KA BUKE ʻALUA A MOSE, I KAPA ʻIA PUKA ʻANA 16 - Ka Baibala Hemolele

1 Ka ʻōhumu ʻana o nā kānaka. 10 Hāʻawi ʻia maila nā sēlū, a me ka mane. 32 Mālama ʻia kekahi.

MOKUNA XVI.

¹ ¶ Hele maila lākou, mai ʻElima mai, a hiki maila ka poʻe mamo a pau a ʻIseraʻela i ka wao nahele i Sina, he wahi ia ma waena o ʻElima a me Sinai, ʻo ka lā ʻumikumamālima ia o ka malama ʻalua, mai ko lākou puka ʻana mai i waho, mai ka ʻāina ʻo ʻAigupita mai.

² ʻŌhumu aʻela ka poʻe mamo a pau a ʻIseraʻela iā Mose mā lāua ʻo ʻAʻarona, ma ka wao nahele.

³ ʻĪ maila nā mamo a ʻIseraʻela iā lāua, “Inā i hāʻawi ʻia mai ka make no kākou, i ka lima o Iēhova, ma ka ʻāina ʻo ʻAigupita, i ka wā a kākou i noho ai ma nā ipu iʻa, a ʻai aku nō hoʻi kākou i ka ʻai a māʻona; no ka mea, ua lawe mai ʻolua iā kākou, ma loko o kēia wao nahele, e pepehi i kēia poʻe a pau i ka pōloli.”

⁴ ¶ ʻĪ maila ʻo Iēhova iā Mose, “Aia hoʻi, e hoʻoua aku au i ka ʻai, mai ka lani aku; a e hele aku nā kānaka ma waho, e hoʻoʻuluʻulu i ko ka lā ma ia lā, i hoʻāʻo aku ai au iā lākou, e hele paha lākou ma koʻu kānāwai, ʻaʻole paha.

⁵ “A hiki i ka lā ʻaono, e hoʻomākaukau lākou i ka mea a lākou e lawe mai ai i loko; e pāpālua ia i ka mea a lākou e hoʻoʻuluʻulu ai i kēlā lā i kēia lā.”

⁶ ʻŌlelo maila ʻo Mose lāua ʻo ʻAʻarona i nā mamo a pau a ʻIseraʻela, “A ahiahi, a laila ʻoukou e ʻike, na Iēhova nō ʻoukou i lawe mai nei, mai ka ʻāina mai ʻo ʻAigupita.

⁷ “A kakahiaka, a laila ʻoukou e ʻike ai i ka nani o Iēhova; no kona hoʻolohe ʻana i ka mea a ʻoukou i ʻōhumu aku ai iā Iēhova; he aha hoʻi māua, i ʻōhumu mai ai ʻoukou iā māua?”

⁸ ʻĪ maila ʻo Mose, “E hāʻawi mai ana ʻo Iēhova i ke ahiahi, i iʻa na ʻoukou e ʻai ai, a kakahiaka i ʻai e māʻona ai; no ka mea, ua lohe mai ʻo Iēhova i ka ʻōhumu ʻana a ʻoukou i ʻōhumu aku ai iā ia; he aha hoʻi ʻo māua? ʻAʻole no māua kā ʻoukou ʻōhumu ʻana; akā, no Iēhova.”

⁹ ʻŌlelo aʻela ʻo Mose iā ʻAʻarona, “E ʻī aku ʻoe i ka poʻe mamo a pau a ʻIseraʻela, ‘E hele mai lākou i mua i ke alo o Iēhova; no ka mea, ua lohe ia i kā ʻoukou ʻōhumu ʻana.’”

¹⁰ A i kā ʻAʻarona ʻōlelo ʻana i ka poʻe mamo a pau a ʻIseraʻela, ʻalawa aʻela lākou ma ka wao nahele, aia hoʻi, ʻikea akula ka nani o Iēhova ma ke ao.

¹¹ ʻŌlelo maila ʻo Iēhova iā Mose, ʻī maila,

¹² “Ua lohe au i nā ʻōhumu ʻana a nā mamo a ʻIseraʻela; e ʻōlelo aku ʻoe iā lākou, e ʻī aku, ‘A ahiahi, e ʻai ana ʻoukou i ka iʻa, a kakahiaka aʻe, e māʻona ʻoukou i ka ʻai; a e ʻike auaneʻi ʻoukou, ʻo wau nō Iēhova, ko ʻoukou Akua.’”

¹³ ¶ A i ke ahiahi, hiki maila nā sēlū, a uhi maila ma kahi a lākou i hoʻomoana ai; a kakahiaka aʻe, ahu ihola ka hau, a puni nā kahua.

¹⁴ A i ka lele ʻana o ka hau i ahu ʻia mai ai, aia hoʻi, ma ka ʻili honua o ka wao nahele, he mea liʻiliʻi me he unahi lā, me he hau paʻa lā ka liʻiliʻi.

¹⁵ A ʻike akula nā mamo a ʻIseraʻela, ʻōlelo aʻela kekahi o nā kānaka i kona hoa, “He aha kēia?” No ka mea, ʻaʻole lākou i ʻike ia mea. ʻŌlelo maila ʻo Mose iā lākou, “Eia ka ʻai a Iēhova i hāʻawi mai ai, i mea na ʻoukou e ʻai ai.

¹⁶ “Eia hoʻi ka ʻōlelo a Iēhova i kauoha mai ai, ‘E hōʻiliʻili ke kanaka ia mea, e like me kā kona waha e ʻai ai, hoʻokahi kanaka hoʻokahi ʻomera; e lawe ʻoukou a pau e like me ka nui o ko ʻoukou poʻe, ʻo kēlā kanaka kēia kanaka no ka poʻe o kona halelewa.’”

