NĀ ʻOIHANA A KA POʻE LUNAʻŌLELO 5 - Ka Baibala Hemolele

1 Ka make ʻana o ʻAnania a me Sapeire. 17 Ka paʻa hou ʻana o nā lunaʻōlelo.

MOKUNA V.

¹ ¶ ʻO kekahi kanaka, ʻo ʻAnania ka inoa, me Sapeire kāna wahine, kūʻai lilo akula i ka ʻāina.

² A hoʻāna ʻē ihola ia i kauwahi o ka uku, ua ʻike nō hoʻi kāna wahine, a lawe maila i kekahi, a waiho ihola ma nā wāwae o ka poʻe lunaʻōlelo.

³ ʻĪ akula ʻo Petero, “E ʻAnania, no ke aha lā i hoʻopiha mai ai ʻo Sātana i kou naʻau e wahaheʻe aku i ka ʻUhane Hemolele, a e hoʻāna ʻē i kekahi mea i loaʻa mai ai no ka ʻāina?

⁴ “I ka wā e waiho wale ana, ʻaʻole anei nou ponoʻī ia? A pau i ke kūʻai ʻia, ʻaʻole anei iā ʻoe ka mālama? No ke aha lā i komo ai kēia mea ma loko o kou naʻau? ʻAʻole ʻoe i wahaheʻe aku i kānaka, i ke Akua nō.”

⁵ A lohe ihola ʻo ʻAnania i kēia ʻōlelo, hina ihola ia i lalo, a lele aʻela ke aho. Kau ihola ka makaʻu nui ma luna iho o ka poʻe a pau i lohe i kēia mau mea.

⁶ Kū aʻela nā kānaka uʻi, wahī ihola iā ia, lawe akula i waho, a kanu ihola.

⁷ ¶ A ma hope iho ʻekolu paha hora, komo maila kāna wahine, me ka ʻike ʻole i ka mea i hana ʻia ai.

⁸ ʻĪ akula ʻo Petero iā ia, “E haʻi mai ʻoe iaʻu, ua kūʻai anei ʻolua i ka ʻāina pēlā?” ʻĪ maila kēlā, “ʻAe, pēlā nō.”

⁹ A laila, ʻī akula ʻo Petero iā ia, “Pehea lā i hui pū ai ko ʻolua manaʻo, e hoʻāʻo aku i ka ʻUhane o ka Haku? Aia hoʻi ma ka ʻīpuka nā wāwae o ka poʻe nāna i kanu kāu kāne; e lawe aku nō hoʻi lākou iā ʻoe iho.”

¹⁰ A laila, hina ihola ia ma kona mau wāwae, a lele akula ke aho; a komo maila ua poʻe uʻi lā, a loaʻa ihola ia ua make, a lawe akula lākou iā ia, a kanu akula ma kahi o kāna kāne.

¹¹ A kau mai ka makaʻu nui ma luna o ka ʻekalesia a pau, a me ka poʻe a pau i lohe i kēia mau mea.

¹² ¶ Ua hana ʻia nō hoʻi ma waena o kānaka, nā hōʻailona a me nā mea kupanaha he nui loa, e nā lima o ka poʻe lunaʻōlelo. (Lōkahi aʻela lākou a pau ma ka lānai o Solomona.

¹³ ʻAʻohe mea o ka poʻe i koe i makaʻu ʻole ke hui pū mai me lākou; akā, mahalo akula kānaka iā lākou.

¹⁴ Hui pū nui ʻia aʻela i ka Haku ka poʻe i manaʻoʻiʻo, nā kāne, a me nā wāhine he nui loa).

¹⁵ No ia mea, lawe maila lākou i ka poʻe maʻi ma nā alanui, a waiho ihola iā lākou ma luna o nā moe hilinaʻi a me nā wahi moe, i malu aʻe paha ke aka o Petero ma luna o kekahi o lākou, i kona hele ʻana aʻe.

¹⁶ He nui ka poʻe i hele mai i Ierusalema, no nā kūlanakauhale a puni, e lawe ana i ka poʻe maʻi, a me ka poʻe i loʻohia i nā ʻuhane ʻino; a hoʻōla ʻia lākou a pau.

¹⁷ ¶ A laila kū aʻe i luna ke kahuna nui, a me ka poʻe a pau me ia, (he poʻe Sadukaio lākou), ua piha loa lākou i ka ukiuki.

¹⁸ Hopu akula ko lākou lima i ka poʻe lunaʻōlelo, a hahao ihola iā lākou ma loko o ka hale paʻahao.

¹⁹ Wehe maila ka ʻānela o ka Haku i nā puka o ka hale paʻahao i ka pō, a lawe maila iā lākou ma waho, ʻī maila,

²⁰ “E hele ʻoukou, a e kū ma loko o ka luakini, e ʻōlelo aku i kānaka i nā hua ʻōlelo a pau o kēia ola.”

²¹ A lohe lākou, komo aʻela lākou i loko o ka luakini i ke kakahiaka nui, aʻo aʻela lākou. A hiki maila ke kahuna nui, a me ka poʻe me ia, hoʻākoakoa maila lākou i ka ʻAha Luna Kānāwai, a me nā Lunakahiko a pau o kā ʻIseraʻela, a hoʻouna akula ma ka hale paʻahao i lawe ʻia mai lākou.

