KA BUKE ʻALUA A MOSE, I KAPA ʻIA PUKA ʻANA 19 - Ka Baibala Hemolele

1 Ke kamaʻilio ʻana o ke Akua me kā ʻIseraʻela ma Sinai. 9 No ka hoʻomākaukau e hāʻawi ʻia mai nā Kānāwai he ʻUmi.

MOKUNA XIX.

¹ ¶ A i ke kolu o ka malama o ka puka ʻana mai o nā mamo a ʻIseraʻela mai loko mai o ʻAigupita, ia lā nō, hiki maila lākou i ka wao nahele ʻo Sinai.

² A hele maila lākou, mai Repidima mai, a hiki ma ka wao nahele ʻo Sinai, a hoʻomoana ihola lākou ma ka wao nahele; ma laila kā ʻIseraʻela i hoʻomoana ai ma kahi e pili ana i ka mauna.

³ Piʻi akula ʻo Mose i ke Akua, a hea maila ʻo Iēhova iā ia mai ka mauna mai, me ka ʻī ʻana mai, “Penei ʻoe e ʻōlelo aku ai i nā pua a Iakoba, a e haʻi aku i nā mamo a ʻIseraʻela:

⁴ ‘Ua ʻike nō ʻoukou i nā mea aʻu i hana ai i ko ʻAigupita, i koʻu kaʻikaʻi ʻana iā ʻoukou ma nā ʻēheu o ka ʻaeto, a lawe mai iā ʻoukou i oʻu nei.

⁵ ‘A inā hoʻolohe ʻiʻo mai ʻoukou i koʻu leo, a mālama hoʻi i koʻu berita, a laila e lilo auaneʻi ʻoukou i waiwai noʻu, ma mua o nā kānaka a pau; no ka mea, noʻu nō ka honua nei a pau.

⁶ ‘E lilo nō hoʻi ʻoukou i aupuni kahuna pule noʻu, a he lāhui kanaka laʻa.’ ʻO ia hoʻi nā ʻōlelo āu e haʻi aku ai i nā mamo a ʻIseraʻela.”

⁷ ¶ Hele aʻela ʻo Mose, a hea akula i nā lunakahiko a kānaka, a hoʻonoho ihola i mua o lākou i kēia mau ʻōlelo a pau a Iēhova i kauoha mai ai iā ia.

⁸ ʻŌlelo pū maila nā kānaka a pau, ʻī maila, “ʻO nā mea a pau a Iēhova i ʻōlelo mai ai, e hana mākou ia mea.” Haʻi akula ʻo Mose i nā ʻōlelo a kānaka iā Iēhova.

⁹ ʻŌlelo maila ʻo Iēhova iā Mose, “Aia hoʻi, e hele mai ana au i ou nei ma loko o ke ao panopano, i lohe nā kānaka i kaʻu kamaʻilio ʻana me ʻoe, a e manaʻoʻiʻo mau loa mai iā ʻoe.” A haʻi akula ʻo Mose i nā ʻōlelo a kānaka iā Iēhova.

¹⁰ ʻŌlelo maila ʻo Iēhova iā Mose, “E hele ʻoe i kānaka, e hoʻolaʻa iā lākou i kēia lā, a ʻapōpō; e holoi hoʻi lākou i ko lākou kapa.

¹¹ “E hoʻomākaukau, no ke kolu o ka lā; no ka mea, i ke kolu o ka lā, e iho mai ai ʻo Iēhova, i mua o nā maka o kānaka a pau, ma ka mauna ʻo Sinai.

¹² “A e kau iho ʻoe i pale, no nā kānaka a puni, a e ʻī aku hoʻi, ‘E mālama ʻoukou iā ʻoukou iho, i ko ʻoukou piʻi ʻana i ka mauna, a me ka pā ʻana i kona kihi; ʻo ka mea e pā i ka mauna, he ʻoiaʻiʻo nō e make ia.

¹³ ‘Mai hoʻopā aku kekahi lima ia mea; no ka mea, he ʻoiaʻiʻo nō, e hailuku ʻia ʻo ia, a hou ʻia; inā he holoholona, a he kanaka, ʻaʻole ia e ola’; a i kani lōʻihi ka pū, a laila e hele mai lākou i ka mauna.”

¹⁴ Iho ihola ʻo Mose i lalo, mai ka mauna iho i kānaka; hoʻolaʻa ihola i kānaka; a holoi ihola lākou i ko lākou kapa.

¹⁵ ʻĪ akula ia i kānaka, “E hoʻomākaukau ʻoukou, no ke kolu o ka lā; mai komo aʻe i nā wāhine.”

¹⁶ ¶ A i ke kakahiaka o ke kolu o ka lā, he hekili, a he uila, a he ao polohiwa ma ka mauna, a he leo no ka pū e kani ikaika loa ana; haʻalulu ihola nā kānaka a pau ma ko lākou wahi i hoʻomoana ai.

¹⁷ Kaʻi maila ʻo Mose i kānaka ma waho o kahi a lākou e hoʻomoana ai, e hālāwai me ke Akua; a kū ihola lākou ma kahi ma lalo iho o ka mauna.

¹⁸ Ma ka mauna a pau i Sinai, he uahi; no ka mea, ua iho mai ʻo Iēhova ma luna ona ma loko o ke ahi; a pūnohu akula kona uahi, me he uahi umu hao lā, haʻalulu nui ihola ka mauna a pau.

¹⁹ A i ke kani lōʻihi loa ʻana o ka pū, a ikaika nui aʻela, ʻōlelo akula ʻo Mose, a pane maila ka leo o ke Akua iā ia.

²⁰ Iho maila ʻo Iēhova ma luna o ka mauna ʻo Sinai, ma ka piko o ka mauna, a hea maila ʻo Iēhova iā Mose e piʻi aku i ke poʻo o ka mauna; a piʻi akula ʻo Mose.

²¹ ʻĪ maila ʻo Iēhova iā Mose, “E iho ʻoe i lalo, e kauoha aku i kānaka, o hemo mai lākou i o Iēhova nei, e nānā, a hāʻule lākou he nui loa.

²² “A e huikala hoʻi nā kāhuna iā lākou iho, ʻo ka poʻe e hoʻokokoke ana iā Iēhova, o pohā aku ʻo Iēhova i o lākou lā.”

²³ ʻĪ akula ʻo Mose iā Iēhova, “ʻAʻole e hiki nā kānaka ke piʻi mai i ka mauna nei i Sinai; no ka mea, ua kauoha mai ʻoe iā mākou, ua ʻī mai, ‘E kau iho i pale a puni ka mauna, a e hoʻokapu ia mea.’”

²⁴ ʻĪ maila ʻo Iēhova iā ia, “Ō hele, e iho ʻoe i lalo, a e piʻi hou mai ʻoe, ʻo ʻoe, a me ʻAʻarona pū; akā, ʻo nā kahuna a me kānaka, mai hemo mai lākou, e piʻi mai i o Iēhova nei, o pohā aku ia ma luna o lākou.”

²⁵ Iho maila ʻo Mose i lalo i kānaka, a ʻōlelo akula iā lākou.