KA BUKE ʻALUA A MOSE, I KAPA ʻIA PUKA ʻANA 12 - Ka Baibala Hemolele

1 Ka hoʻokumu ʻana i ka Mōliaola, ka ʻAhaʻaina Berena Hū ʻOle. 29 Ka make ʻana o nā hiapo o ʻAigupita. 31 Hoʻokuʻu ʻia kā ʻIseraʻela, a puka akula lākou i waho o ka ʻāina.

MOKUNA XII.

¹ ¶ ʻŌlelo maila ʻo Iēhova iā Mose lāua ʻo ʻAʻarona, ma ka ʻāina ʻo ʻAigupita, ʻī maila,

² “Eia ka malama maka mua o ko ʻoukou mau malama, eia ka malama mua o ko ʻoukou makahiki.

³ “E ʻōlelo aku ʻolua i ka poʻe kānaka o kā ʻIseraʻela a pau, e ʻī aku: ‘I ka lā ʻumi o kēia malama, e lawe kēlā kanaka kēia kanaka i hipa keiki ma ko ka hale o nā mākua, he hipa keiki no ka hale hoʻokahi.

⁴ ‘Akā, inā he ʻuʻuku ko ka hale, ʻaʻole lawa no ka hipa keiki, e lawe pū ia me kona hoalauna e kokoke ana ma kona hale, e like me ka nui o lākou; e like me ka ʻai ʻana a kēlā kanaka kēia kanaka, pēlā nō ʻoukou e helu ai i nā hipa keiki.

⁵ ‘I hipa keiki kīnā ʻole kā ʻoukou, he kāne o ka makahiki hoʻokahi; no loko o ka poʻe hipa paha, no loko o ka poʻe kao paha kā ʻoukou e lawe ai iā ia.

⁶ ‘Na ʻoukou ia e mālama a hiki i ka lā ʻumikumamāhā o ia malama; a na ke anaina kanaka a pau o kā ʻIseraʻela e pepehi iho ia i ke ahiahi.

⁷ ‘A e lawe lākou i ke koko, a e kau aku ma nā lapauila a ʻelua, a ma luna ma ka hoaka o ka puka o nā hale, kahi a lākou e ʻai ai ia mea.

⁸ ‘A ia pō nō, e ʻai lākou i ka ʻiʻo i ʻōhinu ʻia i ke ahi, e ʻai pū lākou ia mea me ka palaoa hū ʻole, a me nā mea mulemule.

⁹ ‘Mai ʻai maka ʻoukou ia mea, ʻaʻole hoʻi i hoʻolapalapa ʻia i ka wai; akā, e ʻōhinu ʻia i ke ahi; ʻo kona poʻo, me kona mau wāwae, a me kona naʻau.

¹⁰ ‘Mai waiho ʻoukou i kekahi a ao; a inā e koe kekahi mea a ao, e hoʻopau ʻoukou ia mea i ke ahi.

¹¹ ‘Penei ʻoukou e ʻai ai; e hoʻoliki ʻia ko ʻoukou pūhaka, a me nā kāmaʻa e paʻa ana ma ko ʻoukou mau wāwae, a me ke koʻokoʻo ma ko ʻoukou lima; e ʻai wikiwiki ʻoukou; no ka mea, ʻo ka Mōliaola ia na Iēhova.

¹² ‘No ka mea, e hele aku ana au ma ka ʻāina a pau o ʻAigupita i kēia pō, a e pepehi nō wau i nā hiapo a pau ma ka ʻāina ʻo ʻAigupita, ʻo kā ke kanaka a me kā ka holoholona; a e hoʻopaʻi aku nō wau i nā akua a pau o ʻAigupita; ʻo wau nō Iēhova.

¹³ ‘A ʻo ke koko, ʻo ia ka hōʻailona no ʻoukou ma nā hale o ko ʻoukou wahi; aia ʻike aku au i ke koko, e waiho wau iā ʻoukou, ʻaʻole e kau mai ka mea ʻino ma luna o ʻoukou e make ai, iaʻu e pepehi iho ai i ko ka ʻāina ʻo ʻAigupita.

¹⁴ ‘A e lilo nō kēia lā i mea e hoʻomanaʻo ai no ʻoukou; a e mālama ʻoukou ia lā i ʻahaʻaina na Iēhova, a hiki i ko ʻoukou mau hanauna a pau; e mālama ʻoukou ia i ʻahaʻaina, ma ke kānāwai mau loa.

¹⁵ ¶ ‘ʻEhiku mau lā kā ʻoukou e ʻai ai i ka berena hū ʻole; i ka lā mua e hoʻolei aku ʻoukou i ka mea hū ma waho o ko ʻoukou mau hale; ʻo ka mea nāna e ʻai i ka berena hū, mai ka lā ʻakahi a hiki i ka lā hiku, e ʻoki ʻia aku ia mai kā ʻIseraʻela aku.

