ʻAMOSA 3 - Ka Baibala Hemolele

1 Aʻo akula ke Akua i kā ʻIseraʻela a me kā Iuda, a hōʻike i kona hoʻopaʻi ʻana iā lākou. 9 Kāhea aku ia i ko Pilisetia, a me ko ʻAigupita e nānā mai i ka hoʻopaʻi ʻana i ko Samaria a me kā ʻIseraʻela a pau no ko lākou hewa.

MOKUNA III.

¹ ¶ E hoʻolohe i kēia ʻōlelo a Iēhova i ʻōlelo mai ai no ʻoukou, e nā mamo a ʻIseraʻela, No ka ʻohana a pau, aʻu i lawe mai ai mai ka ʻāina ʻo ʻAigupita mai, ʻī maila,

² “ʻO ʻoukou wale nō kaʻu i ʻike ai, ma mua o nā ʻohana a pau o ka honua; No ia mea, e hoʻopaʻi aku ai au iā ʻoukou no ko ʻoukou hewa a pau.”

³ E hiki anei i nā mea ʻelua ke hele pū, ke kuʻikahi pū ʻole lāua?

⁴ E uō anei ka liona ma ka ulu lāʻau ke loaʻa ʻole iā ia ke pio? E hoʻopuka anei ka liona ʻōpio i kona leo mai kona lua aku, ke loaʻa ʻole iā ia kekahi mea?

⁵ E hāʻule anei ka manu i loko o ka pahele ma ka honua ke ʻole ka pahele nona? E lawe anei kekahi i ka pahele mai ka honua aʻe ke loaʻa ʻole iā ia kekahi mea iki?

⁶ E puhi ʻia anei ka pū ma ke kūlanakauhale, a pīhoihoi ʻole nā kānaka? He ʻino anei ma loko o ke kūlanakauhale, ʻaʻole na Iēhova ia i hana?

⁷ No ka mea, ʻaʻole e hana mai ʻo Iēhova ka Haku i kekahi mea, Ke hōʻike ʻole mai ia i kona mea huna i kāna mau kauā, i nā kāula.

⁸ Ua uō mai ka liona, ʻo wai lā ka mea makaʻu ʻole? Ua ʻōlelo mai ʻo Iēhova ka Haku, ʻo wai lā ka mea wānana ʻole?

⁹ ¶ E haʻi aku ma nā hale aliʻi i ʻAsedoda, a ma nā hale aliʻi i ka ʻāina ʻo ʻAigupita, a e ʻī aku, “E hoʻākoakoa ʻia ʻoukou ma luna o nā mauna o Samaria, a e nānā i ka haunaele nui i waenakonu ona, a i nā hoʻokaumaha ʻana i loko ona.

¹⁰ “ʻAʻole lākou e ʻike e hana i ka pono,” wahi a Iēhova, “hōʻiliʻili lākou i ka waiwai ʻālunu, a i ka mea kāʻili wale, i loko o ko lākou mau hale aliʻi.”

¹¹ ¶ No ia mea, ke ʻōlelo mai nei ʻo Iēhova ka Haku, pēnēia: “E hele mai auaneʻi ka ʻenemi, a puni ka ʻāina; A e lawe aku ia i kou ikaika mai ou aku lā, A e hao ʻia kou mau hale aliʻi.”

¹² Ke ʻōlelo mai nei ʻo Iēhova, pēnēia: “E like me ke kahu hipa i hoʻopakele mai loko mai o ka waha o ka liona, i nā wāwae ʻelua a me kekahi ʻāpana o ka pepeiao; Pēlā e hoʻopakele ʻia nā mamo a ʻIseraʻela, ka poʻe e noho ana ma Samaria ma ke kihi o kahi moe, a ma Damaseko ma kahi hikieʻe.

¹³ “E hoʻolohe ʻoukou, a e hōʻike aku i ko ka hale o Iakoba,” wahi a Iēhova ka Haku, ke Akua o nā kaua.

¹⁴ “A i ka lā aʻu e hoʻopaʻi aku ai i ka hewa o kā ʻIseraʻela i luna ona, A e hoʻopaʻi hoʻi au i nā kuahu o Betela; A e ʻoki ʻia nā pepeiaohao o ke kuahu, a hāʻule ihola ia i lalo i ka honua.

¹⁵ “A e wāhi aku au i ka hale hoʻoilo me ka hale kau. A e wāwahi ʻia nā hale niho ʻelepani, A hoʻopau ʻia hoʻi nā hale nui,” wahi a Iēhova.