NĀ ʻOIHANA A KA POʻE LUNAʻŌLELO 7 - Ka Baibala Hemolele

1 Ka ʻōlelo a Setepano. 54 Kona make ʻana.

MOKUNA VII.

¹ ¶ Nīnau akula ke kahuna nui, “Pēlā nō anei kēia mau mea?”

² ¶ ʻĪ maila kēlā, “E nā kānaka, nā hoahānau, a me nā mākua, e hoʻolohe mai; ua ʻikea mai ke Akua nani e ko kākou kupuna e ʻAberahama, i kona noho ʻana ma Mesopotamia, i ka wā ma mua aku o kona noho ʻana ma Harana;

³ a ʻī maila iā ia, ‘«E puka aku ʻoe, mai kou ʻāina aku, a mai kou poʻe hoahānau aku hoʻi, a e hele i ka ʻāina aʻu e kuhikuhi aku ai iā ʻoe».’

⁴ “A laila, hele akula ia ma waho o ka ʻāina o ko Kaledaio, a noho ihola ma Harana; a make kona makua kāne, mai ia wahi mai i lawe mai ai ʻo ia iā ia, a i kēia ʻāina a ʻoukou e noho nei.

⁵ “ʻAʻole hoʻi i hāʻawi ia iā ia i hoʻoilina ma loko ona, ʻaʻole nō i kahi e kū ai ka wāwae; «ua ʻōlelo mai naʻe ʻo ia e hāʻawi mai ia iā ia i kuleana nona, a no kāna poʻe mamo ma hope ona»; ia manawa, ʻaʻole āna keiki.

⁶ “ʻĪ maila ke Akua penei, «e noho malihini ana kāna poʻe mamo ma ka ʻāina ʻē; a e hoʻoluluhi pio ʻia i laila, a e hoʻomāinoino ʻia mai lākou, i nā makahiki ʻehā haneri».

⁷ “‘«A ʻo ka lāhui kanaka a lākou i hoʻokauā ai, naʻu nō ia e hoʻopaʻi aku,’ wahi a ke Akua; ‘A ma hope iho o kēia mau mea, e puka mai lākou i waho, a e mālama mai iaʻu ma kēia wahi».’

⁸ “A hāʻawi maila iā ia i ka berita o ke ʻoki poepoe ʻana; a hānau mai nāna ʻo ʻIsaʻaka, a ʻoki poepoe ihola iā ia i ka walu o ka lā; a na ʻIsaʻaka ʻo Iakoba, a na Iakoba ʻo nā mākualiʻi, he ʻumikumamālua.

⁹ “A huāhuā ihola nā mākualiʻi iā Iosepa, a kūʻai lilo akula iā ia i ko ʻAigupita; aia nō me ia ke Akua,

¹⁰ a nāna nō i hoʻopakele mai iā ia, mai loko mai o kona mau pōpilikia a pau, a hāʻawi mai iā ia i ka lokomaikaʻi ʻia, a me ke akamai i mua o Paraʻo, ʻo ke aliʻi o ʻAigupita; a hoʻolilo ihola iā ia, i luna ma luna o ʻAigupita, a me kona hale a pau.

¹¹ “Ua hiki mai he wī ma luna o ka ʻāina a pau ʻo ʻAigupita a me Kanaʻana, a me ka pōpilikia nui; ʻaʻole i loaʻa i ko kākou mau kūpuna ka mea ʻai.

¹² “A lohe aʻela ʻo Iakoba he ʻai ma ʻAigupita, hoʻouna mua akula ia i ko kākou mau kūpuna.

¹³ “A i ka lua o ka hele ʻana hōʻike mai ʻo Iosepa iā ia iho i kona poʻe hoahānau, a hōʻike ʻia akula ka ʻohana o Iosepa iā Paraʻo.

¹⁴ “A laila, hoʻouna maila ʻo Iosepa, a kiʻi maila i kona makua kāne iā Iakoba, a me kona poʻe hoahānau a pau; he mau ʻuhane kanahikukumamālima lākou.

