KA BUKE ʻALIMA A MOSE, I KAPA ʻIA KĀNĀWAI LUA 16 - Ka Baibala Hemolele

1 ʻO ke kānāwai no nā ʻahaʻaina ʻekolu. 18 No nā luna kānāwai a me nā ilāmuku a me kā lākou ʻoihana. 21 No nā ulu lāʻau, a me nā kiʻi.

MOKUNA XVI.

¹ ¶ “E hoʻomanaʻo ʻoe i ka malama ‘o ʻAbiba, a e mālama ʻoe i ka Mōliaola na Iēhova kou Akua; no ka mea, ʻo ʻAbiba ka malama a Iēhova kou Akua i lawe mai ai iā ʻoe mai loko mai o ʻAigupita i ka pō.

² “E kālua ʻoe i ka Mōliaola na Iēhova kou Akua, no ka poʻe hipa a me ka bipi ma kahi a Iēhova e wae ai e hoʻopaʻa i kona inoa ma laila.

³ “Mai ʻai pū ʻoe me ia i ka berena hū; i nā lā ʻehiku e ʻai ʻoe i ka berena hū ʻole me ia, i ka berena o ka pōʻino; no ka mea, ua hele mai ʻoe mai ka ʻāina ʻo ʻAigupita mai me ka lalelale, i hoʻomanaʻo ʻoe i ka lā āu i hele mai ai mai loko mai o ka ʻāina ʻo ʻAigupita i nā lā a pau o kou ola ʻana.

⁴ “I nā lā ʻehiku ʻaʻole e ʻike ʻia ka berena hū me ʻoe ma kou mau wahi a pau; ʻaʻole e waiho ʻoe a ao ka pō i kekahi ʻiʻo o ka mea āu i kālua ai i ka lā mua i ke ahiahi.

⁵ “Mai pepehi ʻoe i ka Mōliaola ma kou mau ʻīpuka a pau a Iēhova kou Akua i hāʻawi mai ai iā ʻoe;

⁶ akā, ma kahi a Iēhova kou Akua i wae ai e hoʻopaʻa i kona inoa, ma laila ʻoe e pepehi ai i ka Mōliaola i ke ahiahi, i ka napoʻo ʻana o ka lā, i ka manawa āu i puka aʻe mai ʻAigupita mai.

⁷ “A e hoʻolapalapa ʻoe ia mea, a e ʻai iho ma kahi a Iēhova kou Akua e wae ai: a kakahiaka e huli aʻe ʻoe a hoʻi i kou mau halelewa.

⁸ “I nā lā ʻeono ʻoe e ʻai ai i ka berena hū ʻole; a i ka hiku o ka lā, he hālāwai no Iēhova kou Akua; mai hana ʻoe i ka hana.

⁹ ¶ “E helu ʻoe i nā hebedoma ʻehiku nou; mai ka manawa e hoʻomaka ai e ʻoki i ka palaoa, e hoʻomaka ai ʻoe e helu i nā hebedoma ʻehiku.

¹⁰ “A e mālama ʻoe i ka ʻAhaʻaina o nā Hebedoma na Iēhova kou Akua me ka makana aloha ma kou lima āu e hāʻawi wale aku, e like me kā Iēhova kou Akua i hoʻopōmaikaʻi ai iā ʻoe.

¹¹ “A e ʻoliʻoli ʻoe i mua o Iēhova kou Akua, ʻo ʻoe, a me kāu keiki kāne, a me kāu kaikamahine, a me kāu kauā kāne a me kāu kauā wahine, a me kā Levi i loko o kou mau ʻīpuka, a me ka malihini, a me ka mea makua ʻole, a me ka wahine kāne make me ʻoe, ma kahi a Iēhova kou Akua i wae ai e hoʻopaʻa i kona inoa ma laila.

¹² “A e hoʻomanaʻo hoʻi ʻoe, he kauā luhi nō ʻoe ma ʻAigupita; a e mālama, e hana hoʻi i kēia mau kānāwai.

¹³ ¶ “E mālama ʻoe i ka ʻAhaʻaina Kauhalelewa i nā lā ʻehiku, ma hope o kāu ʻohi ʻana i kāu palaoa a me kāu waina.

¹⁴ “A e ʻoliʻoli ʻoe i kāu ʻahaʻaina, ʻo ʻoe, a me kāu keiki kāne, me kāu kaikamahine, a me kāu kauā kāne, a me kāu kauā wahine, a me kā Levi, a me ka malihini, a ʻo ka mea makua ʻole, a me ka wahine kāne make i loko o kou mau ʻīpuka.

¹⁵ “I nā lā ʻehiku ʻoe e ʻahaʻaina ai na Iēhova kou Akua, ma kahi a Iēhova i wae ai; no ka mea, e hoʻomaikaʻi ʻo Iēhova kou Akua iā ʻoe, ma kāu loaʻa ʻana a pau, a ma nā hana a pau a kou lima; a e ʻoliʻoli nui nō ʻoe.

¹⁶ “ʻEkolu manawa i ka makahiki hoʻokahi e hōʻike ʻia nā kāne a pau ou i mua o Iēhova kou Akua, ma kahi āna i wae ai: i ka ʻAhaʻaina Berena Hū ʻOle, i ka ʻAhaʻaina o nā Hebedoma, a me ka ʻAhaʻaina Kauhalelewa; ʻaʻole e hōʻike wale ʻia ai lākou i mua o Iēhova.

¹⁷ “ʻO kēlā kanaka kēia kanaka me ka makana a kona lima, e like me ka pōmaikaʻi a Iēhova kou Akua i hāʻawi mai ai iā ʻoe.

¹⁸ ¶ “A e hoʻonoho ʻoe i nā luna kānāwai a me nā ilāmuku ma kou mau ʻīpuka a pau a Iēhova kou Akua i hāʻawi mai ai nou ma kou mau ʻohana, a e hoʻoponopono lākou i nā kānaka me ka hoʻopono pololei.

¹⁹ “Mai pale aʻe ʻoe i ka pono, ʻaʻole hoʻi e nānā aku i nā maka, ʻaʻole hoʻi ʻoe e lawe i ke kīpē; no ka mea, ke hoʻomakapō ke kīpē i nā maka o ka poʻe naʻauao, a ke hoʻololi aʻe i nā mea o ka poʻe pono.

²⁰ “ʻO ka pono ʻiʻo kāu e hahai ai, i ola ai ʻoe, a i hoʻolilo ʻia ai nou ka ʻāina a Iēhova kou Akua i hāʻawi mai ai iā ʻoe.

²¹ ¶ “Mai kanu ʻoe i ulu lāʻau o kēlā lāʻau o kēia lāʻau nou e kokoke ana i ke kuahu o Iēhova kou Akua āu e hana ai nou.

²² “Mai kūkulu hoʻi ʻoe i kiʻi nou, ka mea ia a Iēhova kou Akua e inaina ai.”