¹⁶ ‘A i ka lā maka mua, hoʻokahi hālāwai hemolele ʻana, a i ka hiku o ka lā, hoʻokahi hālāwai hemolele ʻana o ʻoukou. Ia mau lā lā, ʻaʻohe hana maoli, ʻo ka mea wale nō a kēlā kanaka a kēia kanaka e ʻai ai, ʻo ia wale nō ka mea a ʻoukou e hana ai.

¹⁷ ‘E mālama nō ʻoukou i ka ʻAhaʻaina Berena Hū ʻOle; no ka mea, ia lā nō ua lawe mai au i ko ʻoukou poʻe koa, mai ka ʻāina mai o ʻAigupita; no ia mea, e mālama ʻoukou i kēia lā i kā ʻoukou mau hanauna aku, ma ke kānāwai mau loa.

¹⁸ ‘I ka malama maka mua, i ka lā ʻumikumamāhā o ka malama, i ke ahiahi, a laila e ʻai ʻoukou i ka berena hū ʻole, a hiki i ke ahiahi o ka lā iwakāluakumamākahi o ua malama lā.

¹⁹ ‘ʻEhiku lā e loaʻa ʻole ai ka mea hū ma loko o ko ʻoukou mau hale. ʻO ka mea ʻai i ka palaoa hū, ʻo ia ke hōʻoki ʻia aku mai ke anaina kanaka o kā ʻIseraʻela aku; inā paha he kanaka ʻē ʻo ia, a inā paha o ka mea i hānau ma ka ʻāina.

²⁰ ‘Mai ʻai ʻoukou i kekahi mea hū; ma nā hale o ʻoukou a pau, e ʻai ʻoukou i ka berena hū ʻole.’”

²¹ ¶ A laila, kiʻi akula ʻo Mose i nā lunakahiko a pau o kā ʻIseraʻela, ʻī akula iā lākou, “E wae ʻoukou, a e lawe i kā ʻoukou hipa keiki, ma kā ʻoukou mau ʻohana, a e pepehi i ka Mōliaola.

²² “A e lawe ʻoukou i pūpū husopa, a e kūpenu iho i loko o ke koko ma ke kīʻaha, a e hamo i ka hoaka a me nā lapauila ʻelua o ka puka, i ke koko o loko o ke kīʻaha, a mai puka aku kekahi o ʻoukou ma waho o ka puka o kona hale, a kakahiaka.

²³ “No ka mea, e hele aʻe ana ʻo Iēhova e pepehi i ko ʻAigupita, a ʻike mai ia i ke koko ma ka hoaka a ma nā lapauila, e waiho nō ʻo Iēhova ia puka, ʻaʻole ia e ʻae mai i ka mea luku e komo i ko ʻoukou mau hale e pepehi mai.

²⁴ “E mālama ʻoukou i kēia mea i kānāwai mau loa no ʻoukou, a no kā ʻoukou poʻe keiki.

²⁵ “A hiki aku ʻoukou i ka ʻāina a Iēhova e hāʻawi mai ai no ʻoukou, e like me kāna i ʻōlelo mai ai, a laila e mālama ʻoukou i kēia ʻoihana.

²⁶ “A i ka wā e ʻōlelo mai ai kā ʻoukou poʻe keiki iā ʻoukou, ‘He aha ke ʻano o kēia ʻoihana iā ʻoukou?’

²⁷ “E ʻōlelo aku ʻoukou, ‘ʻO ka mōhai Mōliaola kēia na Iēhova, nāna nō i waiho i nā hale o nā mamo a ʻIseraʻela ma ʻAigupita, i ka wā āna i pepehi aku ai i ko ʻAigupita, a hoʻopakele mai i ko nā hale o mākou.’” Kūlou ihola ke poʻo o kānaka a hoʻomana akula.

²⁸ Hele akula nā mamo a ʻIseraʻela, hana ihola e like me ka mea a Iēhova i kauoha mai ai iā Mose lāua ʻo ʻAʻarona, pēlā lākou i hana ai.

²⁹ ¶ A hiki i ke aumoe, pepehi ihola ʻo Iēhova i nā hiapo a pau, ma ka ʻāina ʻo ʻAigupita, mai ka hiapo a Paraʻo, a ka mea noho ma luna o kona noho aliʻi, a hiki i ka hiapo a ka mea pio i loko o ka hale lua paʻahao, a me nā hiapo a pau a nā holoholona.

³⁰ Ala aʻela ʻo Paraʻo i ka pō, ʻo ia a me kāna poʻe kauā a pau, a me ko ʻAigupita a pau; a he nui loa ke kūpinaʻi ʻana ma ʻAigupita; no ka mea, ʻaʻohe hale i make ʻole ai kekahi.

³¹ Hea maila ʻo ia iā Mose lāua ʻo ʻAʻarona i ka pō, ʻī maila, “E kū aʻe ʻolua e hele aku mai waena aku o koʻu poʻe kānaka, ʻo ʻolua a me nā mamo a ʻIseraʻela; e hele, e hoʻokauā aku na Iēhova, e like me kā ʻolua i ʻōlelo mai ai.

