KA BUKE ʻALUA A MOSE, I KAPA ʻIA PUKA ʻANA 14 - Ka Baibala Hemolele

1 Ka hahai ʻana o Paraʻo mā i kā ʻIseraʻela. 21 Ka hele ʻana o kā ʻIseraʻela ma ke Kai ʻUla. 24 Ka make ʻana o ko ʻAigupita ma loko o ke Kai ʻUla.

MOKUNA XIV.

¹ ¶ ʻŌlelo maila ʻo Iēhova iā Mose, ʻī maila,

² “E ʻī aku ʻoe i nā mamo a ʻIseraʻela, e kipa aʻe lākou, a e hoʻomoana ma ke alo o Pi Hahirota, ma waena o Migedola a me ke kai, ma kahi e kū pono ana i Baʻala Zepona; ma ke alo o ia wahi ʻoukou e hoʻomoana ai, ma kahakai.

³ “E ʻōlelo auaneʻi ʻo Paraʻo no nā mamo a ʻIseraʻela, ‘Ua pilikia lākou i loko o ua ʻāina lā, ua paʻa lākou i ka wao nahele.’

⁴ “A naʻu nō e hoʻopaʻakikī i ka naʻau o Paraʻo, i hahai mai ai ʻo ia ma hope o lākou; a e hoʻonani ʻia auaneʻi au ma luna o Paraʻo, a ma luna o kona pūʻali a pau; i ʻike ai hoʻi ko ʻAigupita, ʻo wau nō Iēhova.” A pēlā nō lākou i hana ai.

⁵ ¶ A haʻi ʻia akula i ke aliʻi o ʻAigupita, “Ua holo nā kānaka”; huli ka naʻau o Paraʻo a me nā kauā āna e kūʻē i nā kānaka; ʻōlelo ihola lākou, “No ke aha lā kākou i hana ai i kēia, a hoʻokuʻu aku i kā ʻIseraʻela i hoʻokauā ʻole ai lākou na kākou?”

⁶ Hoʻomākaukau aʻela ia i kona kaʻa kaua, a lawe pū akula i kona poʻe kānaka me ia.

⁷ Lawe akula ia i nā hale kaʻa i wae ʻia ʻeono haneri, a me nā kaʻa kaua a pau o ʻAigupita, a me nā luna o ia mau mea a pau.

⁸ Hoʻopaʻakikī ihola ʻo Iēhova i ka naʻau o Paraʻo, ʻo ke aliʻi o ʻAigupita, a hahai maila ia ma hope o nā mamo a ʻIseraʻela; a puka maila nā mamo a ʻIseraʻela ma waho me ka lima hoʻokiʻekiʻe.

⁹ Hahai maila ko ʻAigupita ma hope o lākou, ʻo nā lio a pau, a me nā kaʻa kaua o Paraʻo, a me kona hoʻoholo lio, a me kona poʻe koa, a loaʻa mai lākou nei e hoʻomoana ana ma kahakai, ma Pi Hahirota, e kū pono ana i Baʻala Zepona.

¹⁰ ¶ A hoʻokokoke maila ʻo Paraʻo, ʻalawa aʻela nā maka o nā mamo a ʻIseraʻela, aia hoʻi, e hele mai ana ko ʻAigupita ma hope o lākou; makaʻu loa ihola lākou; a uē akula nā mamo a ʻIseraʻela iā Iēhova.

¹¹ ʻĪ maila hoʻi lākou iā Mose, “No ka mea, ʻaʻohe lua kupapaʻu ma ʻAigupita, ua lawe mai anei ʻoe iā mākou e make ma kēia wao nahele? No ke aha lā kāu i hana mai ai iā mākou pēlā, i ka lawe ʻana mai nei iā mākou mai ʻAigupita mai?

¹² “ʻAʻole anei kēia ʻo ka ʻōlelo a mākou i haʻi aku ai iā ʻoe ma ʻAigupita, i ka ʻī ʻana aku, ‘E waiho pēlā iā mākou, i hoʻokauā aku ai mākou na ko ʻAigupita?’ No ka mea, he mea maikaʻi no mākou ke hoʻokauā aku na ko ʻAigupita, ʻaʻole hoʻi e make ma ka wao nahele.”

¹³ ʻŌlelo akula ʻo Mose i nā kānaka, “Mai makaʻu ʻoukou, e kū mālie ʻoukou, a e nānā aku i ka hoʻōla ʻana o Iēhova, i ka mea āna e hōʻike mai ai iā ʻoukou i kēia lā; no ka mea, ʻo ko ʻAigupita a ʻoukou i ʻike ai i kēia lā, ʻaʻole ʻoukou e ʻike hou iā lākou, ma hope mau loa aku.

¹⁴ “Na Iēhova nō e kaua aku no ʻoukou, a e noho mālie ʻoukou.”

