KA BUKE ʻALIMA A MOSE, I KAPA ʻIA KĀNĀWAI LUA 25 - Ka Baibala Hemolele

1 No ka hahau ʻana i nā mea i hewa. 4 No ka bipi hehi palaoa. 5 No ka mare ʻana ke kanaka i ka wahine a kona hoahānau make. 11 No ka wahine hilahila ʻole. 17 E hōkai loa aku i kā ʻAmeleka.

MOKUNA XXV.

¹ ¶ “Inā he mea e hakakā ai i waena o nā kānaka, a hele mai lākou ma kahi hoʻokolokolo, i hoʻoponopono ai nā luna kānāwai iā lākou; a laila e hoʻāpono aku lākou i ka mea i pono, a e hoʻāhewa aku i ka mea i hewa.

² “Inā he pono e lilo ka mea i hewa i ka hahau ʻia, e hoʻomoe ka luna kānāwai iā ia ma lalo, a e hahau ʻia ʻo ia i mua o kona maka, e like me ke ʻano o kona hewa, ma ka helu ʻana.

³ “Hoʻokahi kanahā ia e hahau ai iā ia, ʻaʻole keu aku; inā e hahau hou iā ia, a nui ka hahau ʻana, e lilo auaneʻi kou hoahānau i mea hoʻowahāwahā ʻia i kou maka.

⁴ ¶ “Mai hoʻopaʻa aku ʻoe i ka waha o ka bipi e hehi ana i ka palaoa.

⁵ ¶ “Inā e noho pū nā hoahānau kāne, a make kekahi o lākou, ʻaʻohe āna keiki, mai mare ka wahine a ka mea i make i ka malihini ma waho; na ka hoahānau o kāna kāne e hele i loko i ona lā, a e lawe iā ia i wahine nāna, a e mālama aku i ka ʻoihana a ka hoahānau o kāna kāne.

⁶ “A ʻo ka hānau mua āna e hānau ai, e lawe nō ia i ka inoa o kona hoahānau i make, i nalowale ʻole ai kona inoa mai kā ʻIseraʻela aku.

⁷ “Inā makemake ʻole ke kanaka e lawe i ka wahine a kona hoahānau, a laila e piʻi ka wahine a kona hoahānau ma ka ʻīpuka i nā lunakahiko, a e ʻī aku, ‘Ua hōʻole ka hoahānau o kuʻu kāne e hoʻokū i ka inoa no kona hoahānau i loko o kā ʻIseraʻela, ʻaʻole ia i hāliu mai e mālama i ka ʻoihana a ka hoahānau o kuʻu kāne.’

⁸ “A laila e kāhea aku nā lunakahiko o kona kūlanakauhale iā ia, a e ʻōlelo aku iā ia; a i kūpaʻa ia, a e ʻī mai, ‘ʻAʻole oʻu makemake e lawe iā ia’;

⁹ a laila e hele mai ka wahine a kona hoahānau iā ia i mua o nā lunakahiko, a e kala aʻe i kona kāmaʻa mai kona wāwae, a e kuha aku i kona maka, me ka ʻōlelo aku, ‘Pēlā e hana ʻia aku ai i ke kanaka, i ka mea kūkulu ʻole i ka hale o kona hoahānau.’

¹⁰ “A e kapa ʻia kona inoa i loko o kā ʻIseraʻela, ‘ʻO ka hale o ka mea i kala ʻia kona kāmaʻa.’

¹¹ ¶ “A i hakakā pū nā kānaka, kekahi kanaka a me kona hoahānau, a hoʻokokoke mai ka wahine a kekahi e hoʻopakele i kāna kāne i ka lima o ka mea i pepehi mai iā ia, a hoʻopaʻa aku iā ia ma kona wahi hilahila;

¹² e ʻoki aʻe i kona lima, mai minamina kou maka.

¹³ ¶ “Mai waiho i loko o kou ʻaʻa i nā mea kaupouna ʻano lua, i ka mea nui a me ka mea ʻuʻuku.

¹⁴ “ʻAʻole hoʻi ma kou hale nā ana ʻelua, ʻo ka mea nui, a me ka mea ʻuʻuku.

¹⁵ “E mālama ʻoe i ka pouna pono, a me ka pololei, a me ke ana pono a me ka pololei; i lōʻihi ai kou mau lā ma ka ʻāina a Iēhova kou Akua i hāʻawi mai ai iā ʻoe.

¹⁶ “No ka mea, ua hoʻowahāwahā ʻia e Iēhova nā mea a pau e hana ana i kēia mau mea, a me ka poʻe a pau e hana ana i ka mea pono ʻole.

¹⁷ ¶ “E hoʻomanaʻo i ka mea a ka ʻAmeleka i hana mai ai iā ʻoe ma ke ala i ko ʻoukou hele ʻana, mai ʻAigupita mai.

¹⁸ “I ko lākou hālāwai ʻana me ʻoe ma ke ala, a pepehi mai ma kou hope i nā mea nāwaliwali a pau ma hope ou, iā ʻoe i nāwaliwali ai, a i māloʻeloʻe ai; ʻaʻole lākou i makaʻu i ke Akua.

¹⁹ “No ia mea, aia hoʻomaha mai ʻo Iēhova kou Akua iā ʻoe mai kou poʻe ʻenemi a puni, ma ka ʻāina a Iēhova kou Akua i hoʻolilo mai ai nou, e hōkai loa aku ʻoe i ka ʻAmeleka ma lalo aʻe o ka lani; mai hoʻopoina ʻoe.