ʻAMOSA 6 - Ka Baibala Hemolele

1 Ka pōʻino no ka palaka, a me ka hoʻokiʻekiʻe o nā Iudaio, a me kā ʻIseraʻela. 7 Ka wānana o nā ʻino nui.

MOKUNA VI.

¹ ¶ Auē ka poʻe palaka ma Ziona, A hilinaʻi hoʻi ma ka mauna ʻo Samaria; Ka poʻe i ʻōlelo ʻia, ʻo nā poʻokela o nā lāhui kanaka, I o lākou lā i hele mai kā ʻIseraʻela!

² E hele aku ʻoukou i Kalene, a e nānā; A mai laila aku e hele ai ʻoukou i Hamata nui; A laila, e iho aku i Gata o ko Pilisetia; Ua ʻoi anei ko lākou maikaʻi ma mua o ko kēia mau aupuni? Ua ʻoi anei ka pālahalaha o ko lākou mokuna ma mua o ko ʻoukou mokuna?

³ Auē ka poʻe i hoʻolōʻihi aku i ka lā ʻino, A hoʻokokoke i ka noho hoʻokaumaha wale;

⁴ ¶ Ka poʻe e moe ana ma luna o nā wahi moe niho ʻelepani, A moe hoʻolei loa ma luna o ko lākou wahi moe, A ʻai iho i nā keiki hipa o ka poʻe hipa, A me nā keiki bipi i kūpele ʻia;

⁵ Ka poʻe mele ma muli o ka viola, A hana lākou no lākou iho i nā mea kani e like me Dāvida;

⁶ Ka poʻe inu waina ma loko o nā kīʻaha, A kāhinu iā lākou iho i ka hinu maikaʻi; Akā, ʻaʻole i kaumaha lākou no ka ʻeha ʻana o kā Iosepa!

⁷ No ia mea, ʻānō e hele pio aku ai lākou i waena o ka poʻe pio mua, A e lawe ʻia aku ka ʻoliʻoli o ka poʻe moe hoʻolei loa.

⁸ ¶ Ua hoʻohiki ʻo Iēhova ka Haku, ma kona ola, wahi a Iēhova, ke Akua o nā kaua, “Ke hoʻopailua nei au i ka haʻaheo o Iakoba, A ke hoʻowahāwahā nei hoʻi i kona mau hale aliʻi; No laila, e hoʻolilo aku ai au i ke kūlanakauhale, a me kona mea i piha ai.”

⁹ A inā e waiho ʻia nā kānaka he ʻumi ma ka hale hoʻokahi, e make nō lākou.

¹⁰ A ʻo ka hoahānau o kona makua kāne e lawe aku iā ia, a ʻo ka mea i puhi iā ia, e lawe aku i waho i nā iwi mai loko mai o ka hale, a e ʻōlelo aku i ka mea ma loko loa o ka hale, “ʻAʻole anei he mea i koe me ʻoe?” E ʻī mai kēlā, “ʻAʻole.” A laila, e ʻī aku ia, “Hāmau; no ka mea, ʻaʻole e ʻōlelo ma ka inoa ʻo Iēhova.”

¹¹ No ka mea, aia hoʻi, ke kauoha mai nei ʻo Iēhova, a e hahau aku ia i ka hale nui me ka nāhāhā, a i ka hale ʻuʻuku ma ka wāwahi.

¹² ¶ E holo anei nā lio ma luna o nā pōhaku? E mahi ʻōʻō palau ʻia anei ma laila me nā bipi kauō? No ka mea, ua hoʻolilo ʻoukou i ka hoʻopono ʻana i lāʻau make, A i ka hua o ka pono, i lāʻau ʻawaʻawa.

¹³ E ʻoukou, ka poʻe e ʻoliʻoli ana i ka mea ʻole, Ka poʻe e ʻōlelo, “ʻAʻole anei kākou i lawe no kākou i nā pepeiaohao ma ko kākou ikaika?”

¹⁴ “Akā, aia hoʻi, e hoʻāla kūʻē auaneʻi au i lāhui kanaka iā ʻoukou, E ko ka hale o ʻIseraʻela,” wahi a Iēhova, ke Akua o nā kaua; “A e hoʻokaumaha lākou iā ʻoukou mai ke komo ʻana o Hamata A hiki i ke kahawai o ka pāpū.”