KA BUKE ʻALIMA A MOSE, I KAPA ʻIA KĀNĀWAI LUA 22 - Ka Baibala Hemolele

1 No nā holoholona ʻauana a me nā waiwai hāʻule. 5 No ka lole komo o nā kāne a me nā wāhine. 22 No nā mea moekolohe.

MOKUNA XXII.

¹ ¶ “A ʻike aku ʻoe i ka bipi a kou hoahānau, a i kāna hipa paha e ʻauana ana, mai haʻalele ʻoe iā lākou; nāu nō lākou e hoʻihoʻi mai i kou hoahānau.

² “Inā ʻaʻole kokoke mai kou hoahānau iā ʻoe, a ua ʻike ʻole paha ʻoe iā ia, a laila ʻoe e lawe mai ia mea i kou hale iho, a e noho pū ia me ʻoe, a hiki i ka manawa e ʻimi mai ai kou hoahānau iā ia, a laila e hoʻihoʻi aku ʻoe ia mea iā ia.

³ “Pēlā kāu e hana aku ai i kona hoki, a pēlā hoʻi kāu e hana aku ai i kona kapa; a me nā mea a pau a kou hoahānau i hāʻule, a i nalowale iā ia, a i loaʻa iā ʻoe, pēlā hoʻi ʻoe e hana aku ai; ʻaʻole ʻoe e haʻalele aku.

⁴ “Inā e ʻike ʻoe i ka hoki, a i ka bipi paha a kou hoahānau i hāʻule iho ma ke ala, mai haʻalele aku ʻoe iā lākou, nāu nō ia e kōkua aku e hoʻāla hou aʻe.

⁵ ¶ “ʻAʻole e komo ka wahine i ke kapa o ke kāne, ʻaʻole hoʻi e komo ke kāne i ke kapa o ka wahine; no ka mea, ʻo nā mea a pau e hana ana pēlā, ua haumia lākou iā Iēhova kou Akua.

⁶ ¶ “A i ʻikea ka pūnana manu i mua ou ma ke ala, ma kekahi lāʻau, a ma ka honua paha, a he ʻohana paha, a he hua paha, a e hoʻomoe ana ka makua ma luna o nā ʻohana, a ʻo nā hua paha, mai lawe pū ʻoe i ka makua me nā keiki.

⁷ “E kuʻu aku nō ʻoe i ka makua, a e lawe i nā keiki nāu; i pōmaikaʻi ʻoe, i lōʻihi ai hoʻi kou mau lā.

⁸ ¶ “A i kūkulu ʻoe i hale hou, e hana aʻe i pā a puni ma luna iho, i hoʻoili ʻole mai ai ʻoe i ke koko ma luna o kou hale, ke hāʻule iho kekahi mai laila mai.

⁹ ¶ “Mai kanu ʻoe ma kou māla waina i nā hua kūʻē nā ʻano, o laʻa auaneʻi ka hua o kāu mea i kanu, a me ka hua o kou māla waina.

¹⁰ “Mai kaulua ʻoe i ka bipi a me ka hoki ma ka ʻōʻō palau.

¹¹ “Mai ʻaʻahu ʻoe i ke kapa kūʻē nā ʻano, ʻo ka hulu hipa i hui pū ʻia me ke olonā.

¹² ¶ “E hana ʻoe i pihapiha ma nā ʻaoʻao ʻehā o kou ʻaʻahu āu e ʻaʻahu ai.

¹³ ¶ “A i lawe kekahi kanaka i wahine nāna, a moe me ia, a i inaina iā ia,

¹⁴ “A ʻōlelo ʻino iā ia, a hoʻokaulana i kona inoa ma ka hewa, i ka ʻī ʻana aku, ‘Ua lawe au i kēia wahine, a i kuʻu hele ʻana i ona lā, ʻaʻole i loaʻa iaʻu ia he puʻupaʻa.’

¹⁵ “A laila e lawe ka makua kāne o ke kaikamahine, a me kona makuahine, a hali aku i nā hōʻailona puʻupaʻa o ke kaikamahine i nā lunakahiko o ke kūlanakauhale ma ka ʻīpuka.

¹⁶ “A e ʻōlelo aku ka makua kāne o ke kaikamahine i nā lunakahiko, ‘Hāʻawi akula au i kuʻu kaikamahine i wahine na kēia kanaka, a ua inaina mai ʻo ia iā ia.

