ʻO KA ʻEPISETOLE A PAULO KA LUNAʻŌLELO I KO ʻEPESO 5 - Ka Baibala Hemolele

1 He ʻōlelo hoʻoikaika ma nā mea e pono ai; no nā kāne a me nā wāhine.

MOKUNA V.

¹ ¶ No ia hoʻi, e hahai ʻoukou i ke Akua, e like me nā keiki punahele;

² e haele hoʻi ʻoukou me ke aloha, e like me kā Kristo i aloha mai ai iā kākou, a hāʻawi hoʻi iā ia iho no kākou, i ʻālana a me ka mōhai i ke Akua, i mea ʻala ʻoluʻolu.

³ ¶ A ʻo ka moekolohe, a me nā mea haumia a pau, a me ka puni waiwai, ʻaʻole loa e hoʻohiki ʻia ia mau mea i waena o ʻoukou, me ia e pono ai nā haipule;

⁴ ʻaʻole hoʻi ka ʻōlelo hilahila, ka ʻōlelo lapuwale, a me ka ʻōlelo ʻano lua, nā mea pono ʻole; akā, ʻo ka ʻōlelo hoʻomaikaʻi ka pono.

⁵ No ka mea, ua ʻike ʻoukou i kēia, ʻaʻole ka mea moekolohe, ʻaʻole hoʻi ka mea haumia, ʻaʻole hoʻi ka mea puni waiwai, ʻo ia hoʻi ka mea hoʻomana kiʻi, ʻaʻole loa o lākou noho ʻana i ke aupuni o Kristo a ʻo ke Akua.

⁶ E ao o hoʻopunipuni mai kekahi iā ʻoukou i nā ʻōlelo wahaheʻe; no kēia mau mea e hiki mai ana ka inaina o ke Akua ma luna o nā keiki hoʻolohe ʻole.

⁷ No laila, mai noho a hoʻohālike pū me lākou.

⁸ No ka mea, he pōʻeleʻele ko ʻoukou ma mua, i nēia manawa hoʻi ua mālamalama ʻoukou i ka Haku; e haele ʻoukou me he kamaliʻi no ka mālamalama lā;

⁹ (no ka mea, ʻo ka hua na ka ʻUhane, ʻo ia ka maikaʻi a pau, a me ka pono a me ka ʻoiaʻiʻo);

¹⁰ e hōʻoiaʻiʻo ʻoukou i ka mea a ka Haku i ʻoluʻolu ai.

¹¹ Mai hoʻolauna pū hoʻi ʻoukou ma nā hana hua ʻole o ka pouli, e hoʻohewa aku naʻe ia mau mea.

¹² No ka mea, ʻo nā mea i hana malū ʻia e lākou, he mea hilahila ke ʻōlelo aku ia mau mea.

¹³ A ʻo nā mea a pau e pono ke hoʻohewa ʻia aku, ua hoʻākāka ʻia ma ka mālamalama; ʻo ka mea hoʻākāka aku, ʻo ia ka mālamalama.

¹⁴ No ka mea, ua ʻōlelo ʻia, “«E ala aʻe ʻoe, e ka mea hiamoe ana, E kū aʻe hoʻi mai ka make mai, Na Kristo hoʻi ʻoe e hoʻomālamalama mai».”

¹⁵ ¶ No laila, e nānā ʻoukou i hele pono e like me ka poʻe naʻauao, ʻaʻole me ka poʻe naʻaupō,

¹⁶ e mālama pono ana i ka manawa; no ka mea, he mau lā ʻino kēia.

¹⁷ No ia mea, mai noho a naʻaupō ʻoukou; akā, e hoʻomaopopo i ka makemake o ka Haku.

¹⁸ Mai noho ʻoukou a ʻona i ka waina, no laila mai ka ʻuhaʻuha; akā, e hoʻopiha ʻia ʻoukou i ka ʻUhane;

¹⁹ e ʻōlelo ana kekahi i kekahi i nā halelū, i nā hīmeni, a me nā mele na ka ʻUhane, e hoʻoleʻa ana a e hoʻokani ana i ka Haku, i loko o ko ʻoukou naʻau;

²⁰ no nā mea a pau, e hoʻomaikaʻi mau ana i ke Akua ka Makua, ma ka inoa o ko kākou Haku ʻo Iesū Kristo;

²¹ e mālama ana i kekahi i kekahi me ka makaʻu i ke Akua.

²² ¶ E nā wāhine, e noho ma lalo o nā kāne ponoʻī a ʻoukou, e like me kā ka Haku.

²³ No ka mea, ʻo ke kāne ke poʻo o ka wahine, e like me Kristo ke poʻo o ka ʻekalesia; a ʻo ia hoʻi ke Ola no ke kino.

²⁴ No ia mea, e like me ka ʻekalesia e noho ana ma lalo o Kristo, pēlā hoʻi nā wāhine ma lalo o nā kāne ponoʻī a lākou ma nā mea a pau.

²⁵ E nā kāne, aloha aku i kā ʻoukou mau wāhine, e like me Kristo i aloha mai ai i ka ʻekalesia, a hāʻawi mai iā ia iho nona;

²⁶ i hoʻolaʻa mai ai ʻo ia iā ia, hoʻomaʻemaʻe ana iā ia i ka wai ʻauʻau, a me ka ʻōlelo,

²⁷ i hoʻolilo mai ai ʻo ia iā ia nona iho i ʻekalesia nani, ʻaʻole ona wahi paumāʻele, ʻaʻole hoʻi minomino, ʻaʻole hoʻi kekahi mea like; akā, i hemolele ia a me ka hala ʻole.

²⁸ Pēlā e pono ai nā kāne e aloha aku i kā lākou mau wāhine, e like me ko lākou mau kino iho; ʻo ka mea aloha i kāna wahine, ʻo ia ke aloha iā ia iho.

²⁹ No ka mea, ʻaʻole loa kekahi i inaina i kona kino iho; akā, ua hānai nō a me ka mālama iā ia, e like me ka Haku i ka ʻekalesia;

³⁰ no ka mea, he mau lālā kākou no kona kino, no kona ʻiʻo, a me kona iwi.

³¹ «No ia hoʻi, e haʻalele ke kanaka i kona makua kāne a me ka makuahine, a e hoʻopili ʻia aku ia i kāna wahine, a e lilo lāua ʻelua i hoʻokahi ʻiʻo».

³² He mea pohihihi nui kēia; ke ʻōlelo aku nei au no Kristo a me ka ʻekalesia.

³³ Akā, e aloha aku kēlā mea kēia mea o ʻoukou a pau i kāna wahine e like me iā ia iho; a ʻo ka wahine, e hoʻomaikaʻi aku ia i kāna kāne.