KA BUKE ʻALIMA A MOSE, I KAPA ʻIA KĀNĀWAI LUA 21 - Ka Baibala Hemolele

1 Ke kānāwai no ka mea i pepehi ʻia a make ma ke kula, a ʻike ʻole ʻia ka mea nāna i pepehi ʻia. 10 No ka mare ʻana o ke kanaka o kā ʻIseraʻela me ka wahine pio. 15 No ke keiki kāne hiapo. 18 E hailuku ʻia ke keiki kāne hoʻokuli. 22 No ke kanaka kāʻawe ʻia.

MOKUNA XXI.

¹ ¶ “Inā ma ka ʻāina a Iēhova kou Akua i hāʻawi mai ai iā ʻoe, a lilo ia nou, i loaʻa ka mea i pepehi ʻia e waiho ana ma ke kula, ʻaʻole i ʻike ʻia ka mea nāna i pepehi;

² a laila e hele mai kou poʻe lunakahiko a me kou poʻe luna kānāwai, a e ana aku lākou a hiki i nā kūlanakauhale e puni ana i ka mea i pepehi ʻia.

³ “A ʻo ke kūlanakauhale kokoke i ka mea i pepehi ʻia, ʻo nā lunakahiko o ia kūlanakauhale e lawe lākou i ka bipi wahine hou i hoʻohana ʻole ʻia, ʻaʻole hoʻi i kauō i loko o ka ʻauamo.

⁴ “A ʻo nā lunakahiko o ia kūlanakauhale e alakaʻi aku i ka bipi wahine hou ma ke kahawai e kahe mau ana, ma kahi mahi ʻole ʻia, ʻaʻole hoʻi i lūlū ʻia, a ma laila lākou e ʻoki ai i ke poʻo o ua bipi wahine lā ma ke kahawai.

⁵ “A ʻo nā kāhuna, nā mamo a Levi e hoʻokokoke mai; no ka mea, ua wae mai ʻo Iēhova kou Akua iā lākou e lawelawe nāna, a e hoʻomaikaʻi aku ma ka inoa ʻo Iēhova, aia nō iā lākou ka ʻōlelo no nā hakakā a me nā hahau ʻana a pau.

⁶ “A ʻo nā lunakahiko a pau o ke kūlanakauhale e kokoke ana i ka mea i pepehi ʻia e holoi i ko lākou lima ma luna o ka bipi wahine i ʻoki ʻia ʻo kona poʻo ma ke kahawai.

⁷ “A e ʻōlelo mai lākou, e ʻī mai, ‘ʻAʻole ko mākou lima i hoʻokahe i kēia koko, ʻaʻole hoʻi i ʻike ko mākou maka.

⁸ ‘E Iēhova, e kala mai i kou poʻe kānaka, i kā ʻIseraʻela āu i hoʻōla ai, a mai hoʻopaʻi i ke koko hala ʻole ma luna o kou poʻe kānaka o kā ʻIseraʻela’; a e kala ʻia ke koko no lākou.

⁹ “A pēlā e huikala aku ai ʻoe i ke koko hala ʻole mai ou aku lā; no ka mea, ua hana ʻoe i ka pono i mua o Iēhova.

¹⁰ ¶ “Aia hele aku ʻoe e kaua aku i kou poʻe ʻenemi, a e hoʻolilo mai ʻo Iēhova kou Akua iā lākou i loko o kou lima, a e lawe pio aku ʻoe iā lākou,

¹¹ a ʻike aku ʻoe i wahine maikaʻi i waena o ka poʻe pio, a makemake ʻoe e lawe iā ia i wahine nāu;

¹² a laila e lawe ʻoe iā ia ma kou hale; a e ʻako iho ʻo ia i kona poʻo, a e ʻoki hoʻi i kona māiʻuʻu.

¹³ “A e waiho aku ia i ka ʻaʻahu pio mai ona aku lā, a e noho ia ma kou hale, a e uē iho ia i kona makua kāne, a me kona makuahine i hoʻokahi malama; a ma hope aku e komo aku ʻoe i loko i ona lā e lilo i kāne nāna, a e lilo ia i wahine nāu.

¹⁴ “A inā ʻaʻole ʻoe e makemake iā ia, e kuʻu aku ʻoe iā ia e hele i kona wahi e makemake ai; mai kūʻai aku ʻoe iā ia no ke kālā, ʻaʻole hoʻi ʻoe e hoʻolilo iā ia i waiwai nāu; no ka mea, ua hoʻohaʻahaʻa ʻoe iā ia.

¹⁵ ¶ “Inā ʻelua wāhine a kekahi kanaka, ua aloha ʻia kekahi, ua aloha ʻole ʻia kekahi, a ʻo ka mea aloha ʻia, a me ka mea aloha ʻole ʻia i hānau keiki nāna; a inā na ka wahine aloha ʻole ʻia ka makahiapo;

¹⁶ a laila, i ka manawa e hoʻoili ai ʻo ia i kona waiwai i kāna mau keiki kāne, ʻaʻole ia e hāʻawi i kā ka hānau mua na ke keiki a ka mea aloha ʻia ma mua o ke keiki a ka mea aloha ʻole ʻia, ʻo ia ka hiapo maoli.

¹⁷ “Akā, e hoʻolilo ia i ke keiki kāne a ka mea aloha ʻole ʻia i hiapo, a e hāʻawi pāpālua iā ia ʻo kona loaʻa a pau; no ka mea, ʻo ia ka mua o kona ikaika, a nona ka pono o ka hānau mua.

¹⁸ ¶ “A ʻo ke kanaka iā ia ke keiki hewa, paʻakikī, ʻaʻole he hoʻolohe i ka leo o kona makua kāne, a me ka leo o kona makuahine, a iā lāua i aʻo aku ai iā ia, ʻaʻole ia i maliu mai iā lāua;

¹⁹ a laila e lālau aku kona makua kāne a me kona makuahine iā ia, a e lawe aku iā ia i nā lunakahiko o kona kūlanakauhale, a i ka ʻīpuka o kona wahi.

²⁰ “A e ʻōlelo aku i nā lunakahiko o kona kūlanakauhale, ‘Ua hewa, a ua paʻakikī kēia keiki a māua, ʻaʻole ia i hoʻolohe i ko māua leo, ua pākela ʻai, a ua ʻona.’

²¹ “A ʻo nā kānaka a pau o kona kūlanakauhale e hailuku iā ia i ka pōhaku e make ia; a e lawe aku ʻoe i ka hewa mai ou aku lā; a e hoʻolohe kā ʻIseraʻela a pau a e makaʻu hoʻi.

²² ¶ “Inā e hana hewa kekahi kanaka i pono ai ke make, a e pepehi ʻia ʻo ia, a e kau aku ʻoe iā ia ma luna o ka lāʻau;

²³ ʻaʻole e waiho i kona kino a ao ka pō ma luna o ka lāʻau; akā, e kanu nō iā ia ia lā, (no ka mea, ua hōʻino ʻia e ke Akua ka mea i kaulia,) i haumia ʻole ai kou ʻāina a Iēhova kou Akua i hāʻawi lilo mai ai i wahi e noho ai nou.