KA BUKE ʻALIMA A MOSE, I KAPA ʻIA KĀNĀWAI LUA 32 - Ka Baibala Hemolele

1 ʻO ke mele a Mose i hōʻike aku ai i kā ʻIseraʻela. 46 Kauoha akula ʻo Mose iā lākou e noʻonoʻo pono, a e mālama i nēia mea. 49 Piʻi aʻela ʻo Mose i ka mauna e nānā i ka ʻāina.

MOKUNA XXXII.

¹ ¶ “E hāliu i ka pepeiao, e nā lani, naʻu e ʻōlelo aku; E hoʻolohe mai, e ka honua, i nā ʻōlelo a kuʻu waha.

² “E hāʻule iho kuʻu aʻo ʻana e like me ka ua, E heleleʻi iho kaʻu ʻōlelo e like me ka hau, Me ka ua liʻiliʻi hoʻi ma luna o ka lau nahele hou, A me ka ua nui ma luna o ka weuweu.

³ “No ka mea, e haʻi aku au i ka inoa ʻo Iēhova: E hoʻomana aku ʻoukou i ko kākou Akua.

⁴ “ʻO ia ka Pōhaku, ua hemolele kāna hana ʻana; He pono hoʻi kona mau ʻaoʻao a pau, He Akua ʻōlelo ʻoiaʻiʻo, ʻaʻole ona hewa; He pono, he pololei hoʻi ia.

⁵ “Ua hana ʻino lākou, ʻaʻole noho i keiki nāna; ʻO ia ko lākou kīnā: He hanauna ʻino lākou, a me ka lauwili.

⁶ “Pēlā anei ʻoukou e hoʻihoʻi aku ai iā Iēhova, E ka poʻe kānaka hāwāwā, a me ka naʻaupō? ʻAʻole anei ia ʻo kou Makua, nāna ʻoe i kūʻai? ʻAʻole anei ia i hana mai iā ʻoe, a i hoʻokūpaʻa iā ʻoe?

⁷ “E hoʻomanaʻo i nā manawa kahiko, E noʻonoʻo i nā makahiki o nā hanauna a pau. E nīnau aku i kou makua kāne, nāna e hōʻike mai iā ʻoe; I nā lunakahiko ou, na lākou e haʻi mai iā ʻoe:

⁸ “I ka manawa a ka Mea Kiʻekiʻe i puʻunaue ai ka ʻāina no nā lāhui kanaka, I ka manawa āna i hoʻokaʻawale ai nā keiki a ʻAdamu, Hōʻike mai ia i nā palena no nā kānaka, E like me ka nui o nā mamo a ʻIseraʻela.

⁹ “ʻO ke kuleana o Iēhova, kona poʻe kānaka ia; ʻO Iakoba hoʻi kona hoʻoilina.

¹⁰ “Loaʻa ʻo ia iā ia ma ka ʻāina nāhelehele A ma ka wao nahele neoneo e uō ana; Alakaʻi akula iā ia mai ʻō a ʻō, aʻo mai ʻo ia iā ia, Mālama mai ʻo ia iā ia e like me ke kiʻi ʻōnohi o kona maka.

¹¹ “Me he ʻaeto lā e hoʻāla ana i ko ka pūnana, A hoʻolahalahai ma luna o nā keiki āna, Hohola i kona mau ʻēheu, a lawe aʻela iā lākou, A kaʻikaʻi aku ma luna o kona mau ʻēheu,

¹² “Na Iēhova wale nō ʻo ia i alakaʻi aku, ʻAʻole hoʻi he akua ʻē me ia.

¹³ “Hoʻoholoholo aʻela ʻo ia iā ia ma luna o nā wahi kiʻekiʻe o ka honua, I ʻai iho ia i ka hua o nā mahina ʻai; Hānai mai ʻo ia iā ia i ka meli mai loko mai o ka pōhaku, I ka ʻaila hoʻi mai loko mai o ka pōhaku paʻa;

¹⁴ “Me ka bata o ka bipi, a me ka waiū hipa, A me nā keiki hipa momona; A me nā hipa kāne no Basana, a me nā kao kāne, A me ka palaoa maikaʻi loa; Inu ihola ʻoe i ke koko hua waina, i ka waina maikaʻi.

¹⁵ ¶ “Akā, a momona ʻo Iesuruna, keʻehi maila ia; Ua momona ʻoe, ua puʻipuʻi, ua puni ʻoe i ka momona! A laila haʻalele ia i ke Akua, nāna ia i hana, Hoʻowahāwahā hoʻi i ka Pōhaku o kona ola.

¹⁶ “Hoʻolili aku lākou iā ia ma nā akua ʻē; Hoʻonāukiuki lākou iā ia i nā mea haumia.

