KA BUKE ʻALIMA A MOSE, I KAPA ʻIA KĀNĀWAI LUA 33 - Ka Baibala Hemolele

1 Ka hoʻomaikaʻi a Mose i hoʻomaikaʻi aku ai i nā ʻohana o kā ʻIseraʻela.

MOKUNA XXXIII.

¹ ¶ Eia ka hoʻomaikaʻi a Mose, ke kanaka o ke Akua, i hoʻomaikaʻi aku ai i nā mamo a ʻIseraʻela ma mua o kona make ʻana.

² ʻĪ akula, “Mai Sinai mai, i hele mai ai ʻo Iēhova, A mai Seira mai ia i puka mai ai ma luna o lākou; Mai ka mauna ʻo Parana ia i hoʻomālamalama mai, Ma waena mai o nā ʻumi tausani haipule ʻo ia i hele mai ai; Mai kona lima ʻākau aku ke kānāwai ahi no lākou.

³ “I aloha hoʻi ia i nā kānaka; Ma kou lima kona poʻe haipule a pau; Ma kou wāwae lākou i noho ai; E loaʻa iā lākou kāu mau ʻōlelo.

⁴ “I kauoha mai ʻo Mose iā kākou i ke kānāwai, ʻO ia ka mea i ili mai ai no ka ʻaha kanaka o Iakoba.

⁵ “He aliʻi ʻo ia i loko o Iesuruna, I ka wā i hoʻākoakoa pū ai nā luna o kānaka, A i hōʻuluʻulu ai nā ʻohana o kā ʻIseraʻela.

⁶ ¶ “E ola nō ʻo Reubena, ʻaʻole ia e make; ʻAʻole hoʻi e ʻuʻuku kona poʻe kānaka.”

⁷ ¶ Eia kā Iuda; ʻī akula ia, “E hoʻolohe, e Iēhova, i ka leo o Iuda, A e alakaʻi iā ia i kona poʻe kānaka; E pono nō ia ma kona lima iho, A e kōkua mai ʻoe iā ia i kona poʻe ʻenemi.”

⁸ ¶ ʻĪ akula ia no Levi, “ʻO kou Tumima a me kou ʻUrima no kou mea haipule, Ka mea āu i hoʻāʻo ai ma Masa, Ka mea āu i hakakā ai ma ka wai o Meriba;

⁹ “Ka mea i ʻōlelo ai i kona makua kāne, a me kona makuahine, ‘ʻAʻole au i ʻike iā ia’; ʻAʻole ia i ʻike i kona mau hoahānau, ʻAʻole hoʻi ia i ʻike i kāna mau keiki; No ka mea, ua mālama lākou i kāu ʻōlelo Ua mālama hoʻi lākou i kāu berita.

¹⁰ “E aʻo aku lākou i kāu ʻōlelo kūpaʻa i kā Iakoba, A i kou kānāwai i kā ʻIseraʻela. E kau lākou i ka mea ʻala i mua ou, A me ka mōhai pono ma luna o kou kuahu.

¹¹ “E hoʻomaikaʻi ʻoe, e Iēhova, i kona waiwai, E ʻoluʻolu ʻoe i ka hana a kona lima; E hahau ʻoe i nā pūhaka o ka poʻe kūʻē mai iā ia, A me ka poʻe e inaina iā ia, i kū hou ʻole mai ai lākou.”

¹² ¶ ʻĪ akula ia no Beniamina, “Ka hiwahiwa na Iēhova, e noho maluhia me ia, E hoʻouhi mai ʻo ia iā ia i nā lā a pau; E noho nō hoʻi ia i waena o kona poʻohiwi.”

¹³ ¶ ʻĪ akula ia no Iosepa, “E hoʻomaikaʻi ʻia kona ʻāina e Iēhova, No nā mea maikaʻi o ka lani, no ka hau, A no nā mea e waiho ana ma lalo i ka honua,

¹⁴ “No nā mea maikaʻi a ka lā i hoʻokupu ai, No nā mea maikaʻi a nā mahina i hoʻūlu ai.

