka hiku o ka lā, he Sābati ia no Iēhova no kou Akua, ʻaʻole loa ʻoe e hana ia lā, ʻaʻole ʻoe, ʻaʻole hoʻi kāu keiki kāne, ʻaʻole hoʻi kāu kaikamahine, ʻaʻole hoʻi kāu kauā kāne, ʻaʻole hoʻi kāu kauā wahine, ʻaʻole hoʻi kou holoholona, ʻaʻole hoʻi kou kanaka ʻē ma kou mau ʻīpuka.

¹¹ “No ka mea, i nā lā ʻeono i hana ai ʻo Iēhova i nā lani, a me ka honua, a me ke kai, a me nā mea a pau ma loko o ia mau mea, a i ka hiku o ka lā i hoʻomaha ai; no laila hoʻi i hoʻomaikaʻi ai ʻo Iēhova i ka lā Sābati, a hoʻāno ai hoʻi ʻo ia ia lā.

¹² ¶ “E hoʻomaikaʻi ʻoe i kou makua kāne, a me kou makuahine; i lōʻihi ai kou mau lā ma luna o ka ʻāina a Iēhova a kou Akua i hāʻawi mai ai iā ʻoe.

¹³ ¶ “Mai pepehi kanaka ʻoe.

¹⁴ ¶ “Mai moekolohe ʻoe.

¹⁵ ¶ “Mai ʻaihue ʻoe.

¹⁶ ¶ “Mai hōʻike hoʻopunipuni ʻoe e hewa ai kou hoalauna.

¹⁷ ¶ “Mai kuko ʻoe i ka hale o kou hoalauna, mai kuko i ka wahine a kou hoalauna, ʻaʻole hoʻi i kāna kauā kāne, ʻaʻole hoʻi i kāna kauā wahine, ʻaʻole hoʻi i kona bipi, ʻaʻole hoʻi i kona hoki, ʻaʻole hoʻi i kekahi mea a kou hoalauna.”

¹⁸ ¶ ʻIke akula nā kānaka a pau i ke hekili, a me ka uila, a me ke kani ʻana o ka pū, a me ka mauna e uahi ana; a ʻike akula nā kānaka, weliweli ihola; neʻeneʻe akula, a kū ma kahi mamao aku.

¹⁹ ʻĪ akula lākou iā Mose, “Nāu nō mākou e ʻōlelo mai, a e hoʻolohe aku nō mākou; akā, mai ʻōlelo mai ke Akua iā mākou, o make auaneʻi mākou.”

²⁰ ʻĪ akula ʻo Mose i kānaka, “Mai weliweli ʻoukou; no ka mea, ua hele mai ke Akua e hoʻāʻo iā ʻoukou, i mau kona makaʻu ʻia ma luna o ʻoukou, i lawehala ʻole ʻoukou.”

²¹ Kū maila nā kānaka ma kahi lōʻihi ʻē aku, a hoʻokokoke akula ʻo Mose, i ke ao panopano a ke Akua i noho ai.

²² ¶ ʻĪ maila ʻo Iēhova iā Mose, “E ʻōlelo aku ʻoe i nā mamo a ʻIseraʻela penei, ‘Ua ʻike ʻoukou i kaʻu ʻōlelo ʻana iā ʻoukou, mai ka lani mai.

²³ ‘Mai hana ʻoe i nā akua ʻē me aʻu nei i nā akua kālā, a mai hana i nā akua gula no ʻoukou.

²⁴ ‘E hana ʻoe i kuahu lepo noʻu, a e mōhai mai ma luna iho i kou mōhai kuni, a me kou mōhai hoʻomalu, i kāu mau hipa, a me kāu mau bipi; i nā wahi a pau aʻu e hoʻopaʻa ai i koʻu inoa, ma laila au e hele aku ai i ou lā, a e hoʻomaikaʻi ai iā ʻoe.

²⁵ ‘A i hana ʻoe i kuahu pōhaku, ʻeā, mai hana ʻoe i pōhaku i kālai ʻia; no ka mea, inā e kau ʻoe i kou koʻi lipi ma luna iho, ua haumia ia iā ʻoe.

²⁶ ‘Mai piʻi ʻoe ma luna o koʻu kuahu ma ke ala hanuʻu, o ʻikea aku kou wahi huna ma laila.’