ʻAMOSA 8 - Ka Baibala Hemolele

1 Ma ka hīnaʻi hua i hōʻike ʻia mai ai ka ʻino e hiki koke ana i kā ʻIseraʻela. 4 ʻO ke ao ikaika ʻana, a me ka wānana ʻana no nā ʻino nui. 11 He manawa wī i ka ʻōlelo ʻole.

MOKUNA VIII.

¹ ¶ Pēnēia i hōʻike mai ai ʻo Iēhova ka Haku iaʻu; aia hoʻi, he hīnaʻi hua oʻo.

² A ʻī maila ia, “He aha kāu e ʻike nei, e ʻAmosa?” ʻĪ akula au, “He hīnaʻi hua oʻo.” A laila, ʻī maila ʻo Iēhova iaʻu, “Ua hiki mai ka hope ma luna o kuʻu poʻe kānaka o kā ʻIseraʻela; ʻaʻole au e hele hou aʻe mai o lākou aku.

³ “A e lilo nā mele o ka hale aliʻi i auē ʻana ia lā,” wahi a Iēhova ka Haku. “A he nui auaneʻi nā kupapaʻu ma nā wahi a pau; a e hoʻolei malu aku iā lākou.”

⁴ ¶ E hoʻolohe i kēia, e ʻoukou ka mea e moni i ka poʻe ʻilihune, a hoʻopau i ka poʻe nele o ka ʻāina,

⁵ i ka ʻī ʻana aʻe, “Āhea lā e pau ai ka Mahina Hou, i kūʻai aku ai kākou i ka ʻai? A me ka Sābati, i wehe aʻe ai kākou i ka hua ʻai, e hōʻuʻuku ana i ka ʻepa, A e hoʻomāhuahua ana i ke sekela, a e hoʻololi ana i nā mea kaupaona hoʻopunipuni?

⁶ “I kūʻai aku ai kākou i ka poʻe ʻilihune no ke kālā, A i ka poʻe nele no ka paʻa kāmaʻa; a i kūʻai aku ai i ka huapalaoa ʻino?”

⁷ ¶ Ua hoʻohiki ʻo Iēhova ma ka nani o Iakoba, “ʻAʻole loa au e hoʻopoina i kā lākou mau hana a pau.

⁸ “ʻAʻole anei e haʻalulu ka ʻāina no kēia mea, A e auē nā mea a pau e noho ana i loko ona? A e piʻi aʻe ia me he Muliwai lā a puni ona; A e laweʻia aku ia, a e hālana aʻe ia e like me ka Muliwai o ʻAigupita.

⁹ “A i kēlā lā,” wahi a Iēhova ka Haku, “E hoʻonapoʻo iho au i ka lā i ke awakea, a e hoʻopouli iho au i ka ʻāina i ka lā laʻelaʻe.

¹⁰ “A e hoʻolilo au i kā ʻoukou mau ʻahaʻaina i auē ʻana, A i ko ʻoukou mau mele i kanikau ʻana; A e lawe mai au i ke kapa ʻino ma luna o nā pūhaka a pau, A me ka ʻōhule ma luna o nā poʻo a pau; A e hoʻohālike au ia mea me ka auē ʻana no ke keiki kama kahi, A i ka hope o ia mea e like me ka lā ʻawaʻawa.

¹¹ ¶ “Aia hoʻi, e hiki mai ana nā lā,” wahi a Iēhova ka Haku, “E lawe mai ai au i ka wī ma luna o ka ʻāina, ʻaʻole ʻo ka wī i ka ʻai, ʻaʻole ʻo ka make inu i ka wai, Akā, ʻo ka lohe i ka ʻōlelo a Iēhova.

¹² “A e ʻauana lākou mai ke kai a hiki i ke kai, a mai ke kūkulu ʻākau, a ka hikina, E holo lākou ma ʻō a ma ʻō, e ʻimi ana i ka ʻōlelo a Iēhova, ʻaʻole e loaʻa.

¹³ “I kēlā lā, e maʻule nā wāhine puʻupaʻa maikaʻi, a me nā kānaka ʻōpio no ka make wai.

¹⁴ “ʻO ka poʻe e hoʻohiki ma ka hewa o Samaria, a ʻī iho, ‘E ola ana kou Akua, e Dana; a e ola ana ka ʻaoʻao o Beʻereseba’; E hāʻule nō hoʻi lākou, ʻaʻole loa e ala hou aʻe.”