²² A hiki aʻela nā ilāmuku, ʻaʻole loaʻa iā lākou ma loko o ka hale paʻahao, hoʻi mai lākou, ʻī maila,

²³ “Loaʻa iā mākou ka hale paʻahao ua paʻa, ua malu loa hoʻi, e kū ana nō ka poʻe kiaʻi ma nā puka; a wehe mākou, ʻaʻohe kanaka o loko i loaʻa iā mākou.”

²⁴ A lohe ihola ke kahuna nui, a me ka luna o ka luakini, a me nā kāhuna nui i kēia ʻōlelo, kānalua ihola lākou, i ka hope o kēia mea.

²⁵ A laila, hele mai kekahi, haʻi maila iā lākou, ʻī maila, “Aia hoʻi nā kānaka a ʻoukou i hahao ai i loko o ka hale paʻahao e kū ana ma loko o ka luakini, e aʻo aku ana i kānaka!”

²⁶ A laila, kiʻi akula ka luna a me nā ilāmuku, a lawe mālie maila iā lākou; no ka makaʻu o lākou i kānaka o hailuku ʻia mai lākou.

²⁷ A lawe ʻia mai lākou, hoʻokū ʻia ihola lākou i mua i ka ʻAha Luna Kānāwai; a nīnau akula ke kahuna nui iā lākou,

²⁸ ʻĪ akula, “ʻAʻole anei mākou i pāpā aku iā ʻoukou, mai aʻo aku ma kēia inoa? Aia hoʻi, ua hoʻopiha ʻoukou iā Ierusalema nei i ko ʻoukou manaʻo, a ke makemake nei ʻoukou e hoʻoili mai i ke koko o kēia kanaka ma luna o mākou.”

²⁹ A laila, ʻōlelo mai ʻo Petero, a me nā lunaʻōlelo, ʻī maila, “E pono nō iā mākou ke mālama i kā ke Akua, ʻaʻole i kā ke kanaka.

³⁰ “ʻO ke Akua o ko kākou poʻe kūpuna, ua hoʻāla hou mai ʻo ia iā Iesū, i ka mea a ʻoukou i pepehi ai, a kau ma luna o ka lāʻau.

³¹ “ʻO ia kā ke Akua i hoʻokiʻekiʻe aʻe ma kona lima ʻākau, i Aliʻi, i Ola hoʻi, e hāʻawi mai i kā ʻIseraʻela, i ka mihi, a me ke kala ʻana i ka hala.

³² “ʻO mākou nō kona poʻe hōʻike no kēia mau mea; a me ka ʻUhane Hemolele hoʻi, ʻo ka mea a ke Akua i hāʻawi mai ai i ka poʻe mālama iā ia.”

³³ ¶ A lohe aʻela lākou ia mea, walania lākou, kūkākūkā ihola e pepehi iā lākou.

³⁴ A laila, kū aʻela kekahi i luna ma loko o ka ʻAha Luna Kānāwai, he Parisaio, ʻo Gamaliʻela kona inoa, he kumu aʻo Kānāwai, ua mahalo ʻia e nā kānaka a pau loa, kauoha aʻela ia e hoʻokaʻa iki aku i nā lunaʻōlelo ma waho.

³⁵ ʻĪ akula ʻo ia iā lākou, “E nā kānaka o kā ʻIseraʻela, e ao ʻoukou iā ʻoukou iho, i ka mea a ʻoukou e manaʻo ai e hana aku i kēia mau kānaka.

³⁶ “No ka mea, i nā lā i hala aku nei, kū aʻela ʻo Teuda, kaena ihola iā ia iho nō, a hoʻopili akula kekahi poʻe kānaka i ona lā ʻehā paha haneri; pepehi ʻia ihola ia; a ʻo ka poʻe a pau i mālama i kāna, ua hoʻopuehu ʻia lākou, a lilo aʻela i mea ʻole.

³⁷ “A ma hope ona kū aʻela ʻo Iuda, no Galilaia, i ka manawa o ka helu ʻauhau ʻana, a alakaʻi akula ia i kekahi poʻe nui ma hope ona; make ihola nō hoʻi ia; a ʻo ka poʻe a pau i mālama aku i kāna, ua hoʻoʻauheʻe ʻia lākou.

³⁸ “ʻĀnō hoʻi, ke ʻōlelo aku nei nō hoʻi au iā ʻoukou, mai mea iki aku ʻoukou i kēia poʻe kānaka, e waiho ʻokoʻa aku nō; no ka mea, inā no kānaka kēia manaʻo, a me kēia hana, e pau wale nō ia.

³⁹ “Akā, inā na ke Akua, ʻaʻole hiki iā ʻoukou ke hoʻoluʻi, o loaʻa paha uaneʻi ʻoukou e paio ana i ke Akua.”

⁴⁰ ʻAe maila lākou iā ia; a kiʻi akula lākou i nā lunaʻōlelo, hahau ihola, a pāpā akula iā lākou, mai ʻōlelo aku ma ka inoa ʻo Iesū, a laila kuʻu akula.

⁴¹ Hele akula lākou, mai ke alo aku o ka ʻAha Luna Kānāwai me ka ʻoliʻoli; no ka mea, ua manaʻo ʻia he pono ke hōʻino ʻia mai lākou no kona inoa.

⁴² A i kēlā lā i kēia lā, ʻaʻole lākou i hoʻōki i kā lākou aʻo ʻana aku, a me ka haʻi aku iā Iesū Kristo, ma ka luakini, a ia hale aku ia hale aku.