KA BUKE ʻALIMA A MOSE, I KAPA ʻIA KĀNĀWAI LUA 6 - Ka Baibala Hemolele

1 Kauoha akula ʻo Mose i kā ʻIseraʻela e mālama i nā kānāwai a me ka ʻōlelo a Iēhova, 7 a e aʻo aku lākou i kā lākou poʻe keiki.

MOKUNA VI.

¹ ¶ “Eia nā kauoha, nā kānāwai, a me nā ʻōlelo kūpaʻa, a Iēhova ko ʻoukou Akua i kauoha mai ai e aʻo aku iā ʻoukou, i mālama aku ai ʻoukou ma ka ʻāina e hele aku nei ʻoukou e noho;

² i mea e makaʻu aku ai ʻoe iā Iēhova i kou Akua, e mālama i kona mau kānāwai a pau, a me kāna mau kauoha aʻu e kauoha aku nei iā ʻoe; ʻo ʻoe, a me kāu keiki, a me kāu moʻopuna, i nā lā a pau o kou ola ʻana, i hoʻolōʻihi ʻia ai kou mau lā.

³ “E hoʻolohe hoʻi ʻoe, e kā ʻIseraʻela, a hoʻomanaʻo e mālama hoʻi, i pōmaikaʻi ai ʻoe, i māhuahua loa ai hoʻi ʻoukou, ‘ma ka ʻāina e kahe ana ʻo ka waiū a me ka meli,’ e like me kā Iēhova ke Akua o kou poʻe kūpuna i ʻōlelo mai ai iā ʻoe.

⁴ ¶ “E hoʻolohe mai, e kā ʻIseraʻela! ʻO Iēhova ko kākou Akua, hoʻokahi nō Iēhova!

⁵ “E aloha aku ʻoe iā Iēhova i kou Akua me kou naʻau a pau, me kou ʻuhane a pau, a me kou ikaika a pau.

⁶ “ʻO kēia mau ʻōlelo aʻu e kauoha aku nei iā ʻoe i kēia lā, e waiho nō ia ma loko o kou naʻau.

⁷ “A e aʻo pono aku ʻoe ia mau mea i āu mau keiki, a e kamaʻilio aku ia mau mea i kou noho ʻana ma kou hale, a i kou hele ʻana ma ke ala, i kou moe ʻana i lalo, a me kou ala ʻana i luna.

⁸ “A e nākiʻi ʻoe ia mau mea i hōʻailona ma kou lima, a e lilo ia i mea e hoʻomanaʻo ai ma waena o kou mau maka.

⁹ “A e kākau ʻoe ia mau mea ma nā lapauila o kou puka hale, a me nā puka pā ou.

¹⁰ ¶ “A i ka manawa a Iēhova kou Akua i kaʻi aku ai iā ʻoe i ka ʻāina āna i hoʻohiki mai ai i kou mau kūpuna, iā ʻAberahama, iā ʻIsaʻaka, a me Iakoba, e hāʻawi mai iā ʻoe i nā kūlanakauhale nui a maikaʻi, ʻaʻole nāu i kūkulu,

¹¹ a me nā hale piha i ka waiwai, ʻaʻole nāu i hoʻolako, a me nā luawai i ʻeli ʻia, ʻaʻole nāu i ʻeli, i nā pā waina a me nā lāʻau ʻoliva, ʻaʻole nāu i kanu; aia ʻai iho ʻoe a māʻona;

¹² a laila e mālama iā ʻoe iho, o hoʻopoina ʻoe iā Iēhova, nāna ʻoe i lawe mai ka ʻāina ʻo ʻAigupita mai, mai loko mai hoʻi o ka hale hoʻoluhi.

¹³ “E makaʻu ʻoe iā Iēhova i kou Akua, e mālama iā ia, a e hoʻohiki ʻoe ma kona inoa.

¹⁴ “Mai hele aku ʻoukou ma muli o nā akua ʻē, ʻo nā akua o nā kānaka e noho ana a puni ʻoukou;

¹⁵ o hoʻaʻā ʻia mai auaneʻi ka inaina o Iēhova kou Akua iā ʻoe, a luku ʻia mai ʻoe mai ke alo aku o ka honua; (no ka mea, ʻo Iēhova kou Akua, he Akua lili ia i waena o ʻoukou.)

¹⁶ ¶ “Mai ʻaʻa aku ʻoukou iā Iēhova i ko ʻoukou Akua, e like me ko ʻoukou ʻaʻa ʻana ma Masa.

¹⁷ “E mālama pono ʻoukou i nā kauoha a Iēhova ko ʻoukou Akua, me kāna mau ʻoihana, a me kona mau kānāwai, āna i kauoha mai ai iā ʻoe.

¹⁸ “E hana ʻoe i ka pono a me ka maikaʻi i mua i ke alo o Iēhova; i pōmaikaʻi ai ʻoe, i komo ai hoʻi ʻoe a noho ma ka ʻāina maikaʻi a Iēhova i hoʻohiki mai ai i ou mau kūpuna;

¹⁹ i hoʻokuke aku ai i kou poʻe ʻenemi a pau mai kou alo aku, e like me kā Iēhova i ʻōlelo mai ai.

²⁰ ¶ “Aia nīnau mai kāu keiki iā ʻoe ma ia hope aku, i ka ʻī ʻana mai, ‘He aha nā ʻoihana, nā kānāwai, a me nā ʻōlelo kūpaʻa a Iēhova ko kākou Akua i kauoha mai ai iā ʻoukou?’

²¹ “A laila ʻoe e ʻōlelo aku ai i kāu keiki, ‘He poʻe kauā hoʻoluhi mākou a Paraʻo i ʻAigupita, na Iēhova mākou i kaʻi aʻe mai ʻAigupita mai me ka lima ikaika;

²² ua hōʻike mai ʻo Iēhova i nā hōʻailona, a me nā mea kupanaha, he nui a he ʻino ma luna o ʻAigupita, ma luna o Paraʻo, a ma luna hoʻi o kona mau ʻōhua a pau, i mua o ko mākou maka.

²³ ‘A kaʻi maila ʻo ia iā mākou mai ia wahi mai, i hoʻokomo mai ai ia iā mākou i loko, e hāʻawi iā mākou i ka ʻāina āna i hoʻohiki ai i ko mākou poʻe kūpuna.

²⁴ ‘Kauoha maila ʻo Iēhova iā mākou e mālama i kēia mau kānāwai a pau, e makaʻu iā Iēhova ko mākou Akua, i pōmaikaʻi mau ai mākou, i mālama mai ai hoʻi ʻo ia iā mākou e ola ana, e like me ia i kēia lā.

²⁵ ‘A e lilo ia i pono no kākou, ke hoʻomanaʻo kākou e mālama i nēia mau kauoha i mua o Iēhova ko kākou Akua, e like me ia i kauoha mai ai iā kākou.’