KA BUKE ʻALIMA A MOSE, I KAPA ʻIA KĀNĀWAI LUA 3 - Ka Baibala Hemolele

1 No ka lanakila o kā ʻIseraʻela ma luna o ʻOga ke aliʻi o Basana. 14 No ka hāʻawi ʻana o ka ʻāina o ʻOga a me ka ʻāina o Sihona i kā Gada, a me kā Reubena a me kā Manase. 18 Ke kauoha a Mose iā lākou a iā Iosua, a me kāna pule.

MOKUNA III.

¹ ¶ “A laila hāliu aʻela kākou, a piʻi akula ma ke alanui o Basana; a hele maila ʻo ʻOga ke aliʻi o Basana e kūʻē iā kākou, ʻo ia a me kona poʻe kānaka a pau i ke kaua ma ʻEderei.

² “ʻŌlelo mai ʻo Iēhova iaʻu, ‘Mai makaʻu iā ia; no ka mea, e hoʻolilo ana au iā ia, a me kona poʻe kānaka a pau, a me kona ʻāina, i loko o kou lima; a e hana aku ʻoe iā ia e like me kāu i hana aku ai iā Sihona i ke aliʻi o kā ʻAmora, ka mea i noho ma Hesebona.’

³ “A hoʻolilo mai hoʻi ʻo Iēhova ko kākou Akua iā ʻOga ke aliʻi o Basana, a me kona poʻe kānaka a pau i loko o ko kākou lima; a luku akula kākou iā ia, ʻaʻole i hoʻokoe ʻia kekahi mea nona.

⁴ “A lawe ihola kākou i kona mau kūlanakauhale a pau i kēlā manawa; ʻaʻole i koe ke kūlanakauhale i lawe ʻole ʻia e kākou, he kanaono kūlanakauhale, nā wahi a pau o ʻAregoba, ke aupuni o ʻOga ma Basana.

⁵ “A ua paʻa nēia mau kūlanakauhale a pau i nā pā pōhaku kiʻekiʻe, a me nā ʻīpuka a me nā kaola; a he nui loa nā kūlanakauhale ʻē aʻe, ʻaʻole i paʻa i ka pā pōhaku.

⁶ “A luku loa akula kākou iā lākou, e like me kākou i luku aku ai iā Sihona ke aliʻi o Hesebona, luku akula i nā kānaka, i nā wāhine me nā kamaliʻi o nā kūlanakauhale a pau.

⁷ “Akā, ʻo nā holoholona a pau a me ka waiwai pio o nā kūlanakauhale, lawe maila kākou ia mea no kākou.

⁸ “A lawe akula kākou i kēlā manawa, mai loko mai o nā lima o ua mau aliʻi lā ʻelua o kā ʻAmora, i ka ʻāina ma kēia ʻaoʻao o Ioredane, mai ke kahawai ʻo ʻArenona a hiki i ka mauna ʻo Heremona;

⁹ (kapa akula ko Sidona i Heremona, ʻo Siriona; a kapa akula kā ʻAmora ia, ʻo Senira);

¹⁰ ʻo nā kūlanakauhale a pau o ka pāpū, a me Gileada a pau, a me Basana a pau, a hiki i Saleka a me ʻEderei, nā kūlanakauhale o ke aupuni o ʻOga i Basana.

¹¹ “No ka mea, ʻo ʻOga ke aliʻi o Basana wale nō i koe o nā kānaka nunui; aia hoʻi, ʻo kona wahi moe, he wahi moe hao; ʻaʻole anei ia ma Rabata no nā mamo a ʻAmona? ʻEiwa nō kūbita o kona lōʻihi, a ʻehā kūbita o kona laulā, ma kā ke kanaka kūbita.

¹² ¶ “A ʻo kēia ʻāina i lilo mai ai iā kākou i kēlā manawa, mai ʻAroera ma ke kahawai ʻo ʻArenona, a me ka hapalua o ka mauna o Gileada, a me ko laila mau kūlanakauhale, ʻo kaʻu ia i hāʻawi aku ai no kā Reubena a me kā Gada.

¹³ “A ʻo ke koena o Gileada a me Basana a pau, ke aupuni o ʻOga, ʻo kaʻu ia i hāʻawi aku ai no ka ʻohana hapa a Manase; ʻo ka ʻāina a pau ʻo ʻAregoba a me Basana a pau, ʻo ia kai kapa ʻia, he ʻāina o nā kānaka nunui.

