KA BUKE ʻALUA A MOSE, I KAPA ʻIA PUKA ʻANA 2 - Ka Baibala Hemolele

1 Ka hānau ʻana o Mose, a me kona hoʻōla ʻia. 11 Kona mahuka ʻana ma Midiana. 16 Kona noho loa ʻana ma Midiana i nā makahiki he 40.

MOKUNA II.

¹ ¶ Kiʻi akula kekahi kanaka o ka ʻohana a Levi, a lawe aʻela i kekahi kaikamahine a Levi.

² Hāpai aʻela ua wahine lā, a hānau maila he keiki kāne; a ʻike ihola ʻo ia iā ia he maikaʻi, hūnā ihola ʻo ia iā ia ʻekolu malama.

³ A i ka wā hiki ʻole iā ia ke hūnā hou aku, lawe aʻela ia i waʻa kome nona, a hāpala ia mea i ka bitumena a me ke kēpau, a hahao ihola i ke keiki ma loko; a waiho ihola ma loko o nā kaluhā ma kapa o ka muliwai.

⁴ A kū ihola kona kaikuahine i kahi mamao aku, e nānā i ka mea e hana ʻia mai ai iā ia.

⁵ Iho ihola ke kaikamahine a Paraʻo e ʻauʻau ma ka muliwai, hele aʻela hoʻi kona mau wāhine ma kapa o ka muliwai; a ʻike akula kēlā i ka waʻa i waena o nā kaluhā, hoʻouna akula ia i kona wahine e lawe mai.

⁶ ¶ A wehe akula ia, a laila ʻike ihola i ke keiki; aia hoʻi, uē aʻela ua keiki lā. Aloha akula kēlā iā ia, ʻī akula, “He keiki kēia na kā Hebera.”

⁷ A laila, ʻōlelo akula kona kaikuahine i ke kaikamahine a Paraʻo, “E hele hoʻi hā wau, e kiʻi aku nou i kekahi wahine Hebera i kahu nāna e hānai i ke keiki nāu?”

⁸ ʻĪ maila ke kaikamahine a Paraʻo iā ia, “Ō hele.” A hele akula ke kaikamahine, a kiʻi akula i ka makuahine o ua keiki lā.

⁹ ʻĪ maila ke kaikamahine a Paraʻo iā ia, “E lawe ʻoe i kēia keiki a e hānai iā ia naʻu, a naʻu nō ʻoe e uku aku.” Lawe aʻela ua wahine lā i ke keiki, a hānai ihola.

¹⁰ A nui aʻe ua keiki lā; a lawe aʻela ʻo ia iā ia i ke kaikamahine a Paraʻo, a lilo aʻela ia i keiki nāna. Kapa ihola ʻo ia i kona inoa, ʻo Mose, ʻī ihola ia; “No ka mea, ua lawe mai au iā ia mai loko mai o ka wai.”

¹¹ ¶ Ia mau lā mai, i ko Mose wā kanaka makua, hele akula ia i kona poʻe hoahānau, nānā akula ia i ko lākou luhi ʻana; ʻike akula ia i kekahi kanaka o ʻAigupita e pepehi ana i ka Hebera, i kekahi o kona poʻe hoahānau.

¹² ʻAloʻalo aʻela ia, a ʻike ihola, ʻaʻole kanaka, a laila pepehi ihola ia i ka ʻAigupita a make, a hūnā iā ia ma loko o ke one.

¹³ A i ka lua o ka lā, hele hou akula nō ia, aia hoʻi, ʻelua kānaka Hebera e hakakā ana; ʻī akula ia i ka mea nona ka hewa, “No ke aha lā ʻoe e pepehi aku nei i kou hoa?”

¹⁴ ʻĪ maila kēlā, “Na wai lā ʻoe i hoʻolilo aʻe nei i aliʻi, a i luna kānāwai ma luna o mākou? Ke manaʻo nei anei ʻoe e pepehi mai iaʻu, e like me kou pepehi ʻana i ka ʻAigupita?” A laila makaʻu ihola ʻo Mose, ʻī ihola, “ʻOiaʻiʻo nō, ua ʻike ʻia kēia mea!”

¹⁵ A lohe aʻela ʻo Paraʻo ia mea, ʻimi ihola ia e pepehi iā Mose. Mahuka akula ʻo Mose mai ka maka aku o Paraʻo, a noho ma ka ʻāina ma Midiana; a noho ihola ia i lalo ma kekahi luawai.

¹⁶ ¶ He mau kaikamāhine ʻehiku na ke kahuna ma Midiana. Hele maila lākou a hukihuki i ka wai, a ninini i loko o nā holowaʻa, e hoʻoinu ai i nā holoholona a ko lākou makua kāne.

¹⁷ Hele maila kekahi poʻe kahu hipa, a kipaku aʻela iā lākou. Kū aʻela ʻo Mose i luna, a kōkua iā lākou, a hoʻoinu akula i kā lākou poʻe holoholona.

¹⁸ A hoʻi akula lākou iā Reuʻela i ko lākou makua kāne, nīnau maila ia, “No ke aha lā ʻoukou i hoʻi koke mai ai i kēia lā?”

¹⁹ ʻĪ akula lākou, “Na kekahi kanaka o ʻAigupita i hoʻopakele aʻe iā mākou mai ka lima mai o ka poʻe kahu hipa, a huki ihola ia i ka wai no mākou a nui, a hoʻoinu akula i nā holoholona.”

²⁰ ʻĪ maila ia i kāna poʻe kaikamāhine, “ʻAuhea lā hoʻi ia? No ke aha lā ʻoukou i haʻalele aku ai i ua kanaka lā? E kiʻi aku iā ia e ʻai ia i ka ʻai.”

²¹ A walea ihola ʻo Mose e noho me ia kanaka, a hāʻawi maila ʻo ia iā Zipora, kāna kaikamahine na Mose.

²² A hānau maila ia he keiki kāne, a kapa akula ia i kona inoa ʻo Geresoma; no ka mea, ʻī ihola ia, “Ua malihini au ma ka ʻāina ʻē.”

²³ ¶ A nui nā lā i hala, make ke aliʻi o ʻAigupita, a kaniʻuhū ihola ka poʻe mamo a ʻIseraʻela, no ka luhi loa ʻana, a uē akula lākou; a hiki akula ko lākou uē ʻana i ke Akua no ko lākou luhi.

²⁴ A lohe ke Akua i ko lākou uē ʻana, a manaʻo ihola ia i kāna berita me ʻAberahama, a me ʻIsaʻaka, a me Iakoba.

²⁵ A nānā maila ke Akua i ka poʻe mamo a ʻIseraʻela, a manaʻo maila ke Akua iā lākou.