KA BUKE ʻALIMA A MOSE, I KAPA ʻIA KĀNĀWAI LUA 20 - Ka Baibala Hemolele

1 Ka ʻōlelo a ke kahuna i ka poʻe koa ma mua o ka hele ʻana i ke kaua. 5 E hoʻokaʻawale nā luna koa i poʻe pono ʻole ke hele i ke kaua. 10 Ka mea e hana ʻia aku i nā kūlanakauhale i ʻae mai, a me nā mea i ʻae ʻole mai i ka mea e malu ai.

MOKUNA XX.

¹ ¶ “Aia hele ʻoe e kaua aku i kou poʻe ʻenemi, a ʻike aku i nā lio a me nā hale kaʻa, a i nā kānaka he nui aku i kou, mai makaʻu iā lākou; no ka mea, me ʻoe nō ʻo Iēhova ʻo kou Akua, nāna ʻoe i lawe mai nei mai ka ʻāina ʻo ʻAigupita mai.

² “A kokoke ʻoukou e hoʻouka, a laila e hoʻokokoke mai ke kahuna, a e ʻōlelo aku i nā kānaka,

³ “E ʻī aku iā lākou, ‘E hoʻolohe, e kā ʻIseraʻela: ke hoʻokokoke ʻoukou i kēia lā e kaua aku i ko ʻoukou poʻe ʻenemi; mai hoʻonāwaliwali ʻia ko ʻoukou naʻau, mai makaʻu, mai pīhoihoi, mai weliweli iā lākou;

⁴ no ka mea, ʻo Iēhova ko ʻoukou Akua, ʻo ia ke hele me ʻoukou e kaua aku no ʻoukou i ko ʻoukou poʻe ʻenemi, a e hoʻopakele iā ʻoukou.’

⁵ “A e ʻōlelo aku nā luna i nā kānaka, i ka ʻī ʻana aku, ‘ʻO wai ke kanaka i kūkulu i hale hou, ʻaʻole naʻe i hoʻolilo aku? E hele ia a hoʻi aku i kona hale, o make auaneʻi ia i ke kaua, a ʻo ke kanaka ʻē ke hoʻolilo aku ia.

⁶ ‘ʻO wai lā ke kanaka i kanu i ka māla waina, ʻaʻole naʻe i ʻohi i ka hua? E hele ia, a hoʻi aku i kona hale, o make auaneʻi ia i ke kaua, a e ʻohi ke kanaka ʻē i ka hua.

⁷ ‘ʻO wai ke kanaka i hoʻopalau i ka wahine, ʻaʻole naʻe i lawe iā ia? E hele nō ia, a hoʻi aku i kona hale, o make auaneʻi ia i ke kaua, a e lawe ke kanaka ʻē iā ia.’

⁸ “A e ʻōlelo hou nā luna i nā kānaka, a e ʻī aku, ‘ʻO wai lā ke kanaka makaʻu a nāwaliwali ma ka naʻau? E hele nō ia, a e hoʻi aku i kona hale, o heʻe auaneʻi ka naʻau o kona poʻe hoahānau e like me kona naʻau.’

⁹ “A pau ka ʻōlelo a nā luna i nā kānaka, a laila e hoʻonoho lākou i nā luna o ke kaua i alakaʻi no nā kānaka.

¹⁰ ¶ “Aia hoʻokokoke aku ʻoe i ke kūlanakauhale e kaua aku iā ia, e haʻi aku ʻoe i ka mea e malu ai ia.

¹¹ “A inā i ʻae mai ia i ka mea e malu ai, a wehe mai ia nou, a laila e lilo nā kānaka a pau i loaʻa ma laila i mea hoʻokupu nāu, a e hoʻokauā mai lākou nāu.

¹² “A i ʻole ia e ʻae mai i ka mea e malu ai me ʻoe; akā, e hana mai ia i ke kaua me ʻoe, a laila ʻoe e hoʻopuni aku ai iā ia.

¹³ “Aia hoʻolilo mai ʻo Iēhova kou Akua iā ia i loko o kou lima, a laila e luku ʻoe i nā kāne a pau o ia wahi me ka maka o ka pahi kaua.

¹⁴ “Akā, ʻo nā wāhine a me nā kamaliʻi, a me nā holoholona, a me nā mea a pau i loko o ke kūlanakauhale, a me kona waiwai pio a pau, e lawe pio ʻoe ia mau mea nāu; a e ʻai iho ʻoe i ka waiwai pio o kou poʻe ʻenemi a Iēhova kou Akua i hāʻawi mai ai iā ʻoe.

¹⁵ “Pēlā ʻoe e hana aku ai i nā kūlanakauhale a pau i mamao loa aku iā ʻoe, ʻaʻole no nā kūlanakauhale o kēia mau lāhui kanaka.

¹⁶ “Akā, ʻo nā kūlanakauhale o kēia poʻe kānaka a Iēhova kou Akua i hāʻawi mai ai nou, mai hoʻōla ʻoe i kekahi mea e hanu ana.

¹⁷ “E luku loa aku iā lākou: i kā Heta, i kā ʻAmora, i kā Kanaʻana, i kā Pereza, i kā Heva, a me kā Iebusa, e like me kā Iēhova kou Akua i kauoha mai ai iā ʻoe;

¹⁸ o aʻo mai auaneʻi lākou iā ʻoukou e hana aku e like me kā lākou mea haumia i hana aku ai lākou i ko lākou mau akua; a e hana hewa ʻoukou iā Iēhova i ko ʻoukou Akua.

¹⁹ ¶ “Inā e lōʻihi kou hoʻopilikia ʻana i kekahi kūlanakauhale i ke kaua ʻana aku e hoʻopio iā ia, mai luku wale ʻoe i kona lāʻau i ka hahau ʻana ia mea i ke koʻi lipi; no ka mea, e ʻai paha ʻoe i kona, mai kua i lalo ʻoe ia mea, i mea e pono ai ke kaua ʻana; no ka mea, no ke kanaka ka lāʻau o ke kula.

²⁰ “ʻO ka lāʻau āu i ʻike ai ʻaʻole he lāʻau ʻai, ʻo ia wale nō kāu e luku aku, a e kua i lalo, a kūkulu iho me ia i pā kaua no ke kūlanakauhale i kaua mai ai iā ʻoe, a hiolo ia.