¹⁷ “Mōhai aku lākou na nā daimonio, nā mea akua ʻole, Nā akua ʻike ʻole ʻia e lākou, Nā mea hou, he hou ka puka ʻana mai Nā mea makaʻu ʻole ʻia e nā mākua o ʻoukou.

¹⁸ “Manaʻo ʻole ihola ʻoe i ka Pōhaku, nāna ʻoe i hoʻohānau, A hoʻopoina i ke Akua nāna ʻoe i hana.

¹⁹ ¶ “A ʻike maila ʻo Iēhova, inaina mai ia, No ka hoʻonāukiuki mai o nā keiki kāne, a me nā kaikamāhine āna.

²⁰ “ʻĪ ihola ia, ‘E hūnā au i koʻu maka mai o lākou aku, E ʻike auaneʻi au i ke ʻano o ko lākou hope, No ka mea, he hanauna ʻino lākou, He poʻe keiki ʻaʻole he ʻoiaʻiʻo i loko o lākou.

²¹ ‘Hoʻolili mai lākou iaʻu ma ka mea, ʻaʻole he Akua; Hoʻonāukiuki mai lākou iaʻu ma ko lākou mau mea lapuwale. A naʻu hoʻi lākou e hoʻolili aku ma ka mea kanaka ʻole; E hoʻonāukiuki aku hoʻi au iā lākou ma ka lāhui kanaka naʻaupō.

²² ‘No ka mea, ua hoʻaʻā ʻia ke ahi e kuʻu inaina, A e ʻenaʻena ia a hiki i lalo lilo i ka pō; A e hoʻopau ia i ka honua a me kona hua iho, A e puhi ia i ke ahi i nā kumu mauna.

²³ ¶ ‘E hōʻiliʻili au i nā ʻino ma luna iho o lākou; E pana aku au i kaʻu mau pua iā lākou.

²⁴ ‘E pau auaneʻi lākou i ka pōloli, E ʻai ʻia hoʻi lākou i ke ahi wela, a me ka make ʻawaʻawa; ʻO ka niho o nā mea hihiu kaʻu e hoʻouna aku ai ma luna o lākou, A me nā mea make o nā nahesa o ka honua.

²⁵ ‘ʻO ka pahi kaua ma waho, a me ka makaʻu ma loko; E luku i ke keiki kāne, a me ke kaikamahine, I ke keiki waiū, a me ke kanaka poʻo hina.

²⁶ ‘ʻĪ ihola au, “E hoʻoʻauheʻe aku au iā lākou i nā pilikia, E hōkai hoʻi au i ko lākou lono i waena o kānaka.”

²⁷ ‘Inā ʻaʻole au i makaʻu i ka inaina o ka poʻe ʻenemi, O hana kūʻē mai ko lākou poʻe ʻenemi, O ʻōlelo mai lākou, “Na ko mākou lima kiʻekiʻe, ʻAʻole na Iēhova i hana kēia mau mea a pau.”’

²⁸ ¶ “No ka mea, he lāhui kanaka nele i ka naʻauao, ʻAʻole hoʻi he ʻike ma loko o lākou.

²⁹ ‘Inā, i naʻauao lākou a i ʻike lākou i kēia, A i manaʻo lākou i ko lākou hope!

³⁰ “Pehea lā e alualu ai kekahi i ke tausani hoʻokahi, A ʻo nā mea ʻelua e hoʻopuehu ai i nā tausani he ʻumi, Ke ʻole i kūʻai aku ko lākou Pōhaku iā lākou, Ke ʻole hoʻi i hoʻolilo aku ʻo Iēhova iā lākou?

³¹ “ʻO ko lākou pōhaku, ʻaʻole like ia me ko kākou Pōhaku, Ma ka hōʻoiaʻiʻo ʻana mai o ko kākou poʻe ʻenemi.

³² “No ka mea, ʻo ko lākou kumu waina, he kumu waina no Sodoma A no nā māla hoʻi o Gomora; ʻO kā lākou hua waina, he hua waina make, A ʻo nā huhui waina a lākou, he ʻawaʻawa ia.

³³ “ʻO kā lākou waina, he mea make o nā moʻo lele, A me ka mea make ʻino o nā moʻo niho ʻawa.

³⁴ ¶ ‘ʻAʻole anei i hūnā ʻia kēia mea me aʻu, A i hoʻopaʻa ʻia i waena pū me oʻu waiwai?

³⁵ ‘Iaʻu nō kā hoʻopaʻi aku, a me ka hoʻouku; E hoʻopaheʻe auaneʻi ko lākou wāwae; No ka mea, ua kokoke mai ka lā e pōʻino ai lākou, Ua lalelale mai nā mea e hiki mai ana ma luna o lākou.’