¹⁵ “No nā mea maikaʻi o nā mauna kahiko, No nā mea maikaʻi o nā puʻu pau ʻole,

¹⁶ “No nā mea maikaʻi o ka honua, a me kona mea i piha ai, No ka lokomaikaʻi o ka mea i noho ai ma ka lāʻau. E hiki mai ia ma luna o ke poʻo o Iosepa, A ma luna hoʻi o ka piko poʻo o ka mea i hoʻokaʻawale ʻia e kona poʻe hoahānau.

¹⁷ “Me ka hānau mua o kona poʻe bipi, pēlā kona nani, ʻO nā kiwi o ka bipi hihiu, ʻo ia kona mau kiwi; Me ia mea e ʻō aku ia i nā kānaka ma kahi hoʻokahi, a i nā mokuna o ka honua; ʻO ia nā ʻumi tausani o ʻEperaima, a ʻo ia nā tausani o Manase.”

¹⁸ ¶ ʻŌlelo akula ia no Zebuluna, “E ʻoliʻoli ʻoe, e Zebuluna, i kou hele ʻana i waho, ʻO ʻoe hoʻi, e ʻIsakara, ma kou mau halelewa!

¹⁹ “E kāhea aku lākou i nā kānaka o ka mauna; Ma laila e kaumaha aku ai i mōhai o ka pono; No ka mea, e omo lākou i ka waiwai nui o nā moana A me nā waiwai i hūnā ʻia ma ke one.”

²⁰ ¶ ʻŌlelo aku ia no Gada, “Pōmaikaʻi ka mea e hoʻomāhuahua ana iā Gada; Like me ka liona kona noho ʻana, A e weluwelu iā ia ka lima a me ke poʻo.

²¹ “Wae ihola ia i ke kuleana maikaʻi nona, No ka mea, ma laila nō ke kuleana o ke alakaʻi i waiho ai. A hele akula ia me nā luna o kānaka; Hana akula ia i ka pono o Iēhova. A i kāna ʻōlelo kūpaʻa me kā ʻIseraʻela.”

²² ¶ ʻŌlelo akula ia no Dana, “ʻO Dana, he keiki liona ia, E lele mai ia mai Basana mai.”

²³ ¶ ʻŌlelo akula ia no Napetali, “E hoʻonui ʻia ʻoe i ka lokomaikaʻi, E hoʻopiha ʻia ʻoe i ka pōmaikaʻi o Iēhova, E hoʻolilo ʻia nou ke komohana, a me ke kūkulu hema.”

²⁴ ¶ ʻŌlelo akula ia no ʻAsera, “E hoʻopōmaikaʻi ʻia ʻo ʻAsera i nā keiki. A e ʻoluʻolu ia i kona poʻe hoahānau, A e kūpenu iho ia i kona wāwae i ka ʻaila.

²⁵ “ʻO ka hao, a me ke keleawe, kou mau kāmaʻa; E like me kou mau lā, pēlā kou malu.

²⁶ ¶ “ʻAʻohe mea like me ke Akua o Iesuruna, E holo ana nō ia ma luna o ka lani e kōkua iā ʻoe, A ma luna o ke ao me kona nani nui.

²⁷ “ʻO ke Akua mau loa kou puʻuhonua, A ma lalo iho nā lima mau loa: E hoʻokuke aku ia i nā ʻenemi i mua ou, A e ʻī mai, ‘E luku aku iā lākou!’

²⁸ “A e noho maluhia wale nō ʻo kā ʻIseraʻela, ʻO ka luawai o Iakoba, ma ka ʻāina palaoa a me ka waina, A e hoʻoheleleʻi iho kona lani i ka hau.

²⁹ “Pōmaikaʻi ʻoe, e kā ʻIseraʻela! ʻO wai lā kou mea like, e nā kānaka, i hoʻōla ʻia e Iēhova, ʻO ia ka pākū nāna ʻoe e kōkua mai ʻO ia ka pahi kaua o kou nani! E malimali mai kou poʻe ʻenemi i mua ou, A e hele auaneʻi ʻoe ma luna o ko lākou wahi kiʻekiʻe.”