³² E lawe pū aku nō i kā ʻoukou poʻe hipa, a me kā ʻoukou poʻe bipi, e like me kā ʻolua i ʻōlelo ai, a e hele; a e hoʻomaikaʻi hoʻi ʻolua iaʻu.”

³³ Ikaika ihola ka manaʻo o ko ʻAigupita, e kipaku koke iā lākou mai ka ʻāina aku; no ka mea, “Ua pau mākou i ka make,” wahi a lākou.

³⁴ Lawe maila nā kānaka i kā lākou berena maka hū ʻole, a me ko lākou mau papa wili ʻai, ua ʻope pū ʻia me ko lākou lole ma luna o ko lākou mau hokua.

³⁵ Hana ihola nā mamo a ʻIseraʻela, e like me ka ʻōlelo ʻana a Mose, a nonoi akula i ko ʻAigupita i nā mea kālā, a me nā mea gula, a me nā mea ʻaʻahu.

³⁶ A hāʻawi maila ʻo Iēhova i ka lokomaikaʻi ʻia i nā kānaka i mua o ka maka o ko ʻAigupita, a hāʻawi maila lākou; pēlā lākou i hao ai i ko ʻAigupita.

³⁷ ¶ Hele maila nā mamo a ʻIseraʻela mai Ramese a hiki i Sukota, ʻeono paha haneri tausani kāne i hele wāwae, a he ʻokoʻa nā kamaliʻi.

³⁸ Hele pū maila ka poʻe ʻē he nui loa, i hui pū ʻia mai, a me nā hipa, a me nā bipi, he nui loa nā holoholona.

³⁹ Pūlehu ihola lākou i berena hū ʻole ʻo ka berena maka a lākou i lawe mai ai mai ʻAigupita mai, ʻaʻole ia i hū; no ka mea, ua kipaku ʻia lākou mai loko mai o ʻAigupita, ʻaʻole i hiki iā lākou ke kali, ʻaʻole hoʻi lākou i hoʻomākaukau i ō na lākou iho.

⁴⁰ ¶ ʻO ka noho ʻana o nā mamo a ʻIseraʻela, i noho ai lākou ma ʻAigupita, ʻehā haneri makahiki a me ke kanakolu.

⁴¹ A pau akula ia mau makahiki ʻehā haneri a me ke kanakolu, ia lā nō, hele maila ka poʻe koa a pau o Iēhova, mai ka ʻāina mai ‘o ʻAigupita.

⁴² He pō ia e hoʻomanaʻo nui ʻia ai no Iēhova, no kona lawe ʻana mai iā lākou mai ka ʻāina mai ʻo ʻAigupita; eia nō ka pō o Iēhova e hoʻomanaʻo ʻia ai e nā mamo a pau a ʻIseraʻela, ma nā hanauna o lākou.

⁴³ ¶ ʻĪ maila ʻo Iēhova iā Mose lāua ʻo ʻAʻarona, “Eia nō ke kānāwai o ka Mōliaola; ʻaʻole e ʻai ke kanaka ʻē ia mea.

⁴⁴ “Akā, ʻo ke kauā a kēlā kanaka kēia kanaka i kūʻai ʻia i ke kālā, aia ʻoki poepoe iho ʻoe iā ia, a laila ia e ʻai iho ai ia mea.

⁴⁵ “ʻO ke kanaka ʻē, a me ke kauā i hoʻolimalima ʻia, ʻaʻole lāua e ʻai ia mea.

⁴⁶ “I ka hale hoʻokahi nō e ʻai ʻia ai ia mea; mai lawe ʻoukou i kekahi ʻiʻo ma kahi ʻē aku ma waho o ka hale; mai uhaʻi hoʻi ʻoukou i kekahi iwi o ia mea.

⁴⁷ “E hana nō ke anaina kanaka o ʻIseraʻela a pau ia mea.

⁴⁸ “A i noho pū kekahi kanaka ʻē me ʻoe, a manaʻo nō ia e mālama i ka Mōliaola no Iēhova, e ʻoki poepoe ʻia kona poʻe kāne a pau; a laila e hoʻokokoke mai ia e mālama ia mea; a e lilo ia i mea like me ka mea i hānau ʻia ma ka ʻāina; no ka mea, ʻaʻole loa e ʻai kekahi ia mea, ke ʻoki poepoe ʻole ʻia ʻo ia.

⁴⁹ “Hoʻokahi nō kānāwai no ke kanaka i hānau ʻia ma ko ʻoukou wahi, a me ke kanaka ʻē, e noho pū ana me ʻoukou.”

⁵⁰ Pēlā nō i hana ai nā mamo a ʻIseraʻela a pau; e like me ka mea a Iēhova i kauoha mai ai iā Mose a iā ʻAʻarona, pēlā lākou i hana ai.

⁵¹ Ia lā nō, lawe maila nō ʻo Iēhova i nā mamo a ʻIseraʻela mai ka ʻāina ʻo ʻAigupita mai, ma ko lākou poʻe koa.