³⁶ “No ka mea, e hoʻopaʻi auaneʻi ʻo Iēhova i kona poʻe kānaka A e minamina nō ia i kāna poʻe kauā, Ke ʻike ia, ua nāwaliwali ka lima, ʻAʻohe mea i paʻa, ʻaʻohe mea i paʻa ʻole.

³⁷ “A e ʻōlelo mai ia, ‘ʻAuhea aʻe nei ko lākou mau akua, Ka pōhaku a lākou i hilinaʻi ai?

³⁸ ‘Ka mea i ʻai i ka momona o ko lākou mōhai, Ka mea i inu i ka waina o kā lākou mōhai inu? E kū mai lākou e kōkua mai iā ʻoukou, A e hoʻomalu mai iā ʻoukou.

³⁹ ‘E nānā ʻoukou ʻānō, ʻo wau, ʻo wau nō ia, ʻAʻohe akua ʻē aʻe, ʻo wau wale nō; ʻO wau ke pepehi, ʻo wau ke hoʻōla; ʻO wau ke hoʻoʻeha, ʻo wau ke hoʻōla; ʻAʻohe mea nāna e hoʻopakele aʻe mai kuʻu lima aku.

⁴⁰ ‘No ka mea, ke kaʻikaʻi nei au i kuʻu lima ma ka lani, Me ka ʻī iho, “He ola mau loa koʻu.

⁴¹ “Inā e hoʻokala au i kuʻu pahi kaua huali, A e lawe kuʻu lima i ka hoʻoponopono, E hoʻopaʻi aku au i kuʻu poʻe ʻenemi, E hoʻouku aku au i ka poʻe e inaina mai iaʻu.

⁴² “E hoʻoinu au i nā pua aʻu i ke koko a ʻona, E ʻai iho kuʻu pahi kaua i ka ʻiʻo, Me ke koko o ka mea i pepehi ʻia, a me ko ka mea i pio, I ke poʻo hoʻi o nā aliʻi o ka poʻe ʻenemi.”’

⁴³ “E ʻoliʻoli ʻoukou, e nā ʻāina, me kona poʻe kānaka; No ka mea, e uku auaneʻi nō ia i ke koko o kona poʻe kauā, A hoʻopaʻi nō ia i kona poʻe ʻenemi,’ A e hoʻōla nō ia i ka ʻāina o kona poʻe kānaka.”

⁴⁴ ¶ Hele mai ʻo Mose a haʻi aku i nā pepeiao o kānaka i nā hua ʻōlelo a pau o kēia mele, ʻo ia a me Iosua, ke keiki a Nuna.

⁴⁵ A hoʻopau aʻela ʻo Mose i ka ʻōlelo ʻana aku i kēia mau ʻōlelo a pau i kā ʻIseraʻela a pau.

⁴⁶ ʻĪ akula ia iā lākou, “E noʻonoʻo pono ko ʻoukou naʻau i nā ʻōlelo a pau aʻu e hōʻike aku nei iā ʻoukou i kēia lā; ʻo ia kā ʻoukou e kauoha aku ai i nā keiki a ʻoukou e mālama, e hana hoʻi i nā ʻōlelo a pau o kēia kānāwai.

⁴⁷ “ʻAʻole kēia he mea lapuwale no ʻoukou; no ka mea, ʻo ko ʻoukou ola kēia; a ma kēia mea e hoʻolōʻihi ai ʻoukou i nā lā ma ka ʻāina, kahi a ʻoukou e hele aku nei i kēlā kapa o Ioredane e noho.”

⁴⁸ ¶ ʻŌlelo maila ʻo Iēhova iā Mose ia lā nō, ʻī maila,

⁴⁹ “E piʻi aku ʻoe i kēia kuahiwi, i ʻAbarima, ma ka puʻu ʻo Nebo, ma ka ʻāina ʻo Moaba, e kū pono ana i Ieriko, a e nānā i ka ʻāina ʻo Kanaʻana, aʻu e hāʻawi aku nei i wahi e noho ai no nā mamo a ʻIseraʻela;

⁵⁰ a e make ʻoe ma ke kuahiwi, kahi āu e piʻi aku ai a e hui pū ʻia ʻoe me kou poʻe kānaka, e like me ka make ʻana o ʻAʻarona kou kaikuaʻana, a hui pū ʻia ʻo ia me kona poʻe kānaka.

⁵¹ “No ka mea, ua hana hewa ʻolua iaʻu i waena o nā mamo a ʻIseraʻela ma ka wai o Meriba, ma Kadesa, i ka wao nahele ʻo Zina; i ko ʻolua hoʻāno ʻole mai iaʻu ma waena o nā mamo a ʻIseraʻela.

⁵² “E ʻike nō naʻe ʻoe i ka ʻāina; akā, ʻaʻole ʻoe e hele aku i laila, i ka ʻāina aʻu e hāʻawi aku nei i nā mamo a ʻIseraʻela.”