KA BUKE ʻALUA A MOSE, I KAPA ʻIA PUKA ʻANA 1 - Ka Baibala Hemolele

1 Nā inoa o nā keiki a Iakoba. 7 Ka māhuahua ʻana o kā lākou poʻe mamo. 8 Ka hana ʻino ʻia mai o lākou e Paraʻo mā.

MOKUNA I.

¹ ¶ Eia nā inoa o nā keiki a ʻIseraʻela, i hele aku me Iakoba i ʻAigupita, ʻo kēlā kanaka kēia kanaka i hele aku me ko ka hale ona:

² ʻo Reubena, ʻo Simeona, ʻo Levi, ʻo Iuda;

³ ʻo ʻIsakara, ʻo Zebuluna, ʻo Beniamina;

⁴ ʻo Dana, ʻo Napetali, ʻo Gada a ʻo ʻAsera.

⁵ ʻO nā mea ola a pau i puka mai ai, mai loko aʻe o ko Iakoba pūhaka, he kanahiku lākou; a ma ʻAigupita nō ʻo Iosepa.

⁶ A make ihola ʻo Iosepa, a me kona poʻe hoahānau a pau, a me ia hanauna a pau.

⁷ Hānau nui ihola nā mamo a ʻIseraʻela, a laha loa aʻela, a kawowo loa; ua nui loa ko lākou ikaika, a ua piha hoʻi ka ʻāina iā lākou.

⁸ ¶ A kū maila kekahi aliʻi hou ma ʻAigupita, ʻaʻole i ʻike iā Iosepa.

⁹ ʻĪ maila ia i kona poʻe kānaka, “Aia hoʻi, ua ʻoi aku ka nui o nā kānaka mamo a ʻIseraʻela, a me ko lākou ikaika i ko kākou.

¹⁰ “E hana maʻalea kākou iā lākou; o nui auaneʻi lākou, a hiki mai ke kaua, hui pū lākou me ko kākou poʻe ʻenemi, a e kaua mai hoʻi iā kākou, a pēlā lākou e piʻi aku ai mai ka ʻāina aku.”

¹¹ A hoʻonoho aku lākou i nā luna hoʻoluhi ma luna o lākou, i mea e hoʻokaumaha loa ai iā lākou i nā hana nui. A hana ihola lākou i nā kūlanakauhale papaʻa no Paraʻo, ʻo Pitoma, a ʻo Ramese.

¹² E like me ko lākou hoʻoluhi ʻana mai, pēlā nō hoʻi ko lākou nei māhuahua, a me ka pālahalaha ʻana aku. A makaʻu loa lākou i nā mamo a ʻIseraʻela.

¹³ Hoʻohana ihola ko ʻAigupita i nā mamo a ʻIseraʻela me ka hoʻokoʻikoʻi.

¹⁴ Hoʻoʻawahia ihola lākou i ko lākou nei ola ʻana i ka hana luhi i loko o ka pālolo, a i nā pōhaku lepo, a me nā hana a pau ma ka mahina ʻai; a ʻo ka hana a pau a lākou i hoʻohana iho ai iā lākou nei, he mea koʻikoʻi ia.

¹⁵ ¶ ʻŌlelo maila ke aliʻi o ʻAigupita i nā pale keiki Hebera, ʻo Sipera ka inoa o kekahi, a ʻo Pua hoʻi ka inoa o kekahi;

¹⁶ ʻī maila, “A i pale keiki ʻolua i nā wāhine Hebera, a nānā ʻolua i loko o nā pā holoi; inā he keiki kāne ia, a laila e pepehi ʻolua iā ia; akā, inā he kaikamahine, e ola nō ia.”

¹⁷ Akā, makaʻu ihola nā pale keiki i ke Akua; ʻaʻole lāua i hana i ka mea a ke aliʻi o ʻAigupita i kauoha ai iā lāua; akā, hoʻōla aʻela lāua i nā keiki kāne.

¹⁸ Kiʻi maila ke aliʻi o ʻAigupita i nā pale keiki, ʻī maila iā lāua, “No ke aha lā ʻolua i hana ai i kēia mea, a hoʻōla i nā keiki kāne?”

¹⁹ ʻĪ akula nā pale keiki iā Paraʻo, “No ka mea, ʻaʻole i like nā wāhine Hebera me ko ʻAigupita poʻe wāhine, he hikiwawe ko lākou, ʻaʻole e hiki aku nā pale keiki, a hānau ʻē nō lākou.”

²⁰ A hoʻomaikaʻi maila ke Akua i nā pale keiki; a māhuahua akula nā kānaka, a ua nui loa nō hoʻi ko lākou ikaika.

²¹ A no ka makaʻu ʻana o nā pale keiki i ke Akua, a no kona hoʻomāhuahua ʻana i ko lākou mau ʻohana,

²² kauoha aʻela ʻo Paraʻo i kona poʻe kānaka a pau, ʻī akula, “ʻO nā keiki kāne a pau ke hānau mai, e kiola aku iā lākou i ka muliwai; akā, ʻo nā kaikamāhine a pau, kā ʻoukou ia e hoʻōla ai.”