NĀ ʻOIHANA A KA POʻE LUNAʻŌLELO 6 - Ka Baibala Hemolele

1 Ka wae ʻana o nā hiku. 9 Ka hoʻokolokolo ʻana o Setepano.

MOKUNA VI.

¹ ¶ Ia manawa, i ka wā i māhuahua ai nā haumāna, ʻōhumu ihola ka poʻe Helene i ka poʻe Hebera; no ka mea, ua mālama ʻole ʻia ko lākou poʻe wāhine kāne make i ka manawaleʻa ʻana i kēlā lā i kēia lā.

² A laila, hoʻākoakoa ihola ka ʻumikumamālua i nā haumāna a pau, ʻī maila, “ʻAʻole e pono iā mākou, ke waiho wale i ka ʻōlelo a ke Akua, a e mālama i nā papa ʻai.

³ “No ia mea, e ʻimi ʻoukou, e nā hoahānau, i mau kānaka i ʻehiku i waena o ʻoukou, a i ʻike pono ʻia, a piha hoʻi i ka ʻUhane Hemolele, a me ke akamai, a e hoʻonoho kākou iā lākou ma luna o kēia ʻoihana.

⁴ “A e hoʻoikaika mau mākou i ka pule, a me ka hōʻike ʻōlelo.”

⁵ Ua pono kēia ʻōlelo i mua o nā kānaka a pau; a wae maila lākou iā Setepano, he kanaka piha loa i ka manaʻoʻiʻo a me ka ʻUhane Hemolele, a me Pilipo, a me Perokoro, a me Nikanora, a me Timona, a me Paremena, a me Nikolao ka mea i huli mai no ʻAnetioka.

⁶ Hoʻonoho ʻia ihola lākou i mua o ka poʻe lunaʻōlelo; a pule aʻela lākou, a kau ihola i nā lima ma luna o lākou.

⁷ ¶ Hoʻolaha ʻia aʻe ka ʻōlelo a ke Akua, a māhuahua nui akula ka poʻe haumāna ma Ierusalema; a he nui nō nā mea o ka poʻe kāhuna i manaʻoʻiʻo.

⁸ ¶ A ua piha ʻo Setepano i ka manaʻoʻiʻo a me ka mana, hana nō ia i nā mea mana, a me nā mea kupanaha loa, i waena o nā kānaka.

⁹ Akā, kū maila kekahi poʻe no ka Hale Hālāwai (i kapa ʻia) o nā Liberetino, a me ko Kurene, a me ko ʻAlekanederia, a me ko Kilikia, a me ko ʻĀsia, hoʻopaʻapaʻa maila lākou iā Setepano.

¹⁰ ʻAʻole naʻe i hiki iā lākou ke kū i mua o ke akamai a me ke koikoi o kāna ʻōlelo ʻana.

¹¹ A laila, hoʻowalewale akula lākou i mau kānaka, e ʻōlelo mai penei, “Ua lohe mākou iā ia nei e ʻōlelo ana i nā ʻōlelo hōʻino iā Mose, a me ke Akua.”

¹² Hoʻokonokono aʻela lākou i nā kānaka, a me nā lunakahiko, a me ka poʻe kākau ʻōlelo, a lele maila lākou, a hopu ihola iā ia, a alakaʻi akula i mua o ka ʻAha Luna Kānāwai.

¹³ A hoʻonoho maila lākou i mau mea hōʻike wahaheʻe; ʻī maila lākou, “ʻAʻole hoʻōki kēia kanaka i ka ʻōlelo ʻana i nā ʻōlelo hōʻino i kēia wahi hoʻāno, a me ke Kānāwai;

¹⁴ no ka mea, ua lohe nō mākou iā ia e ʻōlelo ana, ʻo Iesū no Nazareta, e hoʻohiolo nō ia i kēia wahi, a e hoʻololi hou nō ia i nā ʻoihana a Mose i hāʻawi mai ai na kākou.”

¹⁵ A ʻo ka poʻe a pau e noho ana ma Kahi Hoʻokolokolo, haka pono akula iā ia, a ʻike ihola i kona maka me he maka ʻānela lā.