ʻAMOSA 9 - Ka Baibala Hemolele

1 ʻO ka hiki ʻiʻo ʻana mai o ka ʻino ma luna o kā ʻIseraʻela. 8 Hoʻokoe ʻia kekahi poʻe. 11 He wānana no Kristo, ka pōmaikaʻi o kona aupuni, a ʻo ka hoʻihoʻi o ʻIseraʻela.

MOKUNA IX.

¹ ¶ ʻIke akula au iā Iēhova e kū ana ma luna o ke kuahu; a ʻī maila ia, “E hahau i ke poʻo o ke kia, i haʻalulu ai nā kumu kia; A e ʻoki iā lākou ma ke poʻo, iā lākou a pau; A e pepehi aku au i ke koena o lākou me ka pahi kaua; ʻO ka mea o lākou e holo ana, ʻaʻole ia e malu; A ʻo ka mea e pakele ana, ʻaʻole e pakele ʻiʻo.

² “Inā e ʻeli iho lākou i ka pō, e lawe koʻu lima iā lākou mai laila mai; Inā e piʻi lākou i ka lani, e lawe au iā lākou mai laila mai.

³ “A inā e peʻe lākou ma luna o ka piko o Karemela, E ʻimi aku au, a e lawe iā lākou mai laila mai; A inā e peʻe lākou mai kuʻu maka aku ma ka mole o ke kai, Ma laila e kēnā aku au i ka nahesa, a e nahu aku ia iā lākou.

⁴ “A inā e hele pio aku lākou i mua o ko lākou poʻe ʻenemi, Ma laila e kēnā aku au i ka pahi kaua, a e luku aku ia iā lākou; A e kau aku kuʻu mau maka ma luna o lākou no ka ʻino, ʻaʻole no ka maikaʻi.”

⁵ ¶ A ʻo Iēhova, ka Haku o nā kaua, ʻO ia ka Mea e hoʻopā i ka ʻāina, a e heheʻe iho nō ia; A e auē iho ka poʻe a pau e noho ana i loko ona; A e ea aʻe ia me he Muliwai lā a puni ona; A e hālana aʻe e like me ka Muliwai o ʻAigupita.

⁶ ʻO ia kai hana i nā papa luna i loko o ka lani, A i hoʻokumu i kona pōʻai ma luna o ka honua; ʻO ka Mea i hoʻopiʻi aʻe i nā wai o ka moana, A ninini iho iā lākou ma luna o ka ʻili o ka ʻāina; ʻO Iēhova kona inoa.

⁷ ¶ “E nā mamo a ʻIseraʻela, ʻaʻole anei ʻoukou i like iaʻu Me nā mamo a Kusa?” wahi a Iēhova. “ʻAʻole anei au i lawe mai i kā ʻIseraʻela mai ka ʻāina ʻo ʻAigupita mai? A i ko Pilisetia mai Kapetora mai, a me ko Suria mai Kira mai?

⁸ “Aia hoʻi, ʻo nā maka o Iēhova ka Haku ma luna o ke aupuni hewa; A e hōkai aku au iā ia mai ka honua aku; Akā hoʻi, ʻaʻole au e luku loa aku i ko ka hale o Iakoba,” wahi a Iēhova.

⁹ “No ka mea, aia hoʻi, e kauoha aku au, A e kānana iho ai i ko ka hale o ʻIseraʻela i waena o nā lāhui kanaka a pau; E like me ka huapalaoa i kānana ʻia i loko o ke kānana, ʻAʻole e hāʻule kekahi hua ma ka honua.

¹⁰ “E make ka poʻe hewa a pau o kuʻu poʻe kānaka i ka pahi kaua, Ka poʻe e ʻōlelo ana, ‘ʻAʻole e hiki mai ka hewa ma hope, ʻaʻole hoʻi ma mua o kākou.’

¹¹ ¶ “I kēlā lā e kūkulu au i ka halelewa o Dāvida i wāwahi ʻia, A e hoʻopaʻa i kona wahi hiolo; A e hoʻokū hou au i kona mau mea i heleleʻi ʻia, A hana aku ia e like me nā lā ma mua;

¹² “I lilo no lākou ke koena o kā ʻEdoma, a me nā lāhui kanaka a pau, Ka poʻe i kāhea ʻia ka inoa ʻo Iēhova ma luna o lākou,” Wahi a Iēhova, nāna kēia i hana.

¹³ ¶ “Aia hoʻi, e hiki mai nā lā,” wahi a Iēhova, “E hālāwai ai ka mea e mahi ʻai ana, me ka mea e ʻoki ana, A ʻo ka mea e hehi i nā hua waina, me ka mea e lūlū i ka hua; A e hoʻokulukulu iho nā mauna i ka waina hou, A e heheʻe iho nā puʻu a pau.

¹⁴ “A e hoʻihoʻi mai au i ka poʻe pio o kuʻu poʻe kānaka o kā ʻIseraʻela, A e kūkulu lākou i nā kūlanakauhale neoneo, a noho lākou i loko; A e kanu lākou i nā pā waina, a e inu lākou i ko lākou waina; A e hana lākou i nā kīhāpai, a e ʻai hoʻi i ko lākou hua.

¹⁵ “A e kanu iho au iā lākou ma ko lākou ʻāina iho, ʻAʻole e uhuki hou ʻia aʻe lākou mai ko lākou ʻāina aʻe, Ka mea aʻu i hāʻawi aku ai iā lākou,” wahi a Iēhova kou Akua.