KA BUKE ʻALIMA A MOSE, I KAPA ʻIA KĀNĀWAI LUA 2 - Ka Baibala Hemolele

1 Ka ʻōlelo a Iēhova iā Mose no nā mamo a ʻEsau, a no kā Moaba, 24 a no ke kaua ʻana o Sihona me kā ʻIseraʻela.

MOKUNA II.

¹ ¶ “A laila huli aʻela kākou, a hele akula i ka wao nahele ma ke ala o ke Kai ʻUla, e like me kā Iēhova i kauoha mai ai iaʻu; a hoʻopuni aʻela kākou i ka mauna ʻo Seira i nā lā he nui.

² “ʻŌlelo maila ʻo Iēhova iaʻu, ʻī maila,

³ ‘Ua lōʻihi ko ʻoukou hoʻopuni ʻana i kēia mauna; e huli aʻe ʻoukou ma ke kūkulu ʻākau.

⁴ ‘A e kauoha aku ʻoe i nā kānaka, penei, “E hele ana ʻoukou ma ka mokuna o ko ʻoukou poʻe hoahānau, ʻo nā mamo a ʻEsau e noho ana ma Seira; a e makaʻu mai auaneʻi lākou iā ʻoukou; no laila e mālama nui ʻoukou iā ʻoukou iho.

⁵ “Mai hakakā ʻoukou me lākou; no ka mea, ʻaʻole au e hāʻawi aku i kekahi o ko lākou ʻāina no ʻoukou, ʻaʻole i kekahi kapuaʻi; no ka mea, ua hāʻawi aku au i ka mauna ʻo Seira i wahi e noho ai no ʻEsau.

⁶ “E kūʻai ʻoukou i kā lākou ʻai i ke kālā, i ʻai ai ʻoukou; a e kūʻai hoʻi ʻoukou i ko lākou wai i ke kālā, i inu ai ʻoukou.

⁷ “No ka mea, ua hoʻopōmaikaʻi mai ʻo Iēhova kou Akua iā ʻoe ma nā hana a pau a kou lima; ua ʻike nō ia i kou hele ʻana ma kēia wao nahele nui; me ʻoe nō ʻo Iēhova kou Akua i nēia mau makahiki he kanahā; ʻaʻole ʻoe i nele i kekahi mea.”’

⁸ ¶ “A iā kākou i māʻalo aʻe mai ko kākou poʻe hoahānau aku, nā mamo a ʻEsau, e noho ana ma Seira, ma ke ala o ka pāpū mai ʻElata aku, a mai ʻEziona Gebera, huli aʻe kākou a hele i ke ala ma ka wao nahele ʻo Moaba.

⁹ “ʻŌlelo maila ʻo Iēhova iaʻu, ‘Mai hana ʻino aku i ko Moaba, ʻaʻole e kūʻē iā lākou i ke kaua ʻana; ʻaʻole au e hāʻawi i ko lākou ʻāina i wahi e noho ai no ʻoukou; no ka mea, ua hāʻawi aku au iā ʻAra i wahi e noho ai no nā mamo a Lota.’”

¹⁰ I ka manawa ma mua i noho ai ka poʻe ʻEmima ma laila, he poʻe nunui a lehulehu, he poʻe lōʻihi e like me ka poʻe ʻAnakima.

¹¹ Ua manaʻo ʻia lākou, he poʻe kānaka nunui e like me ka poʻe ʻAnakima; akā, ua kapa ʻia lākou e ko Moaba, he poʻe ʻEmima.

¹² I ka manawa ma mua i noho ai ka poʻe Horima ma Seira; akā, na nā mamo a ʻEsau i hoʻokuke aku lākou, a luku i ua poʻe lā i mua o lākou, a noho ihola ma ko lākou lā wahi; e like me kā ʻIseraʻela i hana aku ai i ka ʻāina o ko lākou wahi i noho ai a Iēhova i hāʻawi mai ai no lākou.

¹³ “ʻʻĀnō hoʻi, e kū i luna, a e hele aku ma kēlā ʻaoʻao o ke kahawai ʻo Zareda.’ A hele aku kākou ma kēlā ʻaoʻao o ke kahawai ʻo Zareda.

¹⁴ “A ʻo nā makahiki o ko kākou hele ʻana mai Kadesa Banea mai, a hiki kākou ma ke kahawai ʻo Zareda, he kanakolu ia a me kumamāwalu; a pau ka hanauna a pau o nā kānaka koa i ka nalowale i waena o ka poʻe kaua, e like me kā Iēhova i hoʻohiki ai iā lākou.

¹⁵ “No ka mea, kūʻē maila ka lima o Iēhova iā lākou e luku iā lākou mai loko aku o ka poʻe kaua, a pau lākou i ka make.

¹⁶ ¶ “A i ka manawa i pau ai nā kānaka koa i ka luku ʻia, a i ka make i waena o nā kānaka,

¹⁷ “ʻŌlelo maila ʻo Iēhova iaʻu, ʻī maila,

¹⁸ ‘E hele ana ʻoe i ka mokuna ʻo Moaba i ʻAra i kēia lā.

¹⁹ ‘A hiki aku ʻoe a kokoke i nā mamo a ʻAmona, mai hana ʻino aku iā lākou, ʻaʻole hoʻi e hakakā aku me lākou; ʻaʻole au e hāʻawi i wahi e noho ai nou ma ka ʻāina o nā mamo a ʻAmona; no ka mea, ua hāʻawi aku au ia i wahi e noho ai no nā mamo a Lota.’”