¹⁵ “Iho aʻela ʻo Iakoba i ʻAigupita, a make ihola ia, a me ko kākou poʻe kūpuna.

¹⁶ “A lawe ʻia akula lākou i Sukema, a waiho ihola ma loko o ka hale lua a ʻAberahama i kūʻai mai ai i ke kālā me nā keiki a Hemora, a ka makua kāne o Sukema mai.

¹⁷ “A kokoke hiki mai ka wā i ʻōlelo ʻia mai ai, a ke Akua i hoʻohiki mai ai iā ʻAberahama, māhuahua nā kānaka, a lehulehu aʻela ma ʻAigupita;

¹⁸ a «kū maila kekahi aliʻi ʻē aʻe, i ʻike ʻole iā Iosepa».

¹⁹ “Hana maʻalea maila ia i ko kākou lāhui kanaka, a hana ʻino mai i nā kūpuna o kākou, a kiola akula i kā lākou keiki hou, i ʻole lākou e ola.

²⁰ “Ia manawa i hānau ai ʻo Mose, a ua maikaʻi loa ia, a hānai ʻia ʻo ia i ʻekolu malama ma loko o ka hale o kona makua kāne.

²¹ “A i kona wā i hoʻolei ʻia ai ma waho, lawe aʻela ke kaikamahine a Paraʻo iā ia, a mālama ihola i keiki nāna.

²² “Ua aʻo ʻia ʻo Mose i ke akamai a pau o ko ʻAigupita, a ua mana hoʻi ma nā ʻōlelo, a ma nā hana ʻana.

²³ “A hala nā makahiki ona he kanahā, kupu ihola ka manaʻo ma loko o kona naʻau, e hele aku e ʻike i kona poʻe hoahānau, i ka poʻe mamo a ʻIseraʻela.

²⁴ “A ʻike akula ia i kekahi mea e hana ʻino ʻia ana, kōkua akula ʻo ia iā ia, a hoʻoponopono ma muli o ka mea i hoʻoluhi hewa ʻia mai, a pepehi akula i ke kanaka o ʻAigupita.

²⁵ “Manaʻo ihola ia e hoʻomaopopo auaneʻi kona poʻe hoahānau e hāʻawi mai ana ke Akua i ola no lākou, ma kona lima; akā, ʻaʻole lākou i ʻike.

²⁶ “A ia lā aʻe, ʻikea ʻo ia iā lākou e paio ana, a koi akula ʻo ia iā lāua e kuʻikahi, ʻī aʻela, ‘E nā kānaka, he mau hoahānau ʻolua, no ke aha lā ʻolua e hana ʻino nei kekahi i kekahi?’

²⁷ “Akā, ʻo ka mea hana ʻino i ka hoa, kipaku akula ʻo ia iā ia, ʻī akula, ‘«Na wai lā ʻoe i hoʻonoho ai i aliʻi, a i luna kānāwai ma luna o mākou»?

²⁸ ‘«Ke manaʻo nei anei ʻoe e pepehi mai iaʻu, e like me kou pepehi ʻana i ke kanaka o ʻAigupita i nehinei»?’

²⁹ “«Holo akula ʻo Mose» no kēia ʻōlelo, «a lilo i malihini ma ka ʻāina Midiana», ma laila i hānau ai nāna, nā keiki kāne ʻelua.

³⁰ “A pau nā makahiki hoʻokahi kanahā, «ʻike ʻia maila he ʻānela o ka Haku iā ia, ma ka wao nahele, ma ka Mauna Sinai, ma loko o ka lapalapa ahi o ka lāʻau ʻoʻoi».

³¹ “A ʻike akula ʻo Mose, kāhāhā akula i kēia mea i ʻike ʻia; a hoʻokokoke akula nō hoʻi ia e mākaʻikaʻi, a hiki mai ka leo o ka Haku i ona lā:

³² ‘«ʻO wau nō ke Akua o kou mau mākua, ke Akua o ʻAberahama, ke Akua o ʻIsaʻaka, ke Akua o Iakoba».’ Haʻalulu ihola ʻo Mose, a makaʻu ke mākaʻikaʻi aku.

