KA BUKE ʻALIMA A MOSE, I KAPA ʻIA KĀNĀWAI LUA 24 - Ka Baibala Hemolele

1 No ka hoʻohemo ʻana i ka wahine. 5 No ke kanaka i mare i ka wahine hou. 7 No ka ʻaihue kanaka. 8 No nā lēpero. 15 No nā kauā. 16 E make ke kanaka i kona hewa iho. 17 No ka malihini, a me ka mea makua ʻole, a me ka wahine kāne make. No nā ʻilihune.

MOKUNA XXIV.

¹ ¶ “Aia lawe ke kanaka i kekahi wahine a mare iā ia, a loaʻa ʻole i ka wahine ke aloha ʻia mai i mua o kona maka, no ka loaʻa i ke kāne kekahi kīnā o ka wahine; a laila e kākau kēlā i palapala e hemo ai ka wahine, a e hāʻawi aku ia mea ma kona lima, a e hoʻokuke aku iā ia i waho o kona hale.

² “A hala kēlā i waho o kona hale, e hele nō ia e lilo i wahine na kekahi kāne hou.

³ “Inā e inaina ke kāne hou iā ia, a kākau nāna i palapala no ka hemo ʻana, a e hāʻawi aku ia mea ma kona lima, a e hoʻokuke aku iā ia ma waho o kona hale; a i make paha ke kāne hou, nāna ia i lawe i wahine nāna;

⁴ ʻo kāna kāne ma mua, nāna ia i hoʻokuke aku, ʻaʻole e pono ia ke lawe hou iā ia i wahine nāna, ma hope mai o kona haumia ʻana; no ka mea, he mea hoʻopailua ʻia i mua o Iēhova: mai hana aku ʻoe i ka mea e hewa ai ka ʻāina a Iēhova kou Akua e hāʻawi mai ai i wahi e noho ai nou.

⁵ ¶ “Aia lawe ke kanaka i wahine hou nāna, mai hele aku ia me ka poʻe kaua, ʻaʻole hoʻi e kau ʻia ma luna ona kekahi hana; e noho kaʻawale ia ma kona wahi i hoʻokahi makahiki, a e hōʻoluʻolu aku i kāna wahine āna i lawe ai.

⁶ ¶ “Mai lawe ʻia ka mea wili palaoa i uku pānaʻi, ʻaʻole ka pōhaku kaʻa luna; no ka mea, ʻo ia ke lawe i ko ke kanaka mea e ola ai i uku pānaʻi.

⁷ ¶ “Inā e ʻike ʻia ke kanaka e ʻaihue ana i kekahi hoahānau ona o nā mamo a ʻIseraʻela, a hoʻolilo iā ia i kauā hoʻoluhi, a kūʻai lilo aku paha iā ia; a laila e make ua kanaka ʻaihue lā; a e hoʻolei aku ʻoe i ka ʻino mai waena aku o ʻoukou.

⁸ ¶ “E makaʻala i ka maʻi lēpera, e mālama pono, a e hana aku hoʻi i nā mea a pau a nā kāhuna, a kā Levi e aʻo mai ai iā ʻoukou; e like me kaʻu i kauoha aku ai iā lākou, pēlā ʻoukou e mālama ai, a e hana ai hoʻi.

⁹ “E hoʻomanaʻo i ka mea a Iēhova kou Akua i hana mai ai iā Miriama ma ke ala, i ko ʻoukou hele ʻana mai ʻAigupita mai.

¹⁰ ¶ “A i hāʻawi lilo ʻole ʻoe i kekahi mea i kou hoalauna, mai hele aku i loko o kona hale e kiʻi i kona uku pānaʻi.

¹¹ “Ma waho ʻoe e kū ai, a ʻo ke kanaka iā ia ka mea āu i hāʻawi lilo ʻole, nāna nō e lawe mai ma waho i ka uku pānaʻi iā ʻoe.

¹² “Inā he kanaka ʻilihune ia, mai hiamoe ʻoe me kona uku pānaʻi.

¹³ “E hoʻihoʻi nō i ka uku pānaʻi iā ia i ka napoʻo ʻana o ka lā; a e hiamoe ia me kona kapa, a e hoʻomaikaʻi mai ʻo ia iā ʻoe, a e lilo ia i pono nou i mua o Iēhova kou Akua.

¹⁴ ¶ “Mai ʻālunu ʻoe i ke kanaka hoʻolimalima ʻilihune, nele, ʻaʻole i kekahi o kou poʻe hoahānau, ʻaʻole hoʻi i kekahi o kou poʻe kānaka ʻē ma kou ʻāina, ma loko o kou mau ʻīpuka.

¹⁵ “I kona manawa nō, nāu e hāʻawi kona uku, ʻaʻole ke kali ʻana a napoʻo ka lā; no ka mea, ua ʻilihune ia, a ua manaʻo nui kona naʻau ma ia mea; malia o kāhea aku ʻo ia iā Iēhova nou, a e lilo ia i hewa nou.

¹⁶ ¶ “Mai make nā mākua no nā keiki, ʻaʻole hoʻi e make nā keiki no nā mākua; e make nō kēlā kanaka kēia kanaka no kona hewa iho.

¹⁷ ¶ “Mai hoʻokeʻekeʻe ʻoe i ka pono o ka malihini, ʻaʻole hoʻi i ke keiki makua ʻole, ʻaʻole hoʻi ʻoe e lawe i ke kapa ʻaʻahu o ka wahine kāne make i uku pānaʻi.

¹⁸ “Akā, e hoʻomanaʻo iho ʻoe he kauā hoʻoluhi ʻoe ma ʻAigupita, a na Iēhova kou Akua ʻoe i hoʻopakele aʻe ia wahi; no laila, ke kauoha aku nei au iā ʻoe e hana ia mea.

¹⁹ ¶ “Aia ʻoki iho ʻoe i kāu palaoa ma kāu mahina ʻai, a hoʻopoina ʻoe i kekahi pua ma ka mahina ʻai, mai hele hou ʻoe e kiʻi ia mea; na ka malihini nō ia, a na ka mea makua ʻole, a na ka wahine kāne make; i hoʻopōmaikaʻi mai ai ʻo Iēhova kou Akua iā ʻoe i nā hana a pau a kou mau lima.

²⁰ “Aia hahau aku ʻoe i kou lāʻau ʻoliva, mai huli hou ʻoe i nā lālā; na ka malihini nō ia, na ka mea makua ʻole, a na ka wahine kāne make.

²¹ “Aia hōʻiliʻili ʻoe i nā hua waina o kou pā waina, mai ʻohi ʻoe i ke koena ma hope ou; na ka malihini nō ia, na ka mea makua ʻole, a na ka wahine kāne make.

²² “E hoʻomanaʻo ʻoe, he kauā hoʻoluhi ʻoe ma ka ʻāina ʻo ʻAigupita; no laila ke kauoha aku nei au iā ʻoe e hana ia mea.