ʻO KA ʻEPISETOLE A PAULO KA LUNAʻŌLELO I KO KOLOSA 4 - Ka Baibala Hemolele

1 No ka pono o nā haku, ka pule a me ka ʻōlelo pono.

MOKUNA IV.

¹ ¶ E nā haku, e hāʻawi aku na nā kauā i ka mea pono, a me ka ʻewaʻewa ʻole; ua ʻike ʻoukou he Haku ko ʻoukou ma ka lani.

² ¶ E hoʻomau i ka pule, e makaʻala hoʻi ma ia mea, me ka hoʻomaikaʻi aku.

³ No mākou kekahi e pule ai ʻoukou, i wehe mai ke Akua i ka puka no mākou e ʻōlelo ai, e haʻi aku i ka mea pohihihi o Kristo i koʻu mea i hoʻopeʻa ʻia mai nei;

⁴ i hiki iaʻu ke hoʻomaopopo ia mea, me he mea pono lā iaʻu ke ʻōlelo aku.

⁵ E hele naʻauao ʻoukou ma mua o ka poʻe ma waho, e mālama pono ana i ka manawa.

⁶ E hoʻomau ʻia ka maikaʻi o kā ʻoukou ʻōlelo, i miko ia i ka paʻakai, i ʻike ʻoukou i ka mea e pono ai ke ʻōlelo i kēlā kanaka a i kēia kanaka.

⁷ ¶ A ʻo koʻu noho ʻana, na Tukiko ia e haʻi aku iā ʻoukou, na ka hoahānau aloha, ka lawehana hoʻopono, ka hoa kauā i loko o ka Haku.

⁸ ʻO ia kaʻu i hoʻouna aku nei i o ʻoukou lā, no ia mea, i ʻike aku ia i ko ʻoukou noho ʻana, a e hōʻoluʻolu aku hoʻi i ko ʻoukou mau naʻau;

⁹ me ʻOnesimo, ka hoahānau aloha hoʻopono, no ʻoukou mai ia; na lāua e hōʻike aku iā ʻoukou i nā mea a pau o neʻi.

¹⁰ ¶ Ke uē aku nei ʻo ʻArisetareko, koʻu hoa pio iā ʻoukou, lāua ʻo Mareko ke keiki a ko Barenaba kaikuahine, (nona ʻoukou i kauoha ʻia aku ai, ʻo ia kā ʻoukou e hoʻokipa ai, ke hiki aku ia i o ʻoukou lā,)

¹¹ a me Iesou, i kapa hou ʻia ai Iouseto, no ke ʻoki poepoe lāua. ʻO lākou wale nō koʻu mau hoa lawehana ma ke aupuni o ke Akua, nā mea i hōʻoluʻolu mai nei iaʻu.

¹² Ke uē aku nei ʻo ʻEpapera iā ʻoukou, no ʻoukou ia, ʻo ke kauā a Kristo, e hoʻoikaika mau ana no ʻoukou, i ka pule, i kū hemolele ʻoukou me ke kīnā ʻole, ma ka makemake a pau o ke Akua.

¹³ Ke hōʻike aku nei au nona, he ikaika nui kona no ʻoukou, a no ka poʻe ma Laodikeia, a me ka poʻe i Hierapoli.

¹⁴ Ke uē aku nei iā ʻoukou ʻo Luka, ke kahuna lapaʻau punahele, a me Dema.

¹⁵ E aloha aku ʻoukou i ka poʻe hoahānau i Laodikeia, a iā Numepana, a me ka ʻekalesia i loko o kona hale.

¹⁶ Aia heluhelu ʻia kēia ʻepisetole i waena o ʻoukou lā, na ʻoukou e heluhelu hou aku ia i ka ʻekalesia o ko Laodikeia; a e heluhelu hoʻi ʻoukou i ka ʻepisetole mai Laodikeia mai.

¹⁷ E ʻī aku iā ʻArekipo, “E mālama ʻoe i ka ʻoihana i loaʻa iā ʻoe i loko o ka Haku, nāu ia e hoʻoponopono.”

¹⁸ ¶ ʻO ke aloha naʻe, na ka lima ia oʻu nei ʻo Paulo. E hoʻomanaʻo mai i koʻu mea i paʻa ai. E aloha ʻia mai ʻoukou. ʻĀmene.