KA BUKE ʻALIMA A MOSE, I KAPA ʻIA KĀNĀWAI LUA 14 - Ka Baibala Hemolele

1 No ke kanikau ʻana no nā mea i make. 3 No nā mea i pono ai ke ʻai. 22 No ka hapaʻumi, ka mea a lākou e ʻai ai i mua o Iēhova. 27 No nā mea e hoʻokaʻawale ʻia na kā Levi, na ka malihini, na ka mea makua ʻole a na ka wahine kāne make.

MOKUNA XIV.

¹ ¶ “He poʻe keiki ʻoukou na Iēhova ko ʻoukou Akua; mai ʻokiʻoki ʻoukou iā ʻoukou iho, ʻaʻole hoʻi ʻoukou e ʻako i ke oho ma waena o nā maka o ʻoukou no ka mea i make.

² “No ka mea, he poʻe ʻoukou i hoʻolaʻa ʻia no Iēhova no ko ʻoukou Akua, a na Iēhova ʻoukou i wae mai i kānaka ponoʻī nona, ma mua o nā lāhui kanaka a pau ma luna o ka honua.

³ ¶ “Mai ʻai ʻoe i kekahi mea i hoʻowahāwahā ʻia.

⁴ “Eia nā holoholona a ʻoukou e ʻai ai: ʻo ka bipi, ʻo ka hipa a me ke kao,

⁵ “ʻO ke dea hihiu, ʻo ke dea, ʻo ke dea ʻulaʻula, ʻo ke kao hihiu, ʻo ke disona, ʻo ka bipi hihiu, a me ke kao o ka wao nahele.

⁶ “A ʻo nā holoholona māiʻuʻu mahele, ʻelua manamana o ka mahele ʻana, a hoʻolualuaʻi a nāu hou i ka ʻai ma waena o nā holoholona; ʻo ia kā ʻoukou e ʻai ai.

⁷ “Akā, ʻaʻole ʻoukou e ʻai i kēia mau mea o nā holoholona hoʻolualuaʻi a nau hou i ka ʻai, a ʻo ka mea māiʻuʻu mahele: ʻo ke kāmelo, ʻo ka hare, a me ke kone; no ka mea, ua hoʻolualuaʻi lākou, a nau hou i ka ʻai ʻaʻole naʻe i mahele i ka māiʻuʻu; ua haumia lākou iā ʻoukou.

⁸ “A ʻo ka puaʻa; no ka mea, ua mahele ia i ka māiʻuʻu, ʻaʻole naʻe ia i hoʻolualuaʻi a nau hou i ka ʻai, ua haumia ʻo ia iā ʻoukou; mai ʻai ʻoukou i ko lākou ʻiʻo, mai hoʻopā aku ʻoukou i ko lākou kino i make.

⁹ ¶ “ʻO kēia kā ʻoukou e ʻai ai, ʻo nā mea a pau i loko o nā wai: ʻo nā mea halo a me nā mea unahi a pau, ʻo kā ʻoukou ia e ʻai.

¹⁰ “A ʻo nā mea halo ʻole a pau, a me nā mea unahi ʻole, ʻaʻole ʻoukou e ʻai ia mea; ua haumia ia iā ʻoukou.

¹¹ ¶ “ʻO nā manu maʻemaʻe a pau, ʻo kā ʻoukou ia e ʻai ai.

¹² “Eia nā mea ʻaʻole ʻoukou e ʻai: ʻo ka ʻaeto, ʻo ka ʻosiferaga, ʻo ka ʻosepera;

¹³ ʻo ke korenisa, ʻo ka ʻaeselona, ʻo ka vuletura ʻeleʻele, a me ka mea like;

¹⁴ ʻo nā koraka a pau a me kona mea like;

¹⁵ ʻo ka ululā, ʻo ke tama, ʻo ka laru, ʻo ka nisu a me kona mea like;

¹⁶ ʻo ka bubo, ʻo ka pueo, ʻo ka noketura;

¹⁷ ʻo ka pelikana, ʻo ka vuletura keʻokeʻo, ʻo ke katarakete;

¹⁸ ʻo ke kikonia, ʻo ka ʻaredea e like me kona ʻano iho, ʻo ka upupā, a me ka ʻōpeʻapeʻa.

