KA BUKE ʻALIMA A MOSE, I KAPA ʻIA KĀNĀWAI LUA 1 - Ka Baibala Hemolele

1 Hōʻike akula ʻo Mose i nā mea a ke Akua i ʻōlelo mai ai i kā ʻIseraʻela, 34 a me ka huhū ʻo Iēhova i ka poʻe hoʻomaloka.

MOKUNA I.

¹ ¶ Eia nā ʻōlelo a Mose i ʻōlelo aku ai i kā ʻIseraʻela a pau ma kēia ʻaoʻao o Ioredane, ma ka wao nahele, ma ka pāpū e kū pono ana i Zupa, ma waena o Parana a me Topela, a me Labana, a me Hazerota, a me Dizahaba.

² (He ʻumikumamākahi lā hele mai Horeba, ma ke ala o Mauna Seira, a hiki i Kadesa Banea.)

³ A i ka makahiki kanahā, i ka malama ʻumikumamākahi, i ka lā mua o ka malama, ʻōlelo akula ʻo Mose i nā mamo a ʻIseraʻela, e like me nā mea a pau a Iēhova i kauoha mai ai iā ia no lākou;

⁴ ma hope iho o kāna pepehi ʻana iā Sihona ke aliʻi o kā ʻAmora, ka mea i noho ma Hesebona, a iā ʻOga ke aliʻi o Basana, ka mea i noho ma ʻAsetarota i ʻEderei.

⁵ Ma kēia ʻaoʻao o Ioredane, ma ka ʻāina ʻo Moaba, i hoʻomaka ai ʻo Mose e haʻi aku i kēia kānāwai, ʻī akula,

⁶ “ʻŌlelo maila ʻo Iēhova ko kākou Akua iā kākou ma Horeba, ʻī maila, ‘Ua lōʻihi ko ʻoukou noho ʻana ma kēia mauna.

⁷ ‘E huli aʻe ʻoukou, a i ka hele ʻana, e hele ʻoukou i ka mauna o kā ʻAmora, a i kona poʻe e noho ana a pau, ma nā pāpū, ma nā puʻu, a ma ke awāwa, a ma ke Kūkulu Hema, a ma kahakai, i ka ʻāina o ko Kanaʻana, a i Lebanona, a i ka muliwai nui, ka muliwai ʻo ʻEuperate.

⁸ ‘Aia hoʻi, ua hāʻawi aku au i ka ʻāina no ʻoukou, e komo ʻoukou, a e lawe i ka ʻāina a Iēhova i hoʻohiki ai i ko ʻoukou mau kūpuna, iā ʻAberahama, iā ʻIsaʻaka, a iā Iakoba, e hāʻawi iā lākou, a me kā lākou poʻe mamo ma hope o lākou.’

⁹ ¶ “ʻŌlelo akula au iā ʻoukou i kēlā manawa, ʻī akula, ‘ʻAʻole e hiki iaʻu, ʻo wau wale, ke halihali iā ʻoukou.

¹⁰ ‘Ua hoʻonui mai ʻo Iēhova ko ʻoukou Akua iā ʻoukou, aia hoʻi, ua like ʻoukou i kēia lā me nā hōkū o ka lani, he nui loa.

¹¹ (‘A na Iēhova ke Akua o ko ʻoukou poʻe kūpuna, e hoʻonui pātausani aku iā ʻoukou, a e hoʻomaikaʻi mai iā ʻoukou e like me kāna i ʻōlelo mai ai iā ʻoukou!)

¹² ‘Pehea lā e hiki ai iaʻu, ʻo wau wale nō ke halihali i ko ʻoukou kaumaha, a me ko ʻoukou luhi, a me ko ʻoukou hoʻopaʻapaʻa ʻana?

¹³ ‘E wae ʻoukou no ʻoukou i nā kānaka akamai, naʻauao, a ʻike ʻia e nā hanauna kanaka o ʻoukou, a e hoʻolilo au iā lākou i poʻe luna no ʻoukou.’

¹⁴ “ʻŌlelo maila ʻoukou iaʻu, ʻī maila, ‘He mea pono ke hana i ka mea āu i ʻōlelo mai nei.’

¹⁵ “A lawe akula au i nā luna o ko ʻoukou mau ʻohana, i nā kānaka naʻauao, a ʻike ʻia, a hoʻolilo ihola iā lākou i poʻo ma luna o ʻoukou, i luna no nā tausani, i luna no nā haneri, i luna no nā kanalima, a i luna no nā ʻumi, i aliʻi no ko ʻoukou mau ʻohana.

