ʻAMOSA 5 - Ka Baibala Hemolele

1 He kanikau no kā ʻIseraʻela. 4 He kauoha e ʻimi i ke Akua. 16 Hoʻopaʻi ana ke Akua i ka poʻe hoʻopaʻakikī. 21 Hoʻowahāwahā ke Akua i ko lākou hoʻokamani ʻana a i ko lākou lilo ʻana i poʻe pio.

MOKUNA V.

¹ ¶ E hoʻolohe ʻoukou i kēia ʻōlelo, aʻu e hāpai aku nei no ʻoukou, ʻO ia hoʻi, he kanikau, e ka hale o kā ʻIseraʻela.

² Ua hāʻule, ʻaʻole e ala hou aʻe, Ke kaikamahine puʻupaʻa o kā ʻIseraʻela. Ua kulaʻina ʻo ia ma luna o kona ʻāina iho; ʻAʻohe mea nāna ia e hoʻāla.

³ No ka mea, ke ʻōlelo mai nei ʻo Iēhova ka Haku, pēnēia: “ʻO ko ke kūlanakauhale i hele pātausani aku, e koe mai nō he haneri; A ʻo ka mea i hele pāhaneri aku, e koe mai nō he ʻumi, no ka hale o kā ʻIseraʻela.”

⁴ ¶ No ka mea, ke ʻōlelo mai nei ʻo Iēhova pēnēia i ka hale o kā ʻIseraʻela, “E ʻimi ʻoukou iaʻu, a e ola ʻoukou.

⁵ “Akā, mai ʻimi ʻoukou i Betela, ʻAʻole hoʻi e komo i Gilegala, ʻAʻole e hele aku i Beʻereseba; No ka mea, he ʻoiaʻiʻo, e hele pio aku ko Gilegala, A e lilo ʻo Betela i mea ʻole.

⁶ “E ʻimi ʻoukou iā Iēhova, a e ola ʻoukou; O lele mai ia, me he ahi lā, ma ka hale o Iosepa, A e hoʻopau aku ia, ʻAʻohe mea nāna ia e kinai ma Betela.

⁷ “E ka poʻe i hoʻolilo i ka ʻōlelo hoʻopono i mea ʻawaʻawa, A hoʻolei i ka pono ma ka honua,”

⁸ ¶ E ʻimi i ka mea nāna i hana iā Peleiade a me ʻOriona, A hoʻolilo i ka malu o ka make i mālamalama, A hoʻopouli i ke ao a lilo i pō; Ka Mea e hoʻopiʻi ana i nā wai o ka moana, A ninini iho iā lākou ma luna o ka ʻili o ka honua: ʻO Iēhova kona inoa.

⁹ ʻO ka mea e lawe mai i ka make ma luna o ka poʻe ikaika, A e hoʻohiki mai i ka luku ma luna o kahi paʻa.

¹⁰ ¶ Ke inaina nei lākou i ka mea e aʻo ana ma ka puka pā, A hoʻowahāwahā lākou i ka mea e ʻōlelo pono ana.

¹¹ No ia mea, no ko ʻoukou hehi ʻana ma luna o ka ʻilihune, A ke lawe nei ʻoukou i ka ʻai makana mai ona aku lā; Ua hana ʻoukou i nā hale pōhaku i kālai ʻia, Akā, ʻaʻole ʻoukou e noho i loko o lākou; Ua kanu ʻoukou i nā pā waina maikaʻi, Akā, ʻaʻole ʻoukou e inu i ka waina o lākou.

¹² No ka mea, ua ʻike au, he nui wale ko ʻoukou lawehala ʻana, A me ko ʻoukou mau hewa nui; E hoʻopilikia ana i ka poʻe hoʻopono, e lawe ana i ka uku kīpē, A e hoʻokahuli ana i ka pono o ka poʻe ʻilihune ma ka puka pā.

¹³ No ia mea, e noho mālie ka mea naʻauao i kēlā manawa; No ka mea, he manawa ʻino ia.

¹⁴ ¶ E ʻimi ʻoukou i ka maikaʻi, ʻaʻole i ka hewa, i ola ʻoukou; A pēlā e mau ai ʻo Iēhova, ke Akua o nā kaua me ʻoukou, e like me kā ʻoukou i ʻōlelo ai.

¹⁵ E inaina i ka hewa, a e aloha i ka maikaʻi, A e hoʻokūpaʻa ʻoukou i ka hoʻopono ma ka puka pā; Malia paha e aloha mai ʻo Iēhova, ke Akua o nā kaua, i ke koena o kā Iosepa.

¹⁶ ¶ No ia hoʻi, ke ʻōlelo mai nei ʻo Iēhova, ke Akua o nā kaua, ka Haku, pēnēia: “Ma nā alanui a pau he auē ʻana; A ma nā wahi i waho a pau, e ʻōlelo lākou, ‘Auē! Auē!’ A e kāhea aku lākou i ka mea mahi ʻai i ka ʻū ʻana, A i ka poʻe ʻike e kanikau i ka uē ʻana.

¹⁷ “A ma nā pā waina a pau ka uē ʻana: No ka mea, e hele auaneʻi au i waena ou,” wahi a Iēhova.

¹⁸ ¶ Auē ka poʻe ʻiʻini i ka lā o Iēhova! No ke aha lā kēia iā ʻoukou? ʻO ka lā o Iēhova, he pouli ia, ʻaʻole he mālamalama.

¹⁹ E like me ke kanaka i holo mai ke alo aku o ka liona, a hālāwai ka bea me ia; A i komo paha i loko o ka hale, a hilinaʻi kona lima ma ka paia, a nahu mai ka nahesa iā ia.

²⁰ ʻAʻole anei he pouli ka lā o Iēhova, me ka mālamalama ʻole? A he pouli loa, ʻaʻohe ona mālamalama.

²¹ ¶ “Ke inaina nei au, ke hoʻowahāwahā nei au i ko ʻoukou mau ʻahaʻaina, ʻAʻole wau e ʻoluʻolu i ko ʻoukou mau hālāwai ʻana.

²² “Inā e kaumaha mai ʻoukou noʻu i kā ʻoukou mau mōhai kuni, a me kā ʻoukou mau mōhai makana, ʻaʻole au e ʻoluʻolu ia mea: ʻAʻole hoʻi au e manaʻo i ka mōhai aloha o ko ʻoukou mau mea momona.

²³ “E lawe aʻe ʻoe mai oʻu aku nei i ke oli ʻana o kā ʻoukou mau mele; ʻAʻole au e hoʻolohe i ke kani ʻana o ko ʻoukou mau viola.

²⁴ “Akā, e hoʻokahe ʻia ka hoʻopono ʻana e like me ka wai, A ʻo ka pono e like me ka waikahe ikaika.

²⁵ ¶ “Ua kaumaha mai anei ʻoukou naʻu i nā mōhai, a me nā makana ma ka wao nahele i nā makahiki he kanahā, e ka hale o kā ʻIseraʻela?

²⁶ “Ua hali ʻoukou i ka halelewa o ko ʻoukou Moloka, a me ka hale o ko ʻoukou mau kiʻi, ka hōkū o ko ʻoukou akua, ka mea a ʻoukou i hana ai no ʻoukou.

²⁷ “No laila, e lawe pio aku au iā ʻoukou ma ʻō aku o Damaseko,” wahi a Iēhova, ke Akua o nā kaua, kona inoa.