NĀ ʻOIHANA A KA POʻE LUNAʻŌLELO 8 - Ka Baibala Hemolele

1 No ka hōʻino ʻia ʻo ka ʻekalesia. 9 No Simona, a me Pilipo, a me ka luna ʻo Kanedake.

MOKUNA VIII.

¹ ¶ E ʻae mai ana nō ʻo Saulo i kona make. Ia lā, hoʻomaʻau nui ʻia maila ka ʻekalesia ma Ierusalema; hoʻopuehu ʻia akula lākou a pau ma nā ʻāina o Iudea, a ma Samaria; koe nō naʻe nā lunaʻōlelo.

² Hoʻolewa akula kekahi poʻe kānaka haipule iā Setepano, a kanikau loa lākou iā ia.

³ Luku aʻela ʻo Saulo i ka ʻekalesia, komo aku nō ia i nā hale, a kauō mai i nā kāne a me nā wāhine, a hahao aʻela iā lākou i loko o ka hale paʻahao.

⁴ ¶ No ia mea, kaʻahele aʻela ka poʻe i hoʻopuehu ʻia, e haʻi aku ana i ka ʻeuanelio.

⁵ A iho aʻela ʻo Pilipo i ke kūlanakauhale ʻo Samaria, a haʻi akula iā Kristo iā lākou.

⁶ Mālama lōkahi nā lehulehu i nā mea a Pilipo i ʻōlelo mai ai, me ka hoʻolohe, a me ka nānā aku i nā hōʻailona āna i hana ai.

⁷ No ka mea, ua nui loa ka poʻe ʻuhane haukaʻe i walaʻau aku me ka leo nui, puka maila lākou ma waho o ka poʻe i uluhia ai; a nui loa ka poʻe lōlō a me ka poʻe ʻoʻopa i hoʻōla ʻia mai.

⁸ Nui loa ihola ka ʻoliʻoli ma kēlā kūlanakauhale.

⁹ ¶ Ma laila nō kekahi kanaka, ʻo Simona ka inoa, he kilo nō ia ma mua mai ma ia kūlanakauhale, a pilihua ka lāhui kanaka o Samaria iā ia, i kāna ʻōlelo ʻana, ʻo kekahi mea nui ia.

¹⁰ A mālama maila lākou a pau iā ia, mai ka poʻe ʻuʻuku mai, a ka poʻe nui, ʻī aʻela, “ʻO ia nei nō ka Mana Nui o ke Akua.”

¹¹ Mālama nō lākou i kāna; no ka mea, lōʻihi ka manawa i hoʻopilihua ai ʻo ia iā lākou i ke kilokilo ʻana.

¹² A i ko lākou manaʻoʻiʻo ʻana iā Pilipo, i kāna haʻi ʻana mai i ka ʻeuanelio no ke aupuni o ke Akua, a me ka inoa ʻo Iesū Kristo, bapetizo ʻia ihola lākou, nā kāne a me nā wāhine.

¹³ ʻO Simona nō hoʻi kahi i manaʻoʻiʻo aku; a bapetizo ʻia ihola nō hoʻi ia, a e hoʻomau ana me Pilipo, e ʻike ihola ia i nā mea mana, a me nā hōʻailona nui i hana ʻia, pilihua ihola ia.

¹⁴ ¶ A lohe ka poʻe lunaʻōlelo ma Ierusalema, ua loaʻa i ko Samaria ka ʻōlelo a ke Akua, hoʻouna aʻela lākou iā Petero a me Ioane i o lākou lā.

¹⁵ Iho aʻela lāua, pule akula lāua no lākou, i loaʻa iā lākou ka ʻUhane Hemolele.

¹⁶ No ka mea, ia manawa, ʻaʻole ia i hāʻule mai ma luna o kekahi o lākou; ua bapetizo wale ʻia nō lākou i loko o ka inoa o ka Haku, ʻo Iesū.

¹⁷ A laila, kau ihola lāua i nā lima ma luna iho o lākou, a loaʻa ihola iā lākou ka ʻUhane Hemolele.

¹⁸ A ʻike ihola ʻo Simona ua hāʻawi ʻia mai ka ʻUhane Hemolele ma ke kau ʻana o nā lima o nā lunaʻōlelo, hāʻawi akula ʻo ia iā lāua i kauwahi kālā,

¹⁹ ʻī akula, “E hāʻawi mai ʻolua i kēia mana naʻu, i loaʻa ai ka ʻUhane Hemolele i ka mea aʻu e kau ai i nā lima ma luna iho.”

²⁰ ʻĪ maila ʻo Petero iā ia, “E lilo pū kāu kālā me ʻoe i ka make, no kou manaʻo e loaʻa mai ka makana o ke Akua ma ke kālā!

