KA BUKE ʻALUA A MOSE, I KAPA ʻIA PUKA ʻANA 15 - Ka Baibala Hemolele

1 Ka mele a Mose mā. 22 Ka wai ʻawaʻawa ma Mara.

MOKUNA XV.

¹ ¶ A laila mele akula ʻo Mose, a me nā mamo a ʻIseraʻela i kēia mele iā Iēhova; ʻōlelo akula ia me ka ʻī ʻana aku: “Iā Iēhova nō wau e mele aku ai, No ka mea, ua hoʻonani loa ʻo ia iā ia iho! Ua kiola ʻo ia i ka lio A me kona mea hoʻoholo i loko o ke kai!

² “ʻO Iēhova nō koʻu ikaika, a me kaʻu mele, ʻO ia koʻu hoʻōla, ʻo koʻu Akua hoʻi ia; E hoʻomākaukau nō wau i wahi nona e noho ai. ʻO ke Akua nō ia o koʻu makua, a e mililani aku au iā ia.

³ “He kanaka kaua ʻo Iēhova: ʻO Iēhova nō kona inoa.

⁴ “Ua kā ʻo ia i ke kai i nā kaʻa kaua o Paraʻo, a me kona poʻe koa; Ua pohō i lalo o ke Kai ʻUla kona poʻe kaua ma nā kaʻa.

⁵ “Ua poʻipū ka hohonu iā lākou; Pohō lākou i lalo me he pōhaku lā.

⁶ “Ua nani kou lima ʻākau, e Iēhova, no ka mana; Na kou lima ʻākau, e Iēhova, i pākī iho i ka ʻenemi.

⁷ “I ka nui o kou nani, ua hoʻopuehu aku ʻoe i ka poʻe i ala kūʻē mai iā ʻoe; Hoʻouna aku ʻoe i kou huhū, Pau ihola lākou me he ʻōpala lā.

⁸ “I ka hoʻohanu ʻana o kou mau puka ihu, ua hoʻākoakoa ʻia mai nā wai, Ea aʻela nā wai i luna, me he puʻu lā; Lilo nō ka hohonu i mea paʻa ma loko o ka ʻōpū o ke kai.

⁹ “ʻĪ ihola ka ʻenemi, ‘E hahai aku nō au, E loaʻa nō, a puʻunaue aku i ka waiwai pio; E māʻona auaneʻi koʻu kuko iā lākou. E unuhi au i koʻu pahi kaua, A e loaʻa hou nō lākou i koʻu lima.’

¹⁰ “Pupuhi nō ʻoe me kou makani, Uhi maila ke kai iā lākou, Pohō ihola lākou i lalo i ke kai me he kēpau lā.

¹¹ “ʻO wai ka mea i waena o ka poʻe ikaika e like me ʻoe, e Iēhova? ʻO wai kou mea like, ma ka nani o ka hemolele, He mea weliweli ka hoʻomana aku, ua hana ʻoe i nā mea kupanaha?

¹² “ʻŌ akula nō kou lima ʻākau, Ale ihola ka honua iā lākou.

¹³ “Ma ka lokomaikaʻi nō ʻoe i alakaʻi mai ai i nā kānaka āu i hoʻōla pānaʻi ai; Me kou mana nō ʻoe i alakaʻi ai iā lākou i kahi hemolele āu i noho ai.

¹⁴ “E lohe auaneʻi nā kānaka, a e makaʻu hoʻi; E loʻohia auaneʻi ka poʻe noho ma Pilisetia i ka weliweli.

¹⁵ “A laila, e weliweli mai nā aliʻi o ʻEdoma, E loʻohia nō hoʻi ka poʻe ikaika o Moaba i ka haʻalulu, E heheʻe auaneʻi ka poʻe a pau e noho ana ma Kanaʻana.

¹⁶ “E kau mai nō ka makaʻu a me ka weliweli ma luna o lākou; No ka nui o kou lima e noho mālie lākou me he pōhaku lā; A hala aʻe kou poʻe kānaka, e Iēhova, A hala aʻe nā kanaka āu i hoʻōla pānaʻi ai.

¹⁷ “Nāu nō lākou e hoʻokomo, A e hoʻonoho hoʻi iā lākou ma ka puʻu o kou hoʻoilina, I kahi āu i hana ai i wahi e noho ai nou, e Iēhova, I ke keʻena kapu hoʻi a kou mau lima i hoʻokumu ai, e ka Haku.

¹⁸ “E noho aliʻi mau loa aku nō ʻo Iēhova.”

¹⁹ ¶ No ka mea, hele aʻela ka lio o Paraʻo, me kona kaʻa kaua, a me nā hoʻoholo lio ona, a i loko o ke kai, a hoʻihoʻi maila ʻo Iēhova i nā wai o ke kai ma luna o lākou; akā, ʻo nā mamo a ʻIseraʻela, hele aʻela lākou ma kahi maloʻo ma waenakonu o ke kai.

²⁰ A ʻo Miriama, ke kāula wahine, ke kaikuahine o ʻAʻarona, lawe aʻela ia i mea kuolokani ma kona lima a hahai akula nā wāhine a pau ma muli ona, me nā mea kuolokani, a me ka hula.

²¹ ʻĪ maila ʻo Miriama iā lākou: “E mele aku ʻoukou iā Iēhova; no ka mea, ua lanakila loa ʻo ia! Ua kiola ʻo ia i ka lio a me kona mea hoʻoholo i ke kai!”

²² ¶ Pēlā i lawe mai ai ʻo Mose i kā ʻIseraʻela, mai ke Kai ʻUla mai, a hele maila lākou i ka wao nahele i Sura; hele maila lākou ma loko o ka wao nahele i nā lā ʻekolu, ʻaʻole hoʻi i loaʻa ka wai.

²³ A hiki maila lākou i Mara; ʻaʻole hiki iā lākou ke inu i ka wai o Mara; no ka mea, ua mulea ia; no ia mea, i kapa ʻia aku ai ia ʻo Mara.

²⁴ ʻŌhumu aʻela nā kānaka iā Mose, ʻī aʻela, “He aha lā ko mākou mea inu?”

²⁵ Uē akula ʻo ia iā Iēhova; a hōʻike maila ʻo Iēhova iā ia i kekahi lāʻau, a hoʻolei ʻia akula ia mea e ia i loko o ka wai, hana ʻia maila ka wai a ʻono; ma laila ia i hana ai i ʻōlelo kūpaʻa no lākou, a i kānāwai hoʻi, a ma laila ʻo ia i hoʻāʻo ai iā lākou.

²⁶ ʻĪ maila, “A i hoʻolohe mau mai ʻoe i ka leo o Iēhova, ʻo kou Akua, a e hana i ka mea pono i mua o kona maka, a e hoʻolohe i ka mea āna e kauoha mai ai, a mālama i kona mau kānāwai, a laila ʻaʻole au e kau ma luna ou i kekahi o kēia mau maʻi aʻu i kau ai ma luna o ko ʻAigupita; no ka mea, ʻo wau nō Iēhova, ka mea hoʻōla aku iā ʻoe.”

²⁷ ¶ A hele maila lākou i ʻElima, ma laila nā pūnāwai he ʻumikumamālua, a me nā lāʻau pāma he kanahiku; noho ihola lākou i laila ma kahi o nā wai.