ʻAMOSA 2 - Ka Baibala Hemolele

1 ʻO ka hoʻopaʻi ʻana i kā Moaba no kā lākou hana ʻino ʻana; 4 i kā Iuda no ka hoʻowahāwahā ʻana i ke kānāwai o ke Akua; 6 i kā ʻIseraʻela no ka hoʻomana kiʻi, no ka hana hewa, a no ka loko ʻino.

MOKUNA II.

¹ ¶ ʻŌlelo mai ʻo Iēhova, penei: “No nā hala ʻekolu o kā Moaba, a me ka hā, ʻAʻole au e hoʻololi aʻe i kona hoʻopaʻi ʻia; No ka mea, ua puhi aku ia i nā iwi o ke aliʻi o ʻEdoma i puna.

² “Akā, e hoʻolei aku au i ke ahi i loko o Moaba; A e hoʻopau aku ia i nā hale aliʻi o Kiriota; A e make ana kā Moaba, me ka haunaele, Me ka hoʻōho, a me ke kani ʻana o ka pū.

³ “A e hōʻoki aku au i ka luna kānāwai mai waena mai ona, A e pepehi aku au i kona mau luna a pau me ia,” wahi a Iēhova.

⁴ ¶ Ke ʻōlelo mai nei ʻo Iēhova, pēnēia: No nā hala ʻekolu o kā Iuda, a me ka hā, ʻaʻole au e hoʻololi aʻe i kona hoʻopaʻi ʻia; No ka mea, ua hoʻowahāwahā lākou i ke kānāwai o Iēhova, A ua mālama ʻole i kāna mau kauoha, A ua hōʻauana akula ko lākou mau mea wahaheʻe iā lākou, Ma muli o nā mea a ko lākou mau mākua i hele ai.

⁵ “Akā, e hoʻouna aku au i ke ahi ma luna o Iuda, A e hoʻopau aku ia i nā hale aliʻi o Ierusalema.”

⁶ ¶ Ke ʻōlelo mai nei ʻo Iēhova penei: “No nā hala ʻekolu o kā ʻIseraʻela, a me ka hā, ʻaʻole au e hoʻololi aʻe i kona hoʻopaʻi ʻia; No ka mea, ua kūʻai aku lākou i ka poʻe pono no ke kālā, A i ka mea ʻilihune no ka paʻa kāmaʻa.”

⁷ “E kuko ana i ka lepo o ka honua ma luna o ke poʻo o nā ʻilihune, A hoʻololi aʻe i ka hoʻāpono ʻia o ka poʻe pōpilikia; A komo aku ke kanaka, a me kona makua kāne i loko i ke kaikamahine hoʻokahi, I mea e hoʻohaumia ai i koʻu inoa hoʻāno.

⁸ “A moe iho lākou ma luna o nā kapa i lawe ʻia i uku pānaʻi, ma kēlā kuahu kēia kuahu, A inu nō lākou i ka waina o ka poʻe i hoʻopaʻi ʻia ma ka hale o ko lākou mau akua.

⁹ ¶ “A ua luku aku au i kā ʻAmora i mua o lākou, ʻO kona kiʻekiʻe, ua like me ke kiʻekiʻe o nā lāʻau kedara, A ʻo kona ikaika, ua like me nā lāʻau ʻoka; Akā, ua luku aku au i kona hua ma luna, A me kona aʻa ma lalo.

¹⁰ “A ua lawe mai hoʻi au iā ʻoukou mai ka ʻāina ʻo ʻAigupita mai, A alakaʻi iā ʻoukou ma ka wao nahele i nā makahiki he kanahā, E komo ai i ka ʻāina o kā ʻAmora.

¹¹ “A ua hoʻolilo au i kekahi o kā ʻoukou poʻe keiki, i poʻe kāula, A ʻo ka poʻe kānaka ʻōpiopio o ʻoukou, i poʻe Nazarite. ʻAʻole anei pēlā, e nā mamo a ʻIseraʻela?” wahi a Iēhova.

¹² “Akā, hoʻoinu ʻoukou i ka poʻe Nazarite i ka waina, A pāpā aku ʻoukou i nā kāula, ʻī akula, ‘Mai wānana ʻoukou!’

¹³ “Aia hoʻi, e kaomi iho au iā ʻoukou, E like me ke kaomi ʻana o ke kaʻa i piha i nā pua.

¹⁴ “A e nalowale ka māmā mai ka mea māmā aku, A ʻo ka mea ikaika, ʻaʻole ia e hoʻokūpaʻa i kona ikaika, ʻAʻole hoʻi e hoʻopakele ka mea mana iā ia iho.

¹⁵ “ʻAʻole hoʻi e kūpaʻa ka mea e lawe ana i ke kakaka; A ʻo ka mea wāwae māmā, ʻaʻole ia e pakele: ʻAʻole hoʻi ka mea holo ma luna o ka lio e hoʻopakele i kona ola.

¹⁶ “A ʻo ka mea ikaika ma kona naʻau i waena o ka poʻe ikaika, E holo kohana aku ia ia lā,” wahi a Iēhova.