²¹ “ʻAʻole ou wahi kuleana, ʻaʻole ou wahi lihi iki ma kēia ʻōlelo; no ka mea, ʻaʻole i pololei kou naʻau i mua i ke alo o ke Akua.

²² “No laila, e mihi ʻoe i kēia hewa ou, a e nonoi aku i ke Akua, inā paha e kala ʻia mai nou ka manaʻo o kou naʻau.

²³ “No ka mea, ua ʻike au, aia nō ʻoe ma loko o ke au ʻawaʻawa, a me ka mea paʻa o ka hewa.”

²⁴ ʻŌlelo akula ʻo Simona, ʻī akula, “E pule aku ʻolua i ka Haku noʻu i hiki ʻole mai ai kēia mau mea a ʻolua e ʻōlelo mai nei ma luna oʻu.”

²⁵ ¶ No laila, a hōʻike lāua me ka haʻi mai i ka ʻōlelo a ka Haku, hoʻi maila lāua i Ierusalema, e haʻi ana i ka ʻeuanelio i nā kauhale he nui loa o ka poʻe Samaria.

²⁶ ¶ A ʻōlelo maila ka ʻānela o ka Haku iā Pilipo, ʻī maila, “E kū ʻoe, a e hele ma ke kūkulu hema, ma ke ala e iho aku ai, mai Ierusalema a Gaza,” he wao nahele nō hoʻi ia.

²⁷ Kū aʻela ia a hele; aia hoʻi, he kanaka no ʻAitiopa, he luna nui na Kanedake, ke aliʻi wahine o ʻAitiopa, ʻo ia nō ma luna o kona waiwai a pau, a ua hele mai nō hoʻi ia i Ierusalema e hoʻomana;

²⁸ e hoʻi aku ana ia e noho ana ma loko o kona hale kaʻa, a e heluhelu ana i kā ke kāula ʻIsaia.

²⁹ ʻŌlelo maila ka ʻUhane iā Pilipo, “E hele ʻoe, e hoʻopili aku ia hale kaʻa.”

³⁰ Holo aʻela ʻo Pilipo, a lohe ihola i kāna heluhelu ʻana i kā ke kāula ʻIsaia, ʻī aʻela ia, “Ua ʻike anei ʻoe i ka mea āu e heluhelu nei?”

³¹ ʻĪ akula kēlā, “Pehea lā e hiki ai iaʻu, ke aʻo ʻole mai kekahi iaʻu?” Nonoi akula ʻo ia iā Pilipo e piʻi aʻe, a e noho pū me ia.

³² Eia kahi o ka Palapala āna i heluhelu ai: “«Ua alakaʻi ʻia akula ia me he hipa lā i ka make; A e like hoʻi me ka hipa keiki i pane ʻole i mua o ka mea nāna e ʻako, pēlā nō ia, ʻAʻole i ʻekemu kona waha.

³³ “I kona hoʻohaʻahaʻa ʻana, ua kāʻili ʻia akula kona hoʻāpono ʻia; Na wai lā hoʻi e haʻi mai i kona hanauna? No ka mea, ua lawe ʻia aku nō kona ola, mai ka honua aku».”

³⁴ ʻŌlelo akula ua luna lā, ʻī akula iā Pilipo, “Ke nīnau aku nei au iā ʻoe, i ʻōlelo mai ke kāula i kēia mea no wai, nona iho anei, no kekahi mea ʻē paha?”

³⁵ A laila, ʻoaka aʻela ʻo Pilipo i kona waha, a ma ua Palapala lā kāna hoʻomaka ʻana e haʻi mai ai iā ia, iā Iesū.

³⁶ A i ko lāua hele ʻana ma ke alaloa, hiki akula lāua ma kahi wai: ʻōlelo aʻe ua luna lā, “Aiʻa, he wai, he aha ka mea e keʻakeʻa mai iaʻu e bapetizo ʻia ai?”

³⁷ ʻĪ aʻela ʻo Pilipo, “Inā i manaʻoʻiʻo ʻoe me ka naʻau a pau, inā ua pono.” ʻĪ maila kēlā, “Ke manaʻoʻiʻo nei au ʻo Iesū Kristo, ʻo ia ke Keiki a ke Akua.”

³⁸ A kēnā akula ia, e kū mālie ke kaʻa. Iho pū ihola lāua i ka wai, ʻo Pilipo a me ua luna lā, a bapetizo aʻela ʻo ia iā ia.

³⁹ A piʻi aʻela lāua, mai ka wai mai, kāʻili akula ka ʻUhane o ka Haku iā Pilipo, ʻaʻole ʻike hou aʻe ua luna lā iā ia. Hoʻi aku nō ia ma kona ala me ka ʻoliʻoli.

⁴⁰ ʻIkea aʻela ʻo Pilipo ma ʻAzoto. I kona hele ʻana, haʻi aʻela ia i ka ʻeuanelio ma nā kūlanakauhale a pau, a hiki akula i Kaisareia.