¹⁷ Hana ihola nā mamo a ʻIseraʻela pēlā, a he nui kā kekahi i hōʻiliʻili ai, a he ʻuʻuku iho kā kekahi.

¹⁸ A i ko lākou ana ʻana ma ka ʻomera, ʻo ka mea hōʻiliʻili nui, ʻaʻohe āna i koe, a ʻo ka mea hōʻiliʻili ʻuʻuku, ʻaʻole hoʻi i emi kāna; hōʻiliʻili kēlā kanaka kēia kanaka e like me kā kona waha i ʻai ai.

¹⁹ ʻĪ akula ʻo Mose iā lākou, “Mai hoʻokoe kekahi kanaka ia mea a kakahiaka.”

²⁰ ʻAʻole naʻe lākou i hoʻolohe mai i kā Mose; hoʻokoe nō kekahi ia mea a kakahiaka, a piha ihola ia i nā ilo, a pilau nō hoʻi; a huhū akula ʻo Mose iā lākou.

²¹ Hōʻiliʻili lākou ia mea i kēlā kakahiaka i kēia kakahiaka, ʻo kānaka a pau e like me kā lākou ʻai ʻana; a i ka wā i mahana aʻe ai ka lā, heheʻe ihola ia mea.

²² ¶ A hiki i ka lā ʻeono, hōʻiliʻili pāpālua ihola lākou i ka ʻai, ʻelua ʻomera a ke kanaka hoʻokahi; a hele akula nā luna a pau o nā kānaka, a haʻi akula iā Mose.

²³ ʻĪ maila ia iā lākou, “ʻO ia hoʻi ka mea a Iēhova i ʻōlelo mai ai, ‘I ka lā ʻapōpō ka hoʻomaha ʻana ʻo ka Sābati laʻa no Iēhova; ka mea a ʻoukou e kālua ai, e kālua, a ʻo ka mea a ʻoukou e hoʻolapalapa ai, e hoʻolapalapa; a ʻo ke koena a pau e hoʻāna ʻē ʻoukou, i mālama ʻia ia mea na ʻoukou no ke kakahiaka.’”

²⁴ Hoʻāna ʻē nō lākou ia mea, a kakahiaka, e like me kā Mose i kauoha mai ai; ʻaʻole hoʻi ia i pilau, ʻaʻohe ilo hoʻi ma loko o ia mea.

²⁵ ʻĪ maila ʻo Mose, “E ʻai ʻoukou ia mea i kēia lā; no ka mea, eia ka Sābati no Iēhova, i kēia lā ʻaʻole e loaʻa ia mea ma ke kula.

²⁶ “ʻEono o ʻoukou lā e hoʻoʻuluʻulu ai; a ʻo ka hiku o ka lā, o ka Sābati ia, ia lā, ʻaʻole.”

²⁷ A i ka hiku o ka lā, hele akula nō kekahi o nā kānaka e hoʻoʻuluʻulu, ʻaʻole naʻe i loaʻa iā lākou.

²⁸ ʻŌlelo maila ʻo Iēhova iā Mose, “Pehea lā ka lōʻihi o ko ʻoukou hōʻole ʻana, ʻaʻole e mālama i kaʻu mau kauoha, a me koʻu mau kānāwai?

²⁹ “E nānā hoʻi; no ka mea, ua hāʻawi aku ʻo Iēhova iā ʻoukou i ka Sābati; no ia mea, ua hāʻawi akula ia na ʻoukou ma ke ono o ka lā, i ʻai no nā lā ʻelua; e noho ʻoukou, ʻo kēlā kanaka kēia kanaka ma kona wahi iho; mai hele ke kanaka mai kona wahi aku i ka lā sābati.”

³⁰ A hoʻomaha ihola nā kānaka ma ka hiku o ka lā.

³¹ ¶ Kapa aku ka ʻohana ʻIseraʻela i ka inoa o ia mea he Mane; ua like nō ia me ka hua koriana, ua keʻokeʻo; a i ka ʻai ʻana ua like nō ia me nā wepa me ka meli.

³² ʻĪ maila ʻo Mose, “Eia ka mea a Iēhova i kauoha mai nei, ‘E hoʻopiha i kekahi ʻomera o ia mea, i mālama loa ia no kāu poʻe mamo; i ʻike lākou i ka ʻai aʻu i hānai aku ai iā ʻoukou ma ka wao nahele, i ka wā aʻu i lawe mai ai iā ʻoukou mai ka ʻāina ʻo ʻAigupita mai.’”

³³ ʻĪ aʻela ʻo Mose iā ʻAʻarona, “E lawe ʻoe i ipu, a e hahao i loko i kekahi ʻomera a piha i ka mane, a e hoʻāna ʻē i mua i ke alo o Iēhova, i mālama loa ʻia ia mea no kāu poʻe mamo.”

³⁴ E like me ka mea a Iēhova i kauoha mai ai iā Mose, pēlā i hoʻāna ʻē ai ʻo ʻAʻarona ia mea i mua i ke alo o ke Kānāwai e mālama loa ʻia ai.

³⁵ ʻAi ihola nā mamo o ʻIseraʻela i ka mane hoʻokahi kanahā makahiki, a hiki lākou i ka ʻāina kanaka; ʻai nō lākou i ka mane, a hiki lākou i ke kihi o ka ʻāina i Kanaʻana.

³⁶ Hoʻokahi ʻomera, he hapaʻumi ia no ka ʻepa.