¹⁷ ‘Aia hoʻi, ua ʻōlelo ʻino mai ʻo ia iā ia, i ka ʻī ʻana mai, “ʻAʻole i loaʻa iaʻu kāu kaikamahine, he puʻupaʻa”; akā, eia nā hōʻailona puʻupaʻa o kuʻu kaikamahine’; a e hohola aʻela lāua i ke kapa i mua o nā lunakahiko o ke kūlanakauhale.

¹⁸ “A e lawe nā lunakahiko o ia kūlanakauhale i kēlā kanaka a e hahau iā ia;

¹⁹ a e hoʻouku iā ia i hoʻokahi haneri sekela kālā, a e hāʻawi aku ia no ka makua kāne o ke kaikamahine; no ka mea, ua hoʻokaulana aku ia i ka inoa o ka wahine puʻupaʻa o kā ʻIseraʻela ma ka hewa; a e lilo ia i wahine nāna; ʻaʻole ia e hoʻokuke aku iā ia i kona mau lā a pau.

²⁰ “Akā, inā he ʻoiaʻiʻo kēia mea, ʻaʻole i loaʻa nā hōʻailona puʻupaʻa no ke kaikamahine;

²¹ a laila e lawe mai lākou i ke kaikamahine i waho o ka puka hale o kona makua kāne, a e hailuku aku nā kānaka o ia kūlanakauhale iā ia i ka pōhaku e make ia; no ka mea, ua hana ʻino ia i loko o kā ʻIseraʻela, ua moekolohe i loko o ka hale o kona makua kāne; a e lawe aku ʻoe i ka hewa mai ou aku lā.

²² ¶ “A i loaʻa ke kanaka e moe ana me ka wahine i mare ʻia na ke kāne, a laila e make lāua a ʻelua, ʻo ke kāne i moe pū me ka wahine, lāua ʻo ka wahine. Pēlā ʻoe e hemo aku ai i ka ʻino mai kā ʻIseraʻela aku.

²³ ¶ “ʻO ke kaikamahine puʻupaʻa i hoʻopalau ʻia na ke kāne, a loaʻa ʻo ia i ke kanaka ma loko o ke kūlanakauhale, a moe pū me ia;

²⁴ a laila e kaʻi aku ʻoukou iā lāua a ʻelua ma ka ʻīpuka o ke kūlanakauhale, a e hailuku ʻoukou iā lāua i ka pōhaku, a make lāua; ʻo ke kaikamahine no kona hoʻōho ʻole ʻana; a ʻo ke kanaka no kona hoʻohaʻahaʻa ʻana i ka wahine a kona hoalauna; pēlā ʻoukou e hemo aku ai i ka ʻino mai waena aku o ʻoukou.

²⁵ “Akā, a i loaʻa i ke kanaka ma ke kula kekahi kaikamahine i hoʻopalau ʻia, a hoʻopaʻa iho ʻo ia iā ia, a moe pū me ia; a laila, ʻo ke kanaka wale nō i moe me ia ke make.

²⁶ “Akā, mai mea iki aku ʻoe i ke kaikamahine; ʻaʻohe ona hewa e make ai; no ka mea, e like me ke kanaka i kūʻē i kona hoalauna, a pepehi iho iā ia, pēlā hoʻi kēia mea.

²⁷ “No ka mea, ua loaʻa ʻo ia iā ia ma ke kula, a ua hoʻōho akula ua kaikamahine lā i hoʻopalau ʻia, ʻaʻole naʻe he mea nāna ia e hoʻopakele.

²⁸ ¶ “A i loaʻa i ke kanaka ke kaikamahine puʻupaʻa i hoʻopalau ʻole ʻia, a lālau aku ia iā ia, a moe me ia, a ua loaʻa pono lāua;

²⁹ a laila e uku aku ke kanaka i moe me ia i kanalima sekela na ka makua kāne o ua kaikamahine lā, a e lilo ia i wahine nāna; no kona hoʻohaʻahaʻa ʻana iā ia, ʻaʻole ia e hoʻokuke aku iā ia a pau nā lā ona.

³⁰ ¶ “Mai lawe ke kanaka i ka wahine a kona makua kāne, ʻaʻole hoʻi e wehe i ke kapa o kona makua kāne.