KA BUKE ʻALUA A MOSE, I KAPA ʻIA PUKA ʻANA 17 - Ka Baibala Hemolele

1 ʻŌhumu hou nā kānaka. 5 Ka wai no ka pōhaku mai. 8 Make kā ʻAmeleka. 15 Hana ʻia ke kuahu.

MOKUNA XVII.

¹ ¶ Hele maila ka poʻe mamo a pau a ʻIseraʻela, mai ka wao nahele ʻo Sina, i ko lākou hele ʻana, e like nō me ke kauoha a Iēhova, a hoʻomoana ihola lākou ma Repidima; ʻaʻohe hoʻi wai e inu no nā kānaka.

² Nuku maila nā kānaka iā Mose, ʻī maila, “E hāʻawi mai i wai no mākou e inu ai.” ʻĪ akula ʻo Mose iā lākou, “No ke aha lā ʻoukou i nuku mai ai iaʻu? No ke aha lā ʻoukou i aʻa aku ai iā Iēhova?”

³ Ma laila nā kānaka i make wai ai; ʻōhumu aʻela nā kānaka iā Mose, ʻī maila lākou, “No ke aha lā ʻoe i lawe mai ai iā mākou, mai ʻAigupita mai, e make mākou, a me kā mākou keiki, a me kā mākou holoholona, i ka make wai?”

⁴ Uē akula ʻo Mose iā Iēhova, ʻī akula, “Pehea lā kaʻu e hana mai ai i kēia poʻe kānaka? Ua kokoke lākou e hailuku mai iaʻu!”

⁵ ʻĪ maila ʻo Iēhova iā Mose, “E hele aʻe ʻoe ma mua o nā kānaka; a e lawe pū aku me ʻoe i nā lunakahiko o kā ʻIseraʻela; a e lawe nō hoʻi ma kou lima i ke koʻokoʻo āu i hahau ai i nā wai, a e hele.

⁶ “Aia hoʻi, e kū nō wau i laila i mua ou ma luna o ka pōhaku ma Horeba; a e hahau ʻoe i ka pōhaku, a e puka mai nō ka wai mai loko mai o ia mea i inu ai nā kānaka.” Hana ihola nō ʻo Mose pēlā i mua o nā lunakahiko a pau o kā ʻIseraʻela.

⁷ Kapa akula ʻo ia i ka inoa o ia wahi, ʻo Masa, a me Meriba, no ka nuku ʻana o nā mamo o ʻIseraʻela, a me ko lākou aʻa ʻana iā Iēhova, ʻī aʻela, “ʻO Iēhova anei kekahi i waena o kākou, ʻaʻole paha?”

⁸ ¶ Hele maila kā ʻAmeleka, a kaua mai i kā ʻIseraʻela ma Repidima.

⁹ ʻŌlelo aʻela ʻo Mose iā Iosua, “E wae aʻe ʻoe i kānaka no kākou, a e hele e kaua aku i kā ʻAmeleka; ʻapōpō e kū wau ma luna pono o ka puʻu, me ke koʻokoʻo o ke Akua ma koʻu lima.”

¹⁰ Hana ihola ʻo Iosua e like me ka mea a Mose i ʻōlelo mai ai iā ia, a kaua akula i kā ʻAmeleka; a ʻo Mose, a me ʻAʻarona, a me Hura, piʻi akula lākou ma luna pono o ka puʻu.

¹¹ A i ka wā a Mose i kīkoʻo aku ai i kona lima, ikaika kā ʻIseraʻela; a i ka wā i alu mai ai kona lima, ikaika kā ʻAmeleka.

¹² Kaumaha ihola ko Mose mau lima; a lawe lākou i ka pōhaku, a hoʻonoho ihola ma lalo iho ona, a noho ihola ia ma luna; a ʻo ʻAʻarona lāua ʻo Hura, paepae aʻela lāua i kona mau lima, ʻo kekahi ma kekahi ʻaoʻao, a ʻo kēlā, ma kēlā ʻaoʻao; a paʻa ihola kona mau lima a napoʻo ka lā.

¹³ Hoʻoʻauheʻe akula ʻo Iosua i kā ʻAmeleka, a me kona kānaka, me ka maka o ka pahi kaua.

¹⁴ ¶ ʻĪ maila ʻo Iēhova iā Mose, “E palapala ʻoe i kēia ma loko o ka buke, i mea e hoʻomanaʻo ai, a e haʻi ma ka pepeiao o Iosua; no ka mea, e ʻānai loa ana au i kā ʻAmeleka mai lalo aʻe o ka lani.”

¹⁵ Hana ihola ʻo Mose i kuahu ma laila, a kapa akula ia i ka inoa o ia mea ʻo IĒHOVA-Nisi.

¹⁶ Ua ʻōlelo nō ia, “No ka lima ma ka noho aliʻi o Iēhova, e mau loa nō ke kaua ʻana o Iēhova i kā ʻAmeleka, mai kēia hanauna a ia hanauna aku.”