KA BUKE ʻALIMA A MOSE, I KAPA ʻIA KĀNĀWAI LUA 27 - Ka Baibala Hemolele

1 No ke kākau ʻana i ke kānāwai ma nā pōhaku i hāpala ʻia i ka puna. 11 ʻEono ʻohana e kū ma ka mauna ʻo Gerizima e hoʻomaikaʻi. 13 ʻEono ʻohana e kū ma ka mauna ʻo ʻEbala e hōʻino. 14 Na ka poʻe Levi e haʻi aku ka pōʻino.

MOKUNA XXVII.

¹ ¶ Kauoha akula ʻo Mose, a me nā lunakahiko o kā ʻIseraʻela, i nā kānaka, i ka ʻī ʻana aku, “E mālama i nā kauoha a pau aʻu e kauoha aku nei iā ʻoukou i kēia lā.

² “A i ka lā a ʻoukou e hele aku ai ma kēlā kapa o Ioredane, i ka ʻāina a Iēhova kou Akua i hāʻawi mai ai iā ʻoe, e kūkulu ʻoe i nā pōhaku nui, a e hāpala ia mau mea i ka puna.

³ “A e kahakaha iho ma luna o ia mau mea i nā hua ʻōlelo a pau o kēia kānāwai, aia hiki aku ʻoe ma kēlā ʻaoʻao, i komo aku ai ʻoe ma ka ʻāina a Iēhova kou Akua i hāʻawi mai ai iā ʻoe, ‘he ʻāina e kahe ana ʻo ka waiū a me ka meli’; e like me kā Iēhova ke Akua o kou mau kūpuna i ʻōlelo mai ai iā ʻoe.

⁴ “Aia hiki aku ʻoukou ma kēlā ʻaoʻao o Ioredane, e kūkulu ʻoukou i kēia mau pōhaku, aʻu e kauoha aku nei iā ʻoukou i kēia lā, ma ka mauna ʻo ʻEbala, a e hāpala ia mau mea i ka puna.

⁵ “A ma laila ʻoe e hana ai i kuahu no Iēhova kou Akua, i kuahu pōhaku; mai kau ʻoe i ka mea hao ma luna o ia mau mea.

⁶ “E hana ʻoe i ke kuahu no Iēhova kou Akua me ka pōhaku i kālai ʻole ʻia; a ma luna ona e kaumaha aku ai ʻoe i nā mōhai kuni no Iēhova kou Akua.

⁷ “A e kaumaha ʻoe i nā mōhai aloha, a e ʻai iho ʻoe ma laila, a e ʻoliʻoli ʻoe i mua o Iēhova kou Akua.

⁸ “A e kahakaha iho ʻoe ma luna o nā pōhaku i nā hua ʻōlelo a pau o kēia kānāwai a akāka loa.”

⁹ ¶ ʻŌlelo akula ʻo Mose a me nā kāhuna o nā Levi, i kā ʻIseraʻela a pau, ʻī akula, E mālama, e hoʻolohe, e kā ʻIseraʻela: ua lilo ʻoe i kēia lā i poʻe kānaka no Iēhova kou Akua.

¹⁰ “No ia mea, e hoʻolohe ʻoe i ka leo o Iēhova kou Akua, a e hana i kāna mau kauoha, a me kona mau kānāwai, aʻu e kauoha aku nei iā ʻoe i kēia lā.”

¹¹ ¶ A kauoha akula hoʻi ʻo Mose i nā kānaka ia lā, i ka ʻī ʻana aku,

¹² “Eia nā mea e kū ma ka mauna ʻo Gerizima e hoʻomaikaʻi aku i nā kānaka, i ko ʻoukou hiki ʻana aku i kēlā kapa o Ioredane: ʻo kā Simeona, ʻo kā Levi, ʻo kā Iuda, ʻo kā ʻIsakara, ʻo kā Iosepa, a me kā Beniamina;

¹³ a eia nā mea e kū ana ma ka mauna ʻo ʻEbala no ka hōʻino ʻana: ʻo kā Reubena, ʻo kā Gada, ʻo kā ʻAsera, ʻo kā Zebuluna, ʻo kā Dana, a me kā Napetali.

¹⁴ “A e ʻōlelo aku kā Levi, a e ʻī aku i nā kānaka a pau o kā ʻIseraʻela me ka leo nui,

¹⁵ ¶ ‘E pōʻino ke kanaka, ke hana ia i kiʻi kālai ʻia a me ke kiʻi i hoʻoheʻeheʻe ʻia, he mea hoʻopailua ʻia i mua o Iēhova, ka hana a nā lima o ke kahuna hana, a ke waiho iho ia ma kahi malū.’ A e pane mai nā kānaka a pau, e ʻōlelo mai, ‘Pēlā ʻiʻo nō!’

¹⁶ ¶ ‘E pōʻino ke kanaka ke hoʻowahāwahā i kona makua kāne a me kona makuahine.’ A ʻo nā kānaka a pau e ʻōlelo mai, ‘Pēlā ʻiʻo nō!’

¹⁷ ¶ ‘E pōʻino ke kanaka ke hoʻoneʻe aku ia i ka palena ʻāina o kona hoalauna.’ A ʻo nā kānaka a pau e ʻōlelo mai, ‘Pēlā ʻiʻo nō!’

¹⁸ ¶ ‘E pōʻino ke kanaka ke hoʻohuli aʻe i ka makapō i waho o ke alanui.’ A ʻo nā kānaka a pau e ʻōlelo mai, ‘Pēlā ʻiʻo nō!’

¹⁹ ¶ ‘E pōʻino ke kanaka ke hoʻokeʻekeʻe i ka pono o ka malihini, a me ke keiki makua ʻole, a me ka wahine kāne make.’ A ʻo nā kānaka a pau e ʻōlelo mai, ‘Pēlā ʻiʻo nō!’

²⁰ ¶ ‘E pōʻino ke kanaka ke moe me ka wahine a kona makua kāne; no ka mea, ua wehe aʻe ia i ke kapa moe o kona makua kāne.’ A ʻo nā kānaka a pau e ʻōlelo mai, ‘Pēlā ʻiʻo nō!’

²¹ ¶ ‘E pōʻino ke kanaka ke moe me kekahi holoholona.’ A ʻo nā kānaka a pau e ʻōlelo mai, ‘Pēlā ʻiʻo nō!’

²² ¶ ‘E pōʻino ke kanaka ke moe ia me kona kaikuwahine, ke kaikamahine a kona makua kāne, a ke kaikamahine a kona makuahine.’ A ʻo nā kānaka a pau e ʻōlelo mai, ‘Pēlā ʻiʻo nō!’

²³ ¶ ‘E pōʻino ke kanaka, ke moe ia me kona makuahōnōai wahine.’ A ʻo nā kānaka a pau e ʻōlelo mai, ‘Pēlā ʻiʻo nō!’

²⁴ ¶ ‘E pōʻino ke kanaka ke pepehi malū i kona hoalauna.’ A ʻo nā kānaka a pau e ʻōlelo mai, ‘Pēlā ʻiʻo nō!’

²⁵ ¶ ‘E pōʻino ke kanaka ke lawe i ka uku no ka pepehi i ke kanaka hala ʻole.’ A ʻo nā kānaka a pau e ʻōlelo mai, ‘Pēlā ʻiʻo nō!’

²⁶ ¶ ‘E pōʻino ke kanaka ke hoʻopaʻa ʻole i nā hua ʻōlelo a pau o kēia kānāwai, e mālama aku ia mau mea.’ A ʻo nā kānaka a pau e ʻōlelo mai, ‘Pēlā ʻiʻo nō!’