ʻAMOSA 7 - Ka Baibala Hemolele

1 Hōʻoki ʻia ka ʻino o ka ʻūhini a me ke ahi, no ka pule a ʻAmosa. 7 Hōʻike ʻia ka pono o ko ke Akua hoʻohewa ʻana. 10 Hoʻohewa ʻo ʻAmazia i ke kahuna iā ʻAmosa, a pāpā aku i kona wānana ʻana ma Betela. 14 Hoʻākāka mai ʻo ʻAmosa i ko ke Akua hoʻolilo ʻana iā ia i kāula; a hōʻike mai ia i ka hoʻokai ʻana iā ʻAmazia, a me kona ʻōhua.

MOKUNA VII.

¹ ¶ Pēnēia i hōʻike mai ai ʻo Iēhova ka Haku iaʻu: Aia hoʻi, hana ihola ia i nā ʻūhini i ka ulu mua ʻana o ka weuweu hope; aia hoʻi, ʻo ka weuweu lua ia ma hope o kā ke aliʻi ʻoki ʻana.

² A i ka wā i hoʻopau ai lākou i ka ʻai ʻana i ka weuweu o ka ʻāina, a laila ʻī akula au, “E Iēhova ka Haku, ke noi aku nei au, e kala mai ʻoe. Pehea lā e kū mai ai ʻo Iakoba? No ka mea, ua ʻuʻuku ia.”

³ Huli aʻela ʻo Iēhova no kēia mea. “ʻAʻole ia e hiki mai,” wahi a Iēhova.

⁴ ¶ Pēnēia i hōʻike mai ai ʻo Iēhova ka Haku iaʻu; aia hoʻi, kāhea mai ʻo Iēhova ka Haku, e hakakā me ke ahi, a ʻai ihola ia i ka hohonu nui, a hoʻopau ihola i kauwahi.

⁵ A laila, ʻī akula au, “E ka Haku, e Iēhova, ke noi aku nei au, e oki; Pehea e kū mai ai ʻo Iakoba? No ka mea, ua ʻuʻuku ia.”

⁶ Huli aʻela ʻo Iēhova no kēia mea. “ʻAʻole e hiki mai kēia,” wahi a Iēhova ka Haku.

⁷ ¶ Pēnēia i hōʻike mai ai ʻo ia iaʻu; aia hoʻi, kū maila ka Haku ma luna o ka pā pōhaku kūpono, me ka mea hoʻokūpono ma kona lima.

⁸ A ʻī maila ʻo Iēhova iaʻu, “E ʻAmosa, he aha lā kāu e ʻike nei?” A ʻī akula au, “He mea hoʻokūpono.” A laila, ʻī maila ʻo Iēhova, “Aia hoʻi, e hoʻonoho aku au i ka mea hoʻokūpono I waena o kuʻu poʻe kānaka o kā ʻIseraʻela; ʻAʻole au i hele hou aʻe mai o lākou aku.

⁹ “A e hoʻoneoneo ʻia nā wahi kiʻekiʻe o ʻIsaʻaka, A e wāwahi ʻia nā wahi hoʻāno o kā ʻIseraʻela; A e kūʻē aku au i ka hale o Ieroboama me ka pahi kaua.”

¹⁰ ¶ A laila, hoʻouna akula ʻo ʻAmazia, ke kahuna o Betela, i o Ieroboama lā, ke aliʻi o kā ʻIseraʻela, ʻī akula, “Ua kūʻē mai ʻo ʻAmosa iā ʻoe i waena o ko ka hale o ʻIseraʻela; ʻaʻole e hiki i ka ʻāina ke hoʻomanawanui i kāna mau ʻōlelo a pau.

¹¹ “No ka mea, ke ʻōlelo mai nei ʻo ʻAmosa penei: ‘E make auaneʻi ʻo Ieroboama i ka pahi kaua, a e lawe pio ʻia aku kā ʻIseraʻela mai ko lākou ʻāina aku.’”

¹² ʻŌlelo akula hoʻi ʻo ʻAmazia iā ʻAmosa, “E ke kāula ʻike, ō hele, e holo aku ʻoe i ka ʻāina ʻo Iuda, a ma laila e ʻai ai i ka berena, a e wānana ma laila.

¹³ “A mai wānana hou ma Betela; no ka mea, he heiau kēia no ke aliʻi, a ʻo ko ke aliʻi hale noho kēia.”

¹⁴ ¶ A laila, ʻōlelo akula ʻo ʻAmosa, a ʻī akula iā ʻAmazia, “ʻAʻole wau he kāula ma mua, ʻaʻole hoʻi he keiki a ke kāula; akā, he hānai bipi wau, a he mea hōʻiliʻili hua sukamore.

¹⁵ “A lawe ʻo Iēhova iaʻu mai ka hahai ʻana i nā holoholona, a ʻōlelo mai ʻo Iēhova iaʻu, ‘E hele, e wānana aku i kuʻu poʻe kānaka i kā ʻIseraʻela.’

¹⁶ “ʻĀnō hoʻi, e hoʻolohe ʻoe i ka ʻōlelo a Iēhova: ‘Ke ʻōlelo nei ʻoe, mai wānana kūʻē aku i kā ʻIseraʻela, a mai hāpai kūʻē ʻoe i kāu ʻōlelo i ko ka hale o ʻIsaʻaka.’

¹⁷ “No ia mea, ke ʻōlelo mai nei ʻo Iēhova, penei: ‘E moekolohe kāu wahine ma ke kūlanakauhale, a ʻo kāu mau keiki kāne, a me kāu mau kaikamāhine, e hāʻule lākou i ka pahi kaua, a e puʻunaue ʻia kou ʻāina me ke kaula ana: a e make ʻoe ma ka ʻāina haumia; a e hele pio aku kā ʻIseraʻela mai ko lākou ʻāina aku.’”