KA BUKE ʻALIMA A MOSE, I KAPA ʻIA KĀNĀWAI LUA 23 - Ka Baibala Hemolele

1 No nā kanaka pono ʻole ke komo i loko o ke anaina kanaka o Iēhova. 10 No ka hoʻomaʻemaʻe ʻana i kahi hoʻomoana. 22 No ka hoʻohiki ʻana. 25 No ka pā waina o ka hoalauna.

MOKUNA XXIII.

¹ ¶ “ʻAʻole e komo i loko o ke anaina kanaka o Iēhova ke kanaka i paopao ʻia a i ʻoki ʻia kona mea huna.

² “ʻAʻole e komo i loko o ke anaina kanaka o Iēhova ka mea poʻo ʻole, a hiki i ka ʻumi o kona hanauna ʻaʻole e komo i loko o ke anaina kanaka o Iēhova.

³ “ʻAʻole e komo i loko o ke anaina kanaka o Iēhova kā ʻAmora, a me kā Moaba, a hiki i ka ʻumi o ko lākou hanauna, ʻaʻole loa e komo i loko o ke anaina kanaka o Iēhova;

⁴ no ka mea, ʻaʻole lākou i hele mai i o ʻoukou lā me ka berena a me ka wai ma ke ala i ko ʻoukou hele ʻana, mai ʻAigupita mai; a no kā lākou uku ʻana aku iā Balaʻama, ke keiki a Beora o Petora ma Mesopotamia e kūʻē iā ʻoukou, a e hōʻino aku iā ʻoukou.

⁵ “ʻAʻole naʻe ʻo Iēhova kou Akua i hoʻolohe iā Balaʻama; akā, ua hoʻohuli aʻe ʻo Iēhova kou Akua i ka hōʻino i hoʻomaikaʻi nou; no ka mea, ua aloha ʻo Iēhova kou Akua iā ʻoe.

⁶ “Mai ʻimi ʻoe i ko lākou malu, ʻaʻole hoʻi i ko lākou pono i kou mau lā a pau.

⁷ ¶ “Mai hoʻowahāwahā ʻoe i kā ʻEdoma; no ka mea, ʻo ia kou hoahānau: mai hoʻowahāwahā i ko ʻAigupita; no ka mea, ua malihini ʻoe ma kona ʻāina.

⁸ “ʻO nā keiki i hānau na lākou i ka hanauna ʻekolu, e komo lākou i loko o ke anaina kanaka o Iēhova.

⁹ ¶ “A hele aku ka poʻe kaua e kūʻē i kou poʻe ʻenemi, e mālama iā ʻoe iho i nā mea ʻino a pau.

¹⁰ “Inā paha ma waena ou kekahi kanaka maʻemaʻe ʻole no ka haumia i hiki mai iā ia i ka pō, e hele ia i waho o kahi e hoʻomoana ai, ʻaʻole ia e hele mai i loko o kahi e hoʻomoana ai.

¹¹ “Aia i ka manawa e hiki mai ana ke ahiahi, e holoi iā ia iho i ka wai; a i ka napoʻo ʻana o ka lā, e hele mai ia i loko o kahi e hoʻomoana ai.

¹² “A e hoʻokaʻawale ʻoe i kauwahi nou ma waho o kahi hoʻomoana, i hele aku ai ʻoe ma laila;

¹³ a i wahi ʻōʻō nou kekahi mea kaua, a i kou hoʻomaha ʻana ma waho, e kōhi iho ʻoe me ia, a e huli hou nō e kanu ʻoe i ka mea e puka aku ana mai loko ou.

¹⁴ “No ka mea, e hele ana ʻo Iēhova kou Akua i waena o kou wahi e hoʻomoana ai e hoʻopakele iā ʻoe, a e hoʻolilo i kou poʻe ʻenemi i mua ou; no laila, i maʻemaʻe kou wahi e hoʻomoana ai, o ʻike mai auaneʻi ia i ka mea ʻino i loko ou, a huli aʻe ia mai ou aku lā.

¹⁵ ¶ “ʻO ke kauā i mahuka mai kona haku a i ou lā, mai hoʻihoʻi aku ʻoe iā ia i kona haku.

¹⁶ “E noho nō ia me ʻoe, ma waena ou, ma kahi āna e wae ai, ma kekahi o kou mau ʻīpuka āna e makemake ai; mai hoʻokaumaha ʻoe iā ia.

¹⁷ ¶ “ʻAʻole e noho kekahi o nā kaikamāhine o kā ʻIseraʻela i ka moekolohe; ʻaʻole e noho hoʻi kekahi o nā keiki kāne o kā ʻIseraʻela i ka moekolohe.

¹⁸ “Mai lawe ʻoe i loko o ka hale o Iēhova kou Akua i ka uku no ka wahine moekolohe, ʻaʻole hoʻi i ke kumu kūʻai no ka ʻīlio, no kekahi hoʻohiki ʻana; no ka mea, ua hoʻowahāwahā ʻia ia mau mea ʻelua e Iēhova kou Akua.

¹⁹ “Mai hāʻawi ʻaiʻē aku na kou hoahānau, no ka uku kuala hou ʻia mai, i uku kuala no ke kālā, a i uku kuala no ka ʻai, a i uku kuala no kekahi mea i hāʻawi ʻaiʻē ʻia aku no ka uku hou ʻia mai.

²⁰ “E pono e hāʻawi ʻaiʻē aku i ke kanaka ʻē i uku hoʻopaneʻe mai; akā, mai hāʻawi ʻaiʻē i kou hoahānau, i uku nui mai; i hoʻopōmaikaʻi mai ai ʻo Iēhova ʻo kou Akua iā ʻoe i nā mea a pau a kou lima e lawe ai ma ka ʻāina āu e hele aku nei e hoʻolilo ʻia nou.

²¹ ¶ “Aia hoʻohiki ʻoe i ka hoʻohiki ʻana iā Iēhova kou Akua, mai hoʻokaʻulua ʻoe i ka hoʻokō aku ia; no ka mea, e hoʻopaʻi ʻiʻo mai ʻo Iēhova kou Akua ia mea ma luna ou, a e lilo ia i hewa nou.

²² “Akā, inā ʻaʻole ʻoe e hoʻohiki, ʻaʻole e lilo ia i hewa nou.

²³ “ʻO ka mea a kou lehelehe i ʻōlelo aku ai e mālama ʻoe, a e hana hoʻi e like me kāu i hoʻohiki ai iā Iēhova kou Akua, i ka mōhai aloha a kou waha i ʻōlelo aku ai.

²⁴ ¶ “Inā paha e hele ʻoe ma ka māla waina o kou hoalauna, e ʻai iho ʻoe i nā hua waina, a māʻona ʻoe e like me kou makemake; akā, mai waiho i kekahi i loko o kāu ipu.

²⁵ “A i komo ʻoe i loko o ka māla palaoa a kou hoalauna e kū ana, e lālau ʻoe i ka hua ʻai me kou lima; akā, mai hoʻokomo i ka pahi kākiwi i loko o ka māla palaoa a kou hoalauna e kū ana.