¹⁶ ¶ “A kauoha akula au i nā luna kānāwai o ʻoukou i kēlā manawa, i ka ʻī ʻana aʻe, ‘E hoʻolohe ʻoukou i nā mea i waena o nā hoahānau o ʻoukou, a e hoʻopono ma ka pololei i waena o ke kanaka a me kona hoahānau, i waena o ka malihini me ia.

¹⁷ ‘Mai nānā ʻoukou i nā maka i ka hoʻoponopono ʻana; e lohe ʻoukou i kā ka mea ʻuʻuku e like me kā ka mea nui; mai makaʻu ʻoukou i ka maka o ke kanaka; no ka mea, na ke Akua ka hoʻoponopono ʻana; a ʻo ka mea pohihihi iā ʻoukou, e lawe mai ia mea iaʻu, a naʻu ia e lohe aku.’

¹⁸ “A kauoha akula au iā ʻoukou i kēlā manawa i nā mea a pau a ʻoukou e hana aku ai.

¹⁹ ¶ “A iā kākou i haʻalele ai iā Horeba, hele kākou ma loko o kēlā wao nahele nui weliweli a pau, a ʻoukou i ʻike ai ma ke ala o ka mauna o kā ʻAmora, e like me kā Iēhova i kauoha mai ai iā kākou; a hiki kākou ma Kadesa Banea.

²⁰ “A ʻī akula au iā ʻoukou, ‘Ua hiki mai ʻoukou ma ka mauna o kā ʻAmora, ka mea a Iēhova ko kākou Akua i hāʻawi mai ai no kākou.

²¹ ‘Aia hoʻi, ke waiho mai nei ʻo Iēhova kou Akua i ka ʻāina i mua ou; e piʻi aʻe, e komo, e like me kā Iēhova ke Akua o kou mau kūpuna i ʻōlelo mai ai iā ʻoe; mai makaʻu, mai hoʻopauaho.’

²² “A hele maila ʻoukou a pau i oʻu nei, ʻī maila, ‘E hoʻouna aku kākou i nā kānaka i mua o kākou, a e mākaʻikaʻi lākou i ka ʻāina no kākou, a e haʻi mai iā kākou i ke ala a kākou e piʻi aku ai, a me nā kūlanakauhale a kākou e hele aku ai.’

²³ “ʻOluʻolu ihola au ia ʻōlelo; a lawe aʻela au i nā kānaka o ʻoukou, he ʻumikumamālua, pākahi ke kanaka no kēlā ʻohana, kēia ʻohana.

²⁴ “Huli aʻela lākou, a piʻi akula ma ka mauna, a hiki ma ke kahawai ʻo ʻEsekola, a mākaʻikaʻi akula i ka ʻāina.

²⁵ “Lawe lākou i ka hua o ka ʻāina ma ko lākou mau lima, a iho mai i o kākou nei, a haʻi mai iā kākou, ʻī maila, ‘He maikaʻi ka ʻāina a Iēhova ko kākou Akua e hāʻawi mai nei iā kākou.’

²⁶ ¶ “ʻAʻole naʻe ʻoukou i piʻi aku; akā, kipi aku ʻoukou i ke kauoha a Iēhova ko ʻoukou Akua.

²⁷ “A ʻōhumu aʻela ʻoukou i loko o ko ʻoukou mau halelewa, ʻī ihola, ‘No ka inaina o Iēhova iā kākou, i lawe mai ai ʻo ia iā kākou mai loko mai o ka ʻāina ʻo ʻAigupita, e hāʻawi iā kākou i loko o ka lima o kā ʻAmora, e luku mai iā kākou.

²⁸ ‘Ma hea lā uaneʻi kākou e piʻi aku ai? Ua hoʻoweliweli mai ko kākou mau hoahānau i ko kākou naʻau, ua ʻī mai, “Ua nui ʻē aku nā kānaka, ua lōʻihi hoʻi lākou iā kākou; a ʻo nā kūlanakauhale nui, ua paʻa i ka pā pōhaku a hala i ka lani; a ua ʻike hoʻi mākou i nā keiki a ʻAnaka ma laila.”’

²⁹ “ʻĪ akula au iā ʻoukou, ‘Mai hopohopo ʻoukou, mai makaʻu hoʻi iā lākou.

³⁰ ‘ʻO Iēhova ko ʻoukou Akua, ka mea hele i mua o ʻoukou, nāna nō e kaua aku no ʻoukou, e like me nā mea a pau āna i hana ai no ʻoukou ma ʻAigupita i mua o ko ʻoukou maka;

³¹ a ma ka wao nahele, kahi āu i ʻike ai iā Iēhova kou Akua, e like me kā ke kanaka hali ʻana i kāna keiki, pēlā ia i hali ai iā ʻoe ma ke ala a pau a ʻoukou i hele ai, a hiki mai ʻoukou ma kēia wahi.’

