ʻAMOSA 1 - Ka Baibala Hemolele

1 No ke kāula, a no ka manawa i wānana ai ʻo ia. 3 No ka hoʻopaʻi ʻana a ke Akua i ko Suria, 6 i ko Pilisetia, 9 i ko Turo, 11 i ko ʻEdoma; 13 a me kā ʻAmona.

MOKUNA I.

¹ ¶ ʻO nā ʻōlelo a ʻAmosa, ka mea i waena o nā kahu bipi o Tekoa, nā mea āna i ʻike ai no kā ʻIseraʻela, i nā lā o ʻUzia, ke aliʻi o kā Iuda, a i nā lā o Ieroboama, ke keiki a Ioasa, ke aliʻi o kā ʻIseraʻela, ʻelua makahiki ma mua o ke ōlaʻi.

² A ʻī akula ia, “E uō mai ʻo Iēhova mai Ziona mai, A e hoʻopuka mai i kona leo mai Ierusalema mai; E uē nō nā wahi noho o nā kahu hipa, A e maloʻo ka piko o Karemela.”

³ ¶ Penei kā Iēhova i ʻōlelo ai, “No nā hala ʻekolu o Damaseko, a me ka hā, ʻaʻole au e hoʻololi aʻe i kona hoʻopaʻi ʻia; No ka mea, ua hehi lākou i ko Gileada me ka mea hao e hehi palaoa ai.

⁴ “A e hoʻouna aku ai i ke ahi i loko o ka hale o Hazaʻela, Ka mea e hoʻopau ai i nā hale aliʻi o Bene-Hadada.

⁵ “A e haki nō iaʻu ke kaola o Damaseko, A e hōʻoki aku au i nā kānaka mai ke awāwa ʻo ʻAvena aku, A me ka mea e hoʻopaʻa ana i ke koʻokoʻo aliʻi, mai ka hale o ʻEdena aku; A e hele pio akula nā kānaka o Suria i Kira,” wahi a Iēhova.

⁶ ¶ Ke ʻōlelo mai nei ʻo Iēhova, penei, “No nā hala ʻekolu o Gaza, a me ka hā, ʻaʻole au e hoʻololi aʻe i kona hoʻopaʻi ʻia; No ko lākou lawe pio ʻana i ka poʻe pio a pau, A hāʻawi aku iā lākou i kā ʻEdoma.

⁷ “Akā, e hoʻolei aku au i ke ahi ma loko o ka pā pōhaku o Gaza, A e hoʻopau aku ia i kona mau hale aliʻi;

⁸ “A e hōʻoki aku au i kānaka mai ʻAsedoda aku, A me ka mea e hoʻopaʻa ana i ka hōʻailona mōʻī mai ʻAsekelona aku; A e hoʻokūʻē aku au i kuʻu lima i ʻEkerona; A e make ke koena o ko Pilisetia,” wahi a Iēhova ka Haku.

⁹ ¶ Ke ʻōlelo mai nei ʻo Iēhova, pēnēia: “No nā hala ʻekolu, o Turo, a me ka hā, ʻaʻole au e hoʻololi aʻe i kona hoʻopaʻi ʻia; No ka mea, ua hoʻolilo lākou i ka poʻe pio a pau i ko ʻEdoma, ʻAʻole hoʻi i hoʻomanaʻo i ka berita o nā hoahānau.

¹⁰ “Akā, e hoʻolei aku au i ke ahi i loko o ka pā pōhaku o Turo, Ka mea e hoʻopau ai i kona mau hale aliʻi.”

¹¹ ¶ Ke ʻōlelo mai nei ʻo Iēhova, penei: “No nā hala ʻekolu o kā ʻEdoma, a me ka hā, ʻaʻole au e hoʻololi aʻe i kona hoʻopaʻi ʻia: No ka mea, ua hahai aku ia i kona hoahānau me ka pahi kaua, A ua haʻalele aku i kona aloha, A ua haehae mau loa kona inaina, A ua hoʻomau loa ia i kona huhū.

¹² “A e hoʻolei aku au i ke ahi i loko o Temana, A e hoʻopau aku ia i nā hale aliʻi o Bozera.”

¹³ ¶ Ke ʻōlelo mai nei ʻo Iēhova, penei: “No nā hala ʻekolu o nā mamo a ʻAmona, a me ka hā, ʻaʻole au e hoʻololi aʻe i kona hoʻopaʻi ʻia; No ka mea, ua kaha aku lākou i nā wāhine hāpai o Gileada, I hoʻopālahalaha aku ai lākou i ko lākou palena.

¹⁴ “Akā, e hoʻā aku au i ke ahi i loko o ka pā pōhaku o Raba, A e hoʻopau aku ia i nā hale aliʻi ona, Me ka hoʻōho i ka lā o ke kaua, Me ka ʻino i ka lā o ka puahiohio.

¹⁵ “A e hele aku nō ko lākou aliʻi i loko o ke pio, ʻO ia a me kāna mau kaukaualiʻi kekahi,” wahi a Iēhova.