KA BUKE ʻALIMA A MOSE, I KAPA ʻIA KĀNĀWAI LUA 34 - Ka Baibala Hemolele

1 Piʻi akula ʻo Mose i ka mauna e nānā i ka ʻāina; a make ma laila, a kanu ihola. 8 Ka uē ʻana o kā ʻIseraʻela iā ia i nā lā he kanakolu.

MOKUNA XXXIV.

¹ ¶ Piʻi akula ʻo Mose mai nā pāpū aku o Moaba ma ka puʻu ʻo Nebo, ma luna pono o Pisega, e kū pono ana i Ieriko; a hōʻike maila ʻo Iēhova iā ia i ka ʻāina a pau o Gileada a hiki i Dana,

² Me ka ʻāina a pau o kā Napetali, a me ka ʻāina o kā ʻEperaima, a me ko kā Manase, a me ka ʻāina a pau o kā Iuda, a hiki aku i ke kai ma ke komohana,

³ a me ke kūkulu hema, a me ka pāpū o ke awāwa ʻo Ieriko, ke kūlanakauhale lāʻau pāma, a hiki i Zoara.

⁴ ʻŌlelo maila ʻo Iēhova iā ia, “Eia ka ʻāina aʻu i hoʻohiki aku ai iā ʻAberahama, iā ʻIsaʻaka, a me Iakoba, i ka ʻī ʻana aku, ‘Naʻu nō ia e hāʻawi aku i kāu poʻe mamo. “Ua hōʻike aku au ia i kou mau maka; akā, ʻaʻole ʻoe e hele aku i laila.”

⁵ A make ihola ʻo Mose ke kauā a Iēhova i laila, i ka ʻāina ʻo Moaba, e like me ka ʻōlelo ʻana mai a Iēhova.

⁶ Nāna nō ia i kanu ma kekahi awāwa ma ka ʻāina ʻo Moaba, e kū pono ana i Bete Peora; akā, ʻaʻohe kanaka i ʻike i kona wahi i kanu ʻia ai a hiki i kēia manawa.

⁷ Hoʻokahi haneri a me ka iwakālua o ko Mose mau makahiki i kona manawa i make ai; ʻaʻole i pōwehiwehi kona maka, ʻaʻole hoʻi i emi kona ikaika.

⁸ Auē ihola nā mamo a ʻIseraʻela iā Mose ma nā pāpū o Moaba i nā lā he kanakolu; a pau ihola nā lā o ka uē ʻana a me ke kanikau ʻana iā Mose.

⁹ ¶ A ʻo Iosua ke keiki a Nuna, ua piha ia i ka ʻuhane e naʻauao ai; no ka mea, ua kau aku ʻo Mose i kona mau lima ma luna iho ona; a hoʻolohe akula nā mamo a ʻIseraʻela iā ia, a hana akula e like me kā Iēhova i kauoha mai ai iā Mose.

¹⁰ ʻAʻole i kū mai ke kāula ma ia hope mai i loko o kā ʻIseraʻela e like me Mose, ka mea a Iēhova i ʻike mai ai, he maka nō he maka;

¹¹ i nā hōʻailona, a me nā mea kupanaha a Iēhova i hoʻouna mai ai iā ia e hana ma ka ʻāina ʻo ʻAigupita, iā Paraʻo, i kāna mau kauā a pau, a i kona ʻāina a pau,

¹² i ka lima ikaika loa, a me ka mea makaʻu nui loa a Mose i hōʻike aku ai i mua o nā maka o kā ʻIseraʻela a pau.