KA BUKE ʻALUA A MOSE, I KAPA ʻIA PUKA ʻANA 11 - Ka Baibala Hemolele

1 Ko Mose hōʻike mua ʻana i ka make o nā hiapo, a me ka pōmaikaʻi ʻana o kā ʻIseraʻela. 10 Ua paʻakikī hoʻi ʻo Paraʻo.

MOKUNA XI.

¹ ¶ ʻĪ maila ʻo Iēhova iā Mose, “E hoʻouka mai ana au i hoʻokahi hōʻino hou ma luna o Paraʻo, a ma luna o ʻAigupita, a ma hope iho, e hoʻokuʻu mai nō ia iā ʻoukou; a i ka lā āna e hoʻokuʻu mai ai iā ʻoukou, a laila e kipaku loa ʻo ia iā ʻoukou.

² “E ʻōlelo aku ʻoe i loko o nā pepeiao o kānaka, e nonoi aku kēlā kanaka kēia kanaka a pau i kona hoalauna, a ʻo kēlā wahine kēia wahine i kona hoalauna, i nā mea kālā a me nā mea gula.”

³ Hāʻawi maila ʻo Iēhova i ka lokomaikaʻi i nā kānaka i mua o ka maka o ko ʻAigupita. He kanaka nui nō hoʻi ʻo Mose ma ka ʻāina ʻo ʻAigupita i mua o ka maka o nā kauā a Paraʻo, i mua hoʻi o nā maka o kānaka.

⁴ ʻŌlelo akula ʻo Mose, “Penei kā Iēhova i ʻī mai nei, A hiki i ke aumoe, e hele aku nō au i waenakonu o ʻAigupita nei;

⁵ a e make auaneʻi nā hiapo a pau o ka ʻāina ʻo ʻAigupita nei, mai ka hiapo mai a Paraʻo, ka mea noho ma kona noho aliʻi, a hiki i ka hiapo a ke kauā wahine e noho ana ma ka mea wili palaoa; a me nā hiapo a pau a nā holoholona.

⁶ ‘A e nui loa auaneʻi ka uē ʻana ma ka ʻāina a pau i ʻAigupita nei; ʻaʻohe mea e like me ia ma mua, ʻaʻole hoʻi he mea e like ana ma hope.

⁷ ‘Akā, ʻaʻole loa e hoʻokala mai kekahi ʻīlio i kona alelo e kūʻē i kekahi o nā mamo a ʻIseraʻela; ʻaʻole i ke kanaka, ʻaʻole i nā holoholona; i ʻike ai ʻoukou i kā Iēhova pale ʻana ma waena o ko ʻAigupita a me kā ʻIseraʻela.’

⁸ “A ʻo kēia poʻe kauā āu, e hele mai nō lākou i oʻu nei, a e kūlou i lalo i mua oʻu, a e ʻī mai, ‘E hele aku ʻoe, a me nā kānaka a pau ma muli ou.’ A ma hope iho e puka aku nō wau.” Hele aʻela ia mai o Paraʻo mai me ka wela o kona huhū.

⁹ ¶ ʻŌlelo maila ʻo Iēhova iā Mose, “ʻAʻole e hoʻolohe mai ʻo Paraʻo iā ʻolua, i mea e nui ai koʻu mau ʻōuli ma ka ʻāina ʻo ʻAigupita.”

¹⁰ Hana ihola ʻo Mose lāua ʻo ʻAʻarona i kēia mau ʻōuli a pau i mua i ke alo o Paraʻo; a hoʻopaʻakikī maila ʻo Iēhova i ka naʻau o Paraʻo, ʻaʻole ia i hoʻokuʻu mai i nā mamo a ʻIseraʻela mai kona ʻāina mai.