³³ “«ʻŌlelo maila ka Haku iā ia, ‘E wehe ʻoe i kou mau kāmaʻa, mai kou mau kapuaʻi aku; no ka mea, ʻo kahi āu e kū nei, he ʻāina hoʻāno ia.

³⁴ ‘I ka nānā ʻana, ua ʻike au i ka pōʻino ʻana o koʻu poʻe kānaka ma ʻAigupita, a ua lohe nō au i ko lākou kaniʻuhū ʻana, a ua iho mai nei au e hoʻopakele iā lākou; e hele mai hoʻi ʻoe, a e hoʻouna aku au iā ʻoe i ʻAigupita».’

³⁵ “ʻO ua Mose lā, ka mea a lākou i hōʻole ai, me ka ʻī ʻana aʻe, ‘«ʻO wai ka mea i hoʻonoho iā ʻoe, i aliʻi, a i luna kānāwai»?’ ʻO ia nō kā ke Akua i hoʻouna aku ai i aliʻi, a i ola, ma ka lima o ka ʻānela āna i ʻike aku ai i waena o ka lāʻau ʻoʻoi.

³⁶ “Nāna nō lākou i alakaʻi i waho, e hana ana i nā mea kupanaha, a me nā hōʻailona ma ka ʻāina ʻo ʻAigupita, a me ke Kai ʻUla, a ma ka wao nahele i nā makahiki hoʻokahi kanahā.

³⁷ “ʻO ua Mose lā kēia, ka mea nāna i ʻōlelo mai i nā mamo a ʻIseraʻela, ‘«E hoʻāla mai ana ka Haku, ko ʻoukou Akua, i kekahi kāula, mai loko mai o ko ʻoukou poʻe hoahānau, e like me aʻu nei; ʻo ia nō kā ʻoukou e hoʻolohe aku ai».’

³⁸ “ʻO ia nō ka mea ma loko o ka ʻekalesia ma ka wao nahele me ka ʻānela nāna i ʻōlelo mai iā ia, ma ka mauna ma Sinai, a me ko kākou poʻe kūpuna hoʻi; a loaʻa nō iā ia nā ʻōlelo hoʻōla, e hāʻawi mai iā kākou.

³⁹ “ʻAʻole i makemake ai ko kākou poʻe kūpuna e hoʻolohe iā ia; akā, kipaku akula, a ma ka naʻau, huli hou nō lākou i ʻAigupita,

⁴⁰ «ʻī aʻela iā ʻAʻarona, ‘E hana ʻoe i mau akua no kākou, e hele aku ma mua o kākou; no ka mea, ʻo ua Mose lā, ka mea i alakaʻi mai iā kākou nei, mai ka ʻāina ʻo ʻAigupita mai, ʻaʻole kākou i ʻike i kona wahi i lilo aku ai».’

⁴¹ “A ia mau lā, hana ihola lākou i bipi keiki, a hāʻawi akula i mōhai na ua kiʻi akua lā, a ʻoliʻoli ihola lākou i ka mea a ko lākou mau lima iho i hana ai.

⁴² “A laila huli akula ke Akua, a kuʻu maila iā lākou e hoʻomana aku i ka pūʻali o ka lani; e like me ka mea i palapala ʻia ma loko o ka buke a ka poʻe Kāula, ‘«E ka ʻohana a ʻIseraʻela ē, ua lawe mai anei ʻoukou naʻu i nā mea i pepehi ʻia, a me nā mōhai, i nā makahiki hoʻokahi kanahā ma ka wao nahele?

⁴³ ‘A ua kaʻikaʻi ʻoukou i ka halelewa o Moloka, a me ka hōkū o ko ʻoukou akua ʻo Remepana, i nā kiʻi a ʻoukou i hana ai, i mea e hoʻomana aku ai iā lākou; a naʻu nō ʻoukou e lawe aku ma ʻō aku o Babulona».’