¹⁹ “ʻO nā mea kolo a pau e lele ana, ua haumia ia iā ʻoukou; mai ʻai ʻoukou ia mau mea.

²⁰ “ʻO nā manu maʻemaʻe a pau, ʻo kā ʻoukou ia e ʻai ai.

²¹ ¶ “Mai ʻai ʻoukou i kekahi mea make wale; e hāʻawi aku na ke kanaka ʻē i loko o kou mau ʻīpuka, i ʻai iho ai ʻo ia ia mea; a e kūʻai aku paha ia mea i ka malihini; no ka mea, he poʻe kānaka ʻoukou i hoʻolaʻa ʻia no Iēhova kou Akua. Mai hoʻolapalapa ʻoe i ke keiki kao i loko o ka waiū o kona makuahine.

²² ¶ “E hoʻokupu ʻoe i ka hapaʻumi o kāu hua a pau a ka mahina ʻai i hua mai ai i kēlā makahiki i kēia makahiki.

²³ “A e ʻai ʻoe i mua o Iēhova kou Akua, ma kahi āna i wae ai e hoʻopaʻa i kona inoa ma laila, i ka hapaʻumi o kāu palaoa, a me kou waina, a me kou ʻaila, a me nā hānau mua o kāu poʻe bipi, a me kāu poʻe hipa, i aʻo iho ai ʻoe e makaʻu iā Iēhova kou Akua i nā lā a pau.

²⁴ “Inā paha lōʻihi ke ala iā ʻoe, ʻaʻole e hiki iā ʻoe ke lawe aku ia mea ma laila; a i mamao aku paha iā ʻoe ka wahi a Iēhova kou Akua i wae ai e hoʻopaʻa i kona inoa ma laila; no ka mea, ua hoʻopōmaikaʻi ʻo Iēhova kou Akua iā ʻoe;

²⁵ a laila e hoʻolilo aku ʻoe ia i mea kālā, a e hoʻopaʻa iho i ke kālā ma kou lima, a hele aku ma kahi a Iēhova kou Akua i wae ai.

²⁶ “A e hoʻolilo aku ʻoe i ua kālā lā no nā mea a pau a kou naʻau i makemake ai, no ka bipi paha, a no ka hipa, a no ka waina paha, a no ka mea inu ʻawaʻawa paha, a no ka mea a pau a kou naʻau e ʻimi ai; a e ʻai iho ʻoe ma laila i mua o Iēhova kou Akua, a e ʻoliʻoli ʻoe a me kou ʻōhua.

²⁷ “A ʻo kā Levi ma kou ʻīpuka, mai hoʻopoina ʻoe iā ia; no ka mea, ʻaʻohe ona kuleana, ʻaʻohe ona ʻāina hoʻoili me ʻoe.

²⁸ ¶ “I ka hope o nā makahiki ʻekolu, e lawe mai ʻoe i ka hapaʻumi a pau o kāu mea i loaʻa i ua makahiki lā, a e waiho ia mea i loko o kou mau ʻīpuka.

²⁹ “A ʻo kā Levi, (no ka mea, ʻaʻohe ona kuleana, ʻaʻohe ona ʻāina hoʻoili me ʻoe,) a ʻo ka malihini, a ʻo ka mea makua ʻole, a me ka wahine kāne make i loko o kou mau ʻīpuka, ʻo lākou ke hele mai, a e ʻai a māʻona; i hoʻopōmaikaʻi ai ʻo Iēhova kou Akua iā ʻoe ma nā hana a pau a kou lima e lawe ai.