ʻO KA ʻEPISETOLE A PAULO KA LUNAʻŌLELO I KO ʻEPESO 6 - Ka Baibala Hemolele

1 Ka pono no nā keiki a me nā mākua, no nā kauā a me nā haku. Ua like kēia noho ʻana me ke kaua.

MOKUNA VI.

¹ ¶ E nā keiki, e hoʻolohe i ko ʻoukou mau mākua no ka Haku; no ka mea, he pono kēia.

² «E hoʻomaikaʻi ʻoe i kou makua kāne a me ka makuahine»; ʻo ke kauoha mua kēia, e pili ana me ka ʻōlelo e pōmaikaʻi ai;

³ «i pōmaikaʻi ai ʻoe, i lōʻihi ai hoʻi kou noho ʻana ma ka honua».

⁴ ʻOukou hoʻi, e nā mākua, mai hoʻonāukiuki aku i nā keiki a ʻoukou; akā, e alakaʻi iā lākou ma ka hoʻopono a me ka hoʻonaʻauao a ka Haku.

⁵ ¶ E nā kauā, e hoʻolohe ʻoukou i nā haku o ʻoukou ma ke kino, me ka makaʻu a me ka weliweli, a me ke kūpono o ko ʻoukou naʻau, e like me iā Kristo;

⁶ ʻaʻole ma ka hoʻoikaika ʻike maka ʻia mai, e like me ka poʻe hoʻoleʻaleʻa i kānaka; akā, e like me nā kauā a Kristo, e hana ana i ka makemake o ke Akua ma ka naʻau.

⁷ Me ka naʻau ʻoluʻolu e hoʻokauā ana na ka Haku, ʻaʻole na kānaka.

⁸ E ʻike hoʻi ʻoukou, a i hana kekahi i ka mea maikaʻi, e uku ʻia mai ʻo ia e ka Haku, ʻo ka mea paʻa a me ka mea paʻa ʻole.

⁹ ʻOukou hoʻi, e nā haku, pēlā hoʻi ʻoukou e hana aku ai iā lākou, ʻaʻole ka hoʻoweliweli aku; e manaʻo ʻoukou, aia i ka lani ka Haku o ʻoukou iho; ʻaʻole hoʻi iā ia ka nānā mai ma ko ke kanaka kino.

¹⁰ ¶ Eia hoʻi, e nā hoahānau oʻu, i ikaika ʻoukou ma ka Haku, a ma ka ikaika o kona mana.

¹¹ E ʻaʻahu iho ʻoukou i ke kāhiko a pau a ke Akua, i hiki iā ʻoukou ke kūpaʻa i mua o nā hana maʻalea a ka diabolō.

¹² No ka mea, ʻaʻole kākou e hākōkō ana me ka mea ʻiʻo a me ka mea koko; akā, me nā aliʻi, nā mea ikaika, nā haku o ka pouli o kēia ao, a me nā ʻuhane ʻino o ka lewa.

¹³ No ia hoʻi, e lawe ʻoukou i ke kāhiko a pau a ke Akua, i pono iā ʻoukou ke kūpaʻa, ke hiki mai ka lā ʻino; a pau aʻela nā mea i ka hana ʻia, e kūpaʻa ʻoukou.

¹⁴ E kūpono hoʻi ʻoukou, «i kākoʻo ʻia ko ʻoukou pūhaka i ka ʻoiaʻiʻo», a «pūliki ʻia ʻoukou i ka pale umauma o ka pono»;

¹⁵ i hāwele ʻia hoʻi «ko ʻoukou wāwae i ka mākaukau no ka ʻeuanelio e malu ai».

¹⁶ Ma luna o ia mau mea a pau, e lawe hoʻi i ka ʻaʻahu a poʻo o ka manaʻoʻiʻo, i mea e hiki ai iā ʻoukou ke kinai iho i nā ihe wela a pau o ka mea ʻino.

¹⁷ E lawe hoʻi i «ka mahiole o ke ola», a me ka pahi kaua o ka ʻUhane, ʻo ia nō ka ʻōlelo a ke Akua.

¹⁸ E pule mau ana i nā pule a pau, a me ka nonoi aku ma ka ʻUhane; a no ia mea hoʻi, e kiaʻi ʻoukou me ka hoʻoikaika mau a me ka pule aku no nā haipule a pau;

¹⁹ a iaʻu hoʻi, i hāʻawi ʻia mai iaʻu ka ʻōlelo e haʻi aku ai kuʻu waha me ka makaʻu ʻole, e hōʻike aku i ka mea pohihihi o ka ʻeuanelio;

²⁰ no ia mea, he ʻelele nō wau e paʻa ana i ke kaula hao; i ʻōlelo wiwo ʻole aku au i laila, e like me kaʻu pono e ʻōlelo aku ai.

²¹ ¶ I ʻike hoʻi ʻoukou i kaʻu mau mea e noho nei, a me kaʻu hana ʻana, na Tukiko he hoahānau aloha, he lawehana mālama pono hoʻi i kā ka Haku, nāna e hōʻike aku i nā mea a pau iā ʻoukou.

²² ʻO ia kaʻu i hoʻouna aku ai iā ʻoukou no kēia mea, i ʻike ai ʻoukou i kā mākou, i hōʻoluʻolu aku ai hoʻi ʻo ia i ko ʻoukou naʻau.

²³ ¶ I pōmaikaʻi nā hoahānau, i aloha hoʻi me ka manaʻoʻiʻo, mai ke Akua ka Makua mai, a me ka Haku Iesū Kristo.

²⁴ E aloha ʻia ka poʻe a pau i aloha ʻiʻo aku i ko kākou Haku iā Iesū Kristo. ʻĀmene.