⁴⁴ “Ua loaʻa nō i ko kākou poʻe kūpuna ma ka wao nahele, ka halelewa hōʻike, e like me ka ʻōlelo āna i ʻōlelo mai ai iā Mose, e hana ia mea, me ke kumu āna i ʻike ai.

⁴⁵ “ʻO ka mea hoʻi a ko kākou poʻe kūpuna i lawe a kaʻi mai ai me Iosua, i ke kuleana o ka lāhui kanaka ʻē a ke Akua i kipaku aku ai, mai ka maka aku o ko kākou poʻe kūpuna, a hiki wale mai i nā lā o Dāvida.

⁴⁶ “Loaʻa nō hoʻi iā ia ka lokomaikaʻi ʻia mai i mua i ke alo o ke Akua, noi akula ia e hoʻomākaukau i wahi e noho ai, no ke Akua o Iakoba.

⁴⁷ “Na Solomona naʻe i kūkulu i hale nona.

⁴⁸ “Akā, ʻaʻole e noho ka Mea Kiʻekiʻe ma loko o nā luakini i hana ʻia e nā lima; e like me ka mea i ʻōlelo ʻia mai ai e ke kāula:

⁴⁹ ‘«ʻO ka lani koʻu noho aliʻi, A ʻo ka honua hoʻi koʻu keʻehana wāwae. He aha ka hale a ʻoukou e kūkulu ai noʻu»?’ wahi a ka Haku; ‘«He aha hoʻi koʻu wahi e maha ai?

⁵⁰ ‘ʻAʻole anei na koʻu lima i hana kēia mau mea a pau»?’

⁵¹ ¶ “E ka poʻe ʻāʻī ʻoʻoleʻa, ka poʻe i ʻoki poepoe ʻole ʻia ma ka naʻau, a ma ka pepeiao, ua mau loa ko ʻoukou pale ʻana i ka ʻUhane Hemolele; e like me ko ʻoukou kūpuna, pēlā nō hoʻi ʻoukou nei.

⁵² “ʻO wai kekahi mea o ka poʻe kāula i hoʻomaʻau ʻole ʻia e ko ʻoukou poʻe kūpuna? Ua pepehi hoʻi lākou i ka poʻe nāna i haʻi mua mai i ka hiki ʻana mai o ka Mea Hemolele, ka mea a ʻoukou i kumakaia iho nei a pepehi ihola.

⁵³ “Ua loaʻa nō hoʻi iā ʻoukou ke kānāwai, na ka poʻe ʻānela i hoʻolaha mai, ʻaʻole naʻe ʻoukou i mālama.”

⁵⁴ ¶ A lohe lākou i kēia mau mea, walania ihola ko lākou naʻau, nau ihola ko lākou mau kuʻi iā ia.

⁵⁵ Akā, ua piha nō ia i ka ʻUhane Hemolele, a haka pono akula ia i ka lani, a ʻike akula i ka nani o ke Akua, a me Iesū e kū ana ma ka lima ʻākau o ke Akua;

⁵⁶ ʻī maila ia, “Aia hoʻi, ke ʻike aku nei au i nā lani e hāmama ana, a me ke Keiki a ke Kanaka e kū ana ma ka lima ʻākau o ke Akua.”

⁵⁷ ʻUā akula lākou me ka leo nui, papani ihola i ko lākou mau pepeiao, a lele lōkahi maila ma luna ona.

⁵⁸ Kiola akula iā ia ma waho o ke kūlanakauhale, a hailuku akula; a waiho ihola nā mea hōʻike i ko lākou ʻaʻahu ma ka wāwae o kekahi kanaka uʻi, i kapa ʻia ʻo Saulo.

⁵⁹ Hailuku akula lākou iā Setepano, kāhea ana me ka ʻōlelo aku, “E ka Haku, e Iesū, e hoʻokipa aku ʻoe i kuʻu ʻuhane!”

⁶⁰ Kukuli ihola ia a hea akula me ka leo nui, “E ka Haku, mai kau ʻoe i kēia hewa ma luna o lākou!” A pau kāna ʻōlelo ʻana pēlā, hiamoe ihola ia.