¹⁵ ¶ ʻĪ maila ʻo Iēhova iā Mose, “No ke aha lā ʻoe e kāhea mai nei iaʻu? E ʻī aku ʻoe i nā mamo a ʻIseraʻela, e hele aku lākou i mua.

¹⁶ “Akā, E hāpai ʻoe i kou koʻokoʻo, a e ʻō aku kou lima ma luna o ke kai, a e hoʻokaʻawale ia; a e hele aku nō nā mamo o ʻIseraʻela ma waena o ke kai, ma kahi maloʻo.

¹⁷ “A naʻu iho nō e hoʻopaʻakikī i nā naʻau o ko ʻAigupita, a e hahai mai lākou ma hope o lākou nei; a e hoʻonani au iaʻu iho ma o Paraʻo lā a ma kona poʻe koa a pau, a ma kona mau kaʻa kaua, a me nā hoʻoholo lio ona.

¹⁸ “A e ʻike auaneʻi ko ʻAigupita, ʻo wau nō Iēhova, ke hoʻonani wau iaʻu iho ma o Paraʻo lā, a me kona mau kaʻa kaua, a me nā hoʻoholo lio ona.”

¹⁹ A ʻo ka ʻānela o ke Akua i hele ma mua o ke kahua hoʻomoana o kā ʻIseraʻela, hoʻi akula ia ma hope o lākou; a hele aʻela hoʻi ke kia ao mai mua aʻe o lākou, a kū ihola ma hope o lākou.

²⁰ Hele maila ia ma waena o ko ʻAigupita poʻe a me kā ʻIseraʻela; a lilo ia i ao pouli; a hoʻomālamalama mai nō naʻe i ka pō; no laila, ʻaʻole i hoʻokokoke mai kēlā poʻe i kēia mai ia pō a ao.

²¹ ¶ ʻŌ akula ʻo Mose i kona lima ma luna o ke kai; na Iēhova i hoʻokahe ke kai me ka makani ikaika, mai ka hikina mai, i kēlā pō a ao, a lilo ihola ke kai i ʻāina maloʻo, a ua mahele ʻia aʻela nā wai.

²² Hele maila nā mamo a ʻIseraʻela ma waena o ke kai ma kahi maloʻo; a lilo ka wai i pali no lākou ma ko lākou lima ʻākau a me ko lākou lima hema.

²³ Hahai maila ko ʻAigupita, a hele mai ma hope o lākou, ʻo nā lio a pau o Paraʻo, a me kona mau kaʻa kaua, a me nā hoʻoholo lio i waena o ke kai.

²⁴ A hiki i ka wati wanaʻao, nānā maila ʻo Iēhova i ka poʻe kaua o ʻAigupita, mai ke kia ahi a me ke ao mai, a hoʻopilikia aʻela i ka poʻe kaua o ʻAigupita.

²⁵ Hoʻohemohemo ihola ia i nā huila o ko lākou mau kaʻa kaua, i hele pupū ai lākou; no ia mea, ʻōlelo maila ko ʻAigupita, “E ʻauheʻe kākou mai ke alo aku o kā ʻIseraʻela; no ka mea, ua kaua mai nō ʻo Iēhova me lākou pū i ko ʻAigupita.”

²⁶ ¶ ʻŌlelo maila ʻo Iēhova iā Mose, “E ʻō aku kou lima ma luna o ke kai, i hoʻi hou mai ai ka wai ma luna o ko ʻAigupita, ma luna o ko lākou mau hale kaʻa, a ma luna o ko lākou poʻe hoʻoholo lio.”

²⁷ Hoʻō akula nō ʻo Mose i kona lima ma luna o ke kai, a hoʻi mai nō ke kai i kona piha ʻana i ka wā e pualena ana o ke ao; ʻauheʻe akula ko ʻAigupita i ka loaʻa ʻana o ka wai; a lūlū ihola ʻo Iēhova i ko ʻAigupita i loko o ke kai.

²⁸ Hoʻi hou akula ke kai, a popoʻi ihola ma luna o nā kaʻa kaua, a me nā hoʻoholo lio, a me ka poʻe koa a pau o Paraʻo i hele mai i loko o ke kai ma hope o lākou; ʻaʻole loa kekahi o lākou i koe.

²⁹ Akā, ʻo nā mamo a ʻIseraʻela, hele maila lākou ma kahi maloʻo i waenakonu o ke kai; a ʻo nā wai, he pali ia no lākou ma ko lākou lima ʻākau, a me ko lākou lima hema.

³⁰ Pēlā i hoʻōla mai ai ʻo Iēhova i kā ʻIseraʻela ia lā, mai ka lima o ko ʻAigupita mai; a ʻike akula kā ʻIseraʻela i ko ʻAigupita ma luna o kahakai, ua make.

³¹ ʻIke akula kā ʻIseraʻela i kēlā hana nui a Iēhova i hana aku ai i ko ʻAigupita; a makaʻu ihola nā kānaka iā Iēhova; a manaʻoʻiʻo akula lākou iā Iēhova, a me kāna kauā ʻo Mose.