ʻAMOSA 4 - Ka Baibala Hemolele

1 Aʻo ʻia mai ʻo kā ʻIseraʻela, no ka hoʻokaumaha ʻana, a no ka hoʻomana kiʻi. 6 Hoʻomau lākou i ka hoʻopaʻakikī. 12 Aʻo ʻia mai lākou e hoʻomākaukau e hālāwai me ke Akua; no ka mea, kokoke hoʻopaʻi mai kēlā iā lākou.

MOKUNA IV.

¹ ¶ E hoʻolohe ʻoukou i kēia ʻōlelo, e nā bipi wahine o Basana, Nā mea ma nā mauna o Samaria, Nā mea e hoʻokaumaha ana i ka poʻe ʻilihune, Nā mea e hoʻoluhi ana i ka poʻe nele, Nā mea e ʻōlelo ana i ko lākou mau haku, “E lawe mai, a e inu kākou.”

² Ua hoʻohiki ʻo Iēhova ka Haku, ma kona hemolele, “Aia hoʻi, e hiki mai ana nā lā ma luna o ʻoukou, E lawe aku ai ʻo ia iā ʻoukou me nā kīlou, A i ka poʻe ma hope o ʻoukou i nā makau lawaiʻa.

³ “A e puka aku ʻoukou, ma nā wahi hiolo, ʻo kēlā mea kēia mea ma kona alo, A e hoʻolei ʻia aku i waho o ka pā kaua,” wahi a Iēhova.

⁴ ¶ “E hele mai ʻoukou i Betela, a e hana hewa; E hoʻonui i ka hana hewa ma Gilegala; A lawe mai ʻoukou i kā ʻoukou mau mōhai no ke kakahiaka, A i nā hapaʻumi o ʻoukou no ke kolu o nā makahiki.

⁵ “A e puhi i ka berena hū i mōhai aloha, A e hōʻike aku i nā mōhai aloha i lohe; No ka mea, ʻo kā ʻoukou makemake nō ia, e nā mamo a ʻIseraʻela,” wahi a Iēhova ka Haku.

⁶ ¶ “A ua hāʻawi aku hoʻi au iā ʻoukou i ka maʻemaʻe o nā niho ma ko ʻoukou mau kūlanakauhale a pau, A i ka nele i ka berena ma ko ʻoukou mau wahi a pau; Akā, ʻaʻole ʻoukou i hoʻi hou mai iaʻu,” wahi a Iēhova.

⁷ “A paʻa iaʻu ka ua, mai o ʻoukou aku, i ka manawa ʻekolu malama i koe a hiki i ka ʻohi ʻana; A hoʻoua iho au ma luna o kekahi kūlanakauhale, A hoʻoua ʻole au ma luna o kekahi kūlanakauhale: Ua hoʻoua ʻia kauwahi, A ʻo kahi i hoʻoua ʻole ʻia, ua maloʻo.

⁸ “A hele aku ʻelua ʻekolu paha nā kūlanakauhale i kekahi kūlanakauhale e inu i ka wai, ʻaʻole naʻe i kena; Akā, ʻaʻole ʻoukou i hoʻi hou mai iaʻu,” wahi a Iēhova.

⁹ “Ua hahau aku au iā ʻoukou i ka hua ʻai maʻalili, a me ka punahelu; He nui ko ʻoukou kīhāpai, ko ʻoukou mau pā waina, a me ko ʻoukou mau lāʻau fiku, a me ko ʻoukou mau lāʻau ʻoliva, ua ʻai ʻia hoʻi e ka ʻūhini ʻōpiopio hulu ʻole; Akā, ʻaʻole ʻoukou i hoʻi hou mai iaʻu,” wahi a Iēhova.

¹⁰ “A ua hoʻouna aku au i waena o ʻoukou i ke ahulau, e like me ia ma ʻAigupita; Ua luku aku au i ko ʻoukou poʻe kānaka ʻōpio i ka pahi kaua, Me ko ʻoukou poʻe lio i pio ʻia; A ua hoʻopiʻi aʻe au i ka pilau o ko ʻoukou hoʻomoana ʻana, a hiki i ko ʻoukou mau ihu; Akā, ʻaʻole ʻoukou i hoʻi hou mai iaʻu,” wahi a Iēhova.

¹¹ “Ua luku aku au i waena o ʻoukou, E like me ka luku ʻana o ke Akua iā Sodoma a me Gomora; Ua like hoʻi ʻoukou me ka momoku ahi i kāʻili ʻia mai loko mai o ke ahi; Akā, ʻaʻole ʻoukou i hoʻi hou mai iaʻu,” wahi a Iēhova.

¹² “No ia mea, pēlā au e hana aku ai iā ʻoe, e kā ʻIseraʻela; A no kaʻu hana ʻana aku i kēia iā ʻoe, E hoʻomākaukau ʻoe e hālāwai me kou Akua, e kā ʻIseraʻela.”

¹³ No ka mea, aia hoʻi, ʻo ka mea nāna i hana nā mauna, A ʻo ka mea i hana i ka makani, A haʻi aku i ke kanaka i kona manaʻo, A ʻo ka mea i hoʻolilo i ka wanaʻao i pouli, ʻO ka mea e hehi ana ma luna o nā wahi kiʻekiʻe o ka honua, ʻO Iēhova, ke Akua o nā kaua, kona inoa.