³² “Akā, ma kēia mea, ʻaʻole nō ʻoukou i hōʻoiaʻiʻo aku i kā Iēhova ko ʻoukou Akua;

³³ ʻo ia kai hele aʻe ma ke ala i mua o ʻoukou, ma ke ahi i ka pō, a ma ke ao i ke ao, e ʻimi ana i wahi no ʻoukou e kūkulu ai i ko ʻoukou mau halelewa, e kuhikuhi ana iā ʻoukou i ke ala e hele ai.

³⁴ ¶ “A lohe maila ʻo Iēhova i ka leo o kā ʻoukou ʻōlelo, a huhū maila iā ʻoukou, a hoʻohiki ihola, i ka ʻī ʻana mai,

³⁵ ‘He ʻoiaʻiʻo, ʻaʻole loa kekahi o kēia poʻe kānaka o kēia hanauna ʻino e ʻike aku i ka ʻāina maikaʻi aʻu i hoʻohiki ai e hāʻawi aku no ko ʻoukou poʻe kūpuna;

³⁶ ʻo Kaleba wale nō ke keiki a Iepune; ʻo ia ke ʻike aku ia, a e hāʻawi aku au i ka ʻāina āna i hehi iho ai nona, a no kāna mau keiki; no ka mea, ua hahai kūpaʻa akula ia iā Iēhova.’

³⁷ “Huhū mai nō hoʻi ʻo Iēhova iaʻu no ʻoukou, ʻī maila, ‘ʻAʻole hoʻi ʻoe e hele i laila.

³⁸ ‘ʻO Iosua, ke keiki a Nuna, e kū ana i mua ou, ʻo ia ke hele i laila; e hoʻoikaika ʻoe iā ia; no ka mea, nāna nō ia e hoʻoili aku no kā ʻIseraʻela.

³⁹ ‘ʻO kā ʻoukou poʻe keiki ʻuʻuku a ʻoukou i ʻī mai ai e lilo auaneʻi i poʻe pio, a me nā keiki a ʻoukou, ka poʻe ʻike ʻole i ka pono a i ka hewa ia lā, ʻo lākou ke hele i laila, a naʻu ia e hāʻawi aku no lākou, a e komo nō lākou ia wahi.

⁴⁰ ‘Akā, ʻo ʻoukou, e hāliu aʻe ʻoukou, a e hele ma ka wao nahele ma ke ala o ke Kai ʻUla.

⁴¹ ¶ “A laila, ʻōlelo maila ʻoukou, ʻī maila iaʻu, ‘Ua hana hewa mākou iā Iēhova, e piʻi nō mākou, a e kaua aku, e like me nā mea a pau a Iēhova ko kākou Akua i kauoha mai ai iā kākou.’ A i ka wā a ʻoukou, a kēlā kanaka, kēia kanaka i hāwele ai i kāna mea kaua, ua mākaukau ʻoukou e piʻi ma luna o ka puʻu.

⁴² “ʻĪ maila ʻo Iēhova iaʻu, ‘E ʻī aku ʻoe iā lākou, “Mai piʻi ʻoukou, ʻaʻole hoʻi e kaua aku; no ka mea, ʻaʻole ʻo wau me ʻoukou; o luku ʻia mai ʻoukou e ko ʻoukou poʻe ʻenemi.”’

⁴³ “A ʻōlelo akula au iā ʻoukou, ʻaʻole ʻoukou i hoʻolohe mai; hoʻohala ʻoukou i ke kauoha a Iēhova, ʻaʻa akula ʻoukou, a piʻi aʻela ma luna o ka puʻu.

⁴⁴ “A ʻo kā ʻAmora e noho ana ma ua puʻu lā, hele mai lākou e kūʻē iā ʻoukou, a hahai mai lākou iā ʻoukou, e like me kā ka nalo meli hana ʻana, a pepehi mai iā ʻoukou ma Seira a hiki mai i Horema.

⁴⁵ “A hoʻi hou mai ʻoukou, a uē ihola i mua o Iēhova; akā, ʻaʻole ʻo Iēhova i hoʻolohe mai i ko ʻoukou leo, ʻaʻole hoʻi ia i hāliu mai i ka pepeiao iā ʻoukou.

⁴⁶ “A noho ihola ʻoukou ma Kadesa i nā lā he nui, e like me nā lā a ʻoukou i noho ai.