¹⁴ “Lawe akula ʻo Iaira ke keiki a Manase i ka ʻāina a pau ʻo ʻAregoba a hiki i ka mokuna ʻo Gesuri, a me Maʻakati; a kapa akula iā lākou ma kona inoa iho, ʻo Basana Havota Iaira, a hiki i kēia lā.

¹⁵ “A hāʻawi akula au iā Gileada no Makira.

¹⁶ “A hāʻawi aku au no kā Reubena a me kā Gada, mai Gileada a hiki i ke kahawai ʻo ʻArenona, i waena o ke awāwa, ka mokuna a hiki i ke kahawai ʻo Iaboka, ʻo ia hoʻi ka mokuna o nā mamo a ʻAmona.

¹⁷ “ʻO ka pāpū hoʻi a me Ioredane, a ʻo ka mokuna, mai Kinereta a hiki i ke kai o ka pāpū, ʻo ia ka Moana Kai ma ke kumu o Pisega ma ka hikina.

¹⁸ ¶ “Kauoha akula au iā ʻoukou i kēlā manawa, ʻī akula, ‘Ua hāʻawi mai ʻo Iēhova ko ʻoukou Akua i kēia ʻāina iā ʻoukou e lilo no ʻoukou; ʻo ʻoukou ka poʻe koa ke hele me ke kāhiko i ke kaua i mua o ko ʻoukou poʻe hoahānau, ʻo nā mamo a ʻIseraʻela.

¹⁹ ‘Akā, ʻo kā ʻoukou wāhine a me kā ʻoukou kamaliʻi, a me nā holoholona a ʻoukou, (ua ʻike au, he nui nā holoholona a ʻoukou,) e noho lākou ma nā kūlanakauhale aʻu i hāʻawi aku ai no ʻoukou;

²⁰ a i ka manawa a Iēhova e hoʻomaha mai ai i ko ʻoukou poʻe hoahānau, e like me ia iā ʻoukou, a lilo nō lākou ka ʻāina a Iēhova ko ʻoukou Akua i hāʻawi mai ai iā lākou ma kēlā ʻaoʻao o Ioredane; a laila e hoʻi hou mai ʻoukou, ʻo kēlā kanaka kēia kanaka i kona ʻāina aʻu i hāʻawi aku ai no ʻoukou.’

²¹ “Kauoha akula hoʻi au iā Iosua i kēlā manawa, ʻī akula, ‘Ua ʻike kou maka i nā mea a pau a Iēhova ko ʻoukou Akua i hana mai ai i kēia mau aliʻi ʻelua; pēlā ʻo Iēhova e hana aku ai i nā aupuni a pau āu e hele ai.

²² ‘Mai makaʻu ʻoukou iā lākou; no ka mea, ʻo Iēhova ko ʻoukou Akua, ʻo ia ke kaua mai no ʻoukou.’

²³ ¶ “A noi akula au iā Iēhova i kēlā manawa, ʻī akula,

²⁴ ‘E Iēhova ke Akua, ua hoʻomaka aʻe nei ʻoe e hōʻike i kāu kauā i kou mana, a me kou lima ikaika; no ka mea, ʻo wai ke Akua i loko o ka lani, a me ka honua, e hiki iā ia ke hana e like me kāu mau hana, a me kou ikaika?

²⁵ ‘Ke noi aku nei au, e ʻae mai ʻoe iaʻu e hele aku au e ʻike i ka ʻāina maikaʻi ma kēlā ʻaoʻao o Ioredane, i kēlā kuahiwi maikaʻi o Lebanona.’

²⁶ “Akā, ua huhū mai ʻo Iēhova iaʻu no ʻoukou, ʻaʻole i hoʻolohe mai iaʻu; a ʻī maila ʻo Iēhova iaʻu, ‘Ua oki; mai ʻōlelo hou mai ʻoe iaʻu i kēia mea.

²⁷ ‘E piʻi aku ʻoe ma luna pono o Pisega, a e nānā aku kou maka ma ke komohana, a ma ke kūkulu ʻākau, a ma ke kūkulu hema, a ma ka hikina, a e ʻike me kou mau maka; no ka mea, ʻaʻole ʻoe e hele ma kēlā kapa o Ioredane nei.

²⁸ ‘Akā, e kauoha ʻoe iā Iosua, e hōʻeuʻeu aku, a e hoʻoikaika aku iā ia; no ka mea, ʻo ia ke hele aku i mua o kēia poʻe kānaka, a nāna nō lākou e hoʻonoho ma ka ʻāina āu i ʻike ai.’

²⁹ “A noho ihola kākou ma ke awāwa e kū pono ana i Bete Peora.