KA BUKE ʻALIMA A MOSE, I KAPA ʻIA KĀNĀWAI LUA 17 - Ka Baibala Hemolele

1 No nā mōhai. 5 E pepehi ʻia ka mea mālama i nā kiʻi. 14 No ka hoʻonoho i aliʻi ma luna o lākou, a me nā mea e pono ai iā ia ke hana.

MOKUNA XVII.

¹ ¶ “Mai kaumaha aku ʻoe iā Iēhova kou Akua i ka bipi kāne a i ka hipa paha, inā he wahi mea kīnā iki kona, a he wahi mea ʻino paha; no ka mea, he mea hoʻowahāwahā ʻia e Iēhova kou Akua.

² ¶ “Inā paha i loaʻa i waena o ʻoukou ma kou mau ʻīpuka a Iēhova kou Akua i hāʻawi mai ai iā ʻoe, he kanaka, he wahine paha, i hana hewa i mua o Iēhova kou Akua i ka pale aku i kāna berita,

³ a ua hele aku ia, a ua mālama aku i nā akua ʻē, a ua hoʻomana aku iā lākou, i ka lā paha, i ka mahina paha, a i kekahi paha o ko ka lani mau mea, aʻu i kauoha ʻole aku ai;

⁴ a ua haʻi ʻia iā ʻoe, a ua lohe, a ua nīnau pono ʻoe, aia hoʻi, he ʻoiaʻiʻo nō ia, ua hana ʻia kēia mea ʻino i loko o kā ʻIseraʻela;

⁵ a laila e lawe mai ʻoe i kēlā kanaka, a i kēlā wahine paha, i ka mea nāna i hana kēia mea hewa, ma kou mau ʻīpuka, i ke kanaka, i ka wahine paha, a e hailuku iā lākou i ka pōhaku a make lākou.

⁶ “Ma ka waha o nā mea hōʻike ʻelua, ʻekolu paha mea hōʻike, e pepehi ʻia aku ai ka mea pono no ka make; ʻaʻole e pepehi ʻia ʻo ia a make ma ka waha o ka mea hōʻike hoʻokahi.

⁷ “ʻO nā lima o nā mea hōʻike ke kau mua ma luna ona pepehi iā ia, a ʻo nā lima o nā kānaka a pau ma hope aku; a pēlā ʻoe e hoʻokaʻawale aku ai i ka hewa mai ou aku lā.

⁸ ¶ “Inā paha he mea hihia pohihihi iā ʻoe ke hoʻoponopono i waena o kahi koko a me kahi koko, i waena o kahi pono a me kekahi pono, i waena o kahi hahau ʻana a me kekahi hahau ʻana, he mea hoʻokolokolo ma kou mau ʻīpuka; a laila e kū ʻoe a piʻi aku ma kahi a Iēhova i wae ai,

⁹ “A hele aku i nā kāhuna, i kā Levi, a i ka luna kānāwai e noho ana o ia mau lā, a e nīnau aku; a e haʻi mai lākou iā ʻoe i ka ʻōlelo o ka hoʻoponopono ʻana.

¹⁰ “A e hana aku ʻoe e like me ka ʻōlelo a lākou e haʻi mai ai iā ʻoe ma kēlā wahi a Iēhova i wae ai; a e mālama e hana aku e like me kā lākou i haʻi mai ai iā ʻoe.

¹¹ “E like me ka ʻōlelo o ke kānāwai a lākou e hōʻike mai ai iā ʻoe, a e like me ka hoʻoponopono ʻana a lākou e ʻōlelo mai ai iā ʻoe, pēlā ʻoe e hana ai; mai huli aʻe ʻoe mai ka ʻōlelo aku a lākou e hōʻike mai ai iā ʻoe, ma ka ʻākau, ʻaʻole hoʻi ma ka hema.

¹² “A ʻo ke kanaka e hana aku me ke kiʻekiʻe, ʻaʻole e hoʻolohe i ke kahuna e kū ana e lawelawe na Iēhova kou Akua ma laila, ʻaʻole hoʻi i ka luna kānāwai, e make ua kanaka lā; a e lawe aku ʻoe i ka hewa mai kā ʻIseraʻela aku.

¹³ “A e hoʻolohe nā kānaka a pau, e makaʻu, ʻaʻole e hana hoʻokiʻekiʻe hou aku.

¹⁴ ¶ “A hiki aku ʻoe ma ka ʻāina a Iēhova kou Akua e hāʻawi mai ai iā ʻoe, a lilo ia nou, a noho ʻoe i laila, a e ʻōlelo iho ʻoe, ‘E hoʻonoho au i aliʻi ma luna oʻu, e like me nā lāhui kanaka a puni oʻu’;

¹⁵ he ʻoiaʻiʻo, e hoʻonoho ʻoe ma luna ou i ke aliʻi a Iēhova kou Akua e wae ai; ʻo kekahi mai waena mai o kou poʻe hoahānau kāu e hoʻonoho ai i aliʻi ma luna ou; mai hoʻonoho ʻoe i ke kanaka ʻē ma luna ou, i ka mea ʻaʻole ʻo kou hoahānau.

¹⁶ “Akā, mai hoʻomāhuahua ʻo ia i nā lio nona, ʻaʻole hoʻi ia e hoʻihoʻi i nā kānaka i ʻAigupita, i mea e hoʻomāhuahua ai ia i nā lio; no ka mea, ua ʻōlelo mai ʻo Iēhova iā ʻoukou, ‘Mai hoʻi hou aku ʻoukou i laila.’

¹⁷ “Mai hoʻomāhuahua hoʻi ʻo ia i nā wāhine nāna, o huli aʻe kona naʻau; ʻaʻole hoʻi ia e hoʻomāhuahua loa aʻe i ke kālā a me ke gula nona.

¹⁸ ¶ “A i kona manawa e noho ai ma luna o ka noho aliʻi o kona aupuni, e kākau iho ia nāna i kope o kēia kānāwai, e like me ka buke i mua o ka poʻe kāhuna, nā mamo a Levi.

¹⁹ “Me ia nō ia e waiho ai, a e heluhelu nō ʻo ia ia mea i nā lā a pau o kona ola ʻana; i aʻo ʻia ai ʻo ia i ka makaʻu iā Iēhova kona Akua, e mālama i nā hua ʻōlelo a pau o kēia kānāwai, a me kēia mau kauoha, e hana aku ia mau mea;

²⁰ i hoʻokiʻekiʻe ʻole ai ia i kona naʻau ma luna o kona poʻe hoahānau, i huli ʻole aku ia mai ke kauoha aʻe, ma ka ʻākau, ʻaʻole hoʻi ma ka hema; i mea e nui ai nā lā o kona aupuni, ʻo ia a me kāna mau keiki i waena o kā ʻIseraʻela.”