KA BUKE ʻALIMA A MOSE, I KAPA ʻIA KĀNĀWAI LUA 19 - Ka Baibala Hemolele

1 ʻO ke kānāwai no na kūlanakauhale puʻuhonua. 14 ʻAʻole e hoʻopaneʻe ʻia aku nā palena ʻāina. 15 ʻElua mea hōʻike i pono ai. 16 No ka mea hōʻike wahaheʻe.

MOKUNA XIX.

¹ ¶ “Aia hoʻopau ʻo Iēhova kou Akua i nā lāhui kanaka, no lākou ka ʻāina a Iēhova kou Akua e hāʻawi mai ai nou, a lilo ko lākou wahi nou, a e noho iho ʻoe ma ko lākou kūlanakauhale, a ma loko hoʻi o ko lākou mau hale;

² a laila e hoʻokaʻawale ʻoe i nā kūlanakauhale ʻekolu nou i waena o kou ʻāina a Iēhova kou Akua e hāʻawi lilo mai ai nou.

³ “E hoʻomākaukau i alanui nou, a ʻo kou ʻāina a Iēhova kou Akua i hoʻolilo mai ai nou, ʻo kāu ia e mahele i nā mokuna ʻekolu, i holo ai nā pepehi kanaka a pau i laila.

⁴ ¶ “Eia ke ʻano o ka pepehi kanaka e holo ai i laila i ola ia: ʻo ka mea pepehi i kona hoalauna me ka ʻike ʻole, ʻaʻole ia i inaina aku iā ia ma mua;

⁵ a ʻo ka mea e hele aku i ka ulu lāʻau me kona hoalauna e kua lāʻau, a hahau iho kona lima me ke koʻi lipi e ʻoki i ka lāʻau, a hemo akula ke koʻi lipi mai ke ʻau aku, a pā i kona hoalauna a make ia, e holo aku ia i kekahi o ia mau kūlanakauhale, a ola;

⁶ o hahai auaneʻi ka hoʻopaʻi koko ma hope o ka pepehi kanaka i kona wā e ukiuki ai kona naʻau; no ka mea, ua lōʻihi ke ala, a pepehi iā ia; ʻaʻole naʻe ona hewa e make ai; no ka mea, ʻaʻole ia i inaina aku iā ia ma mua.

⁷ “No ia mea, ke kauoha aku nei au iā ʻoe, i ka ʻī ʻana aku, ‘E hoʻokaʻawale nou i nā kūlanakauhale ʻekolu.’

⁸ “Inā e hoʻopālahalaha ʻo Iēhova kou Akua i kou mokuna e like me kāna i hoʻohiki ai i kou mau kūpuna, a hāʻawi iā ʻoe i ka ʻāina a pau āna i ʻōlelo ai e hāʻawi i kou mau kūpuna;

⁹ inā paha ʻoe e mālama i kēia mau kauoha a pau e hana aku ia mea aʻu e kauoha aku nei iā ʻoe i kēia lā, e aloha aku iā Iēhova kou Akua, a e hele ma kona ʻaoʻao i nā lā a pau, a laila e hoʻokaʻawale ʻoe nou i nā kūlanakauhale hou ʻekolu me kēlā mau mea ʻekolu;

¹⁰ i ʻole e hoʻokahe ʻia ke koko hala ʻole i loko o kou ʻāina a Iēhova kou Akua i hoʻolilo mai ai nou, a ma luna ou ke koko.

¹¹ ¶ “Akā, inā e inaina aku kekahi kanaka i kona hoalauna, a hālua iā ia, a popoʻi iā ia, a hahau iā ia a make ia, a holo aku ia i loko o kekahi o kēia mau kūlanakauhale:

¹² a laila e hoʻouna aku nā lunakahiko o kona kūlanakauhale, a e lawe iā ia mai laila mai, a hāʻawi aku iā ia i loko o ka lima o ka mea hoʻopaʻi koko, i make ai ʻo ia.

¹³ “Mai minamina kou maka iā ia; akā, e huikala aku ʻoe i ke koko hala ʻole mai kā ʻIseraʻela aku, i pōmaikaʻi ai ʻoe.

¹⁴ ¶ “Mai hoʻoneʻe aku ʻoe i ka palena ʻāina o kou hoalauna a ka poʻe kahiko i hoʻonoho ai ma kou ʻāina, āu i loaʻa ai ma ka ʻāina a Iēhova kou Akua e hoʻolilo mai ai nou.

¹⁵ ¶ “Mai kū mai ka mea hōʻike hoʻokahi i ke kanaka, no kekahi hala, a no kekahi hewa i nā hewa a pau āna i hana hewa ai; ma ka waha o nā mea hōʻike ʻelua, a ʻo nā mea hōʻike ʻekolu paha, e hoʻokūpaʻa ʻia ai ia mea.

¹⁶ “Inā paha e kū mai ka mea hōʻike hewa i kekahi kanaka, a hōʻike wahaheʻe iā ia;

¹⁷ “A laila, ʻo lāua, nā mea hoʻopaʻapaʻa, e kū i mua o Iēhova, i mua o nā kāhuna a me nā luna kānāwai e noho ana ia manawa.

¹⁸ “A e ʻimi pono nā luna kānāwai; aia hoʻi, he wahaheʻe ka mea nāna i hōʻike, a ua hōʻike wahaheʻe i kona hoahānau;

¹⁹ a laila e hana aku ʻoukou iā ia e like me kāna i manaʻo ai e hana aku i kona hoahānau; a e lawe aku ʻoe i ka hewa mai ou aku lā.

²⁰ “A e hoʻolohe ka poʻe i koe, a makaʻu hoʻi, ʻaʻole e hana hou lākou e like me kēia hewa i waena o ʻoukou.

²¹ “Mai minamina kou maka; he ola no ke ola; he maka no ka maka; he niho no ka niho; he lima no ka lima; he wāwae no ka wāwae.