²⁰ (Ua manaʻo ʻia hoʻi ia he ʻāina kanaka nunui; ʻo nā kānaka nunui i noho ai ma laila i ka manawa kahiko, a ua kapa ʻia lākou e kā ʻAmona, he Zamezumima;

²¹ he poʻe kānaka nunui, a lehulehu, a lōʻihi, e like me nā ʻAnakima; akā, na Iēhova lākou i luku aku i mua o lākou, a hoʻokuke aku lākou ia poʻe, a noho ihola ma ko lākou wahi;

²² e like me kāna i hana aku ai no nā mamo a ʻEsau e noho ana ma Seira, iā ia i luku ai i ka poʻe Horima i mua o lākou; hoʻokuke akula lākou ia poʻe, a noho ihola ma ko lākou wahi, a hiki i kēia lā.

²³ A ʻo ko ʻAva e noho ana ma Hazerima a hiki i ʻAza, na ko Kapetora, mai Kapetora mai, i luku aku lākou, a noho ihola ma ko lākou lā wahi.)

²⁴ “ʻE kū ʻoukou i luna, e hele aku, a hiki ma kēlā kapa o ke kahawai ʻo ʻArenona; aia hoʻi, ua hāʻawi aku au iā Sihona no kā ʻAmora, ke aliʻi o Hesebona, a me kona ʻāina i loko o kou lima; e hoʻomaka ʻoe e komo, a e kūʻē aku iā ia i ke kaua.

²⁵ ʻI kēia lā e hoʻomaka ai au e kau i ka makaʻu iā ʻoe, a me ka weliweli iā ʻoe, ma luna o nā lāhui kanaka ma lalo aʻe o ka lani a pau, ka poʻe i lohe i kou kaulana ʻana, a e haʻalulu lākou, a e pilihua auaneʻi nou.’

²⁶ ¶ “A hoʻouna akula au i nā ʻelele mai ka wao nahele ʻo Kedemota aku i o Sihona lā, ke aliʻi o Hesebona, me ka ʻōlelo aloha, ʻī akula,

²⁷ ‘E ʻae mai ʻoe iaʻu e hele au ma kou ʻāina; e hele au ma ke ala loa, ʻaʻole au e kāpae ma ka ʻākau, ʻaʻole hoʻi ma ka hema.

²⁸ ‘E kūʻai mai ʻoe i ʻai naʻu no ke kālā, i ʻai iho ai au; a e hāʻawi mai i wai noʻu no ke kālā, i inu ai hoʻi au; e hele wāwae wale nō au;

²⁹ (e like me nā mamo a ʻEsau, e noho ana ma Seira, a me ko Moaba e noho ana ma ʻAra i hana mai ai iaʻu); a hiki aku au ma kēlā kapa o Ioredane, ma ka ʻāina a Iēhova ko mākou Akua i hāʻawi mai ai iā mākou.’

³⁰ “Akā, ʻaʻole i ʻae mai ʻo Sihona, ke aliʻi o Hesebona, e hele kākou ma ona lā; no ka mea, hoʻopaʻakikī maila ʻo Iēhova kou Akua i kona naʻau, a hoʻokūʻē ʻo ia i kona manaʻo, i hoʻolilo ai ʻo ia iā ia i loko o kou lima, e like me ia i kēia lā.

³¹ “A ʻōlelo mai ʻo Iēhova iaʻu, ‘Aia hoʻi, ua hoʻomaka iho nei au e hoʻolilo iā Sihona, a me kona ʻāina iā ʻoe; e komo ʻoe, i lilo ai kona ʻāina iā ʻoe.’

³² ¶ “A laila hele kūʻē maila ʻo Sihona iā kākou, ʻo ia a me kona poʻe kānaka a pau, i ke kaua ma Iahaza.

³³ “A hoʻolilo mai ʻo Iēhova ko kākou Akua iā ia i mua o kākou, a luku akula kākou iā ia, a me kāna mau keiki, a me kona poʻe kānaka a pau.

³⁴ “A hoʻopio akula kākou i kona mau kūlanakauhale a pau, a luku aku i nā kānaka o nā kūlanakauhale a pau, a me nā wāhine a me nā kamaliʻi, ʻaʻole kākou i hoʻokoe i kekahi.

³⁵ “ʻO nā holoholona wale nō kā kākou i lawe pio ai na kākou, a me ka waiwai o nā kūlanakauhale, ʻo ia kā kākou i lawe.

³⁶ “Mai ʻAroera ma kapa o ke kahawai ʻo ʻArenona, a me ke kūlanakauhale ma ke kahawai a hiki i Gileada, ʻaʻole kekahi kūlanakauhale i lanakila ma luna o kākou; na Iēhova ko kākou Akua i hoʻolilo mai nā mea a pau iā kākou.

³⁷ “ʻAʻole naʻe ʻoe i hele ma ka ʻāina o nā mamo a ʻAmona, ʻaʻole hoʻi ma nā wahi o ke kahawai ʻo Iaboka, ʻaʻole hoʻi ma nā kūlanakauhale o nā mauna, ʻaʻole hoʻi ma kekahi wahi a Iēhova ko kākou Akua i pāpā mai ai iā kākou.”