NĀ ʻOIHANA A KA POʻE LUNAʻŌLELO 26 - Ka Baibala Hemolele

1 Haʻi akula ʻo Paulo iā ʻAgeripa i ke ʻano o kona noho ʻana, a me kona huli ʻana i ka pono. 24 Manaʻo maila ʻo Peseto ua hehena ia. 26 ʻAneʻane huli ʻo ʻAgeripa.

MOKUNA XXVI.

¹ ¶ A laila ʻōlelo maila ʻo ʻAgeripa iā Paulo, “Ke ʻae ʻia aku nei iā ʻoe e ʻōlelo mai nou iho.” Hohola aʻela ʻo Paulo i kona lima, ʻōlelo maila nona iho:

² ¶ “Pōmaikaʻi au i koʻu manaʻo, e ke aliʻi, e ʻAgeripa ē; no ka mea, e hoʻākāka ana au i mua ou i kēia lā, no nā mea a pau aʻu i hoʻopiʻi ʻia mai nei e nā Iudaio;

³ no ka mea, ua ʻike nō ʻoe i nā ʻaoʻao, a me nā mea hoʻopaʻapaʻa a pau o nā Iudaio; no laila, ke nonoi aku nei au iā ʻoe, e hoʻolohe ahonui mai iaʻu.

⁴ “ʻO koʻu noho ʻana, mai koʻu wā ʻuʻuku mai, aia nō ia, mai kinohi mai ma Ierusalema i waena o kou lāhui ʻāina iho, ua ʻike nā Iudaio a pau;

⁵ ka poʻe i ʻike mai iaʻu i kinohou, inā i ake lākou e hōʻike mai, noho Parisaio nō wau ma ka ʻaoʻao ikaika loa o ko mākou hoʻomana.

⁶ “Ke kū nei nō au, ua hoʻokolokolo ʻia mai nei nō hoʻi, no ka manaʻolana o ka ʻōlelo hoʻopōmaikaʻi a ke Akua i ʻōlelo mai ai i ko mākou mau kūpuna.

⁷ “Ke manaʻolana nei nō hoʻi ko mākou poʻe ʻohana, he ʻumi a me kumamālua, e loaʻa ia mea, me ka mālama mau aku i ka pō a me ke ao; no ia manaʻolana oʻu, e ke aliʻi, e ʻAgeripa ē, ua hoʻopiʻi ʻia mai nei au e nā Iudaio.

⁸ “No ke aha lā ʻoukou i manaʻo ai he mea hiki ʻole i ke Akua ke hoʻāla mai i ka poʻe make?

⁹ “No laila, manaʻo nō au i loko oʻu iho, he mea pono iaʻu ke hana i nā mea he nui i kūʻē i ka inoa ʻo Iesū no Nazareta.

¹⁰ “Hana nō au ia mau mea ma Ierusalema; hana paʻa ihola au i nā haipule he nui ma loko o nā hale paʻahao, ua loaʻa nō iaʻu ka mana no ka poʻe kāhuna nui; a iā lākou i pepehi ʻia, ʻo wau nō kekahi i hoʻāhewa pū akula lākou.

¹¹ “Hoʻopaʻi pinepine akula au iā lākou ma loko o nā hale hālāwai a pau, a koi akula au iā lākou e ʻōlelo hōʻino; a no koʻu ukiuki loa iā lākou, hoʻomaʻau akula au iā lākou a hiki i nā kūlanakauhale o nā ʻāina ʻē.

¹² “No ia mau mea i hele ai au i Damaseko, me ka mana a me ke ʻae ʻia na nā kāhuna nui mai,

¹³ i ke awakea, e ke aliʻi ē, ʻike akula au ma ke alanui, he mālamalama mai ka lani mai, he mea ʻoi loa aku ma mua o ka mālamalama o ka lā, ua puni au i ka mālamalama, a me ka poʻe i hele pū me aʻu.

¹⁴ “A hina mākou a pau i ka honua, lohe akula au i ka leo, i ka ʻī ʻana mai iaʻu, ʻī maila ma ka ʻōlelo Hebera, ‘E Saulo, e Saulo, no ke aha lā ʻoe e hoʻomaʻau mai nei iaʻu? He mea ʻeha nou ke keʻehi mai i nā kui.’

¹⁵ “ʻĪ akula au, ‘ʻO wai ʻoe, e ka Haku?’ ʻĪ maila kēlā, ‘ʻO Iesū nō wau, ʻo ka Mea āu e hoʻomaʻau mai nei.

¹⁶ ‘Akā, e ala hoʻi ʻoe, a e kū i luna ma nā wāwae ou; no ka mea, ua ʻikea au iā ʻoe, no kēia mea, e hoʻolilo ana au iā ʻoe i lawehana, a i mea hōʻike aku i kēia mea āu i ʻike iho nei, a me nā mea aʻu e hōʻike hou aku ai nāu.

¹⁷ ‘Naʻu nō ʻoe e hoʻopakele i kānaka a me ko nā ʻāina ʻē; e hoʻouna aku ana nō au iā ʻoe i o lākou lā,

¹⁸ e hoʻokaʻakaʻa ai i ko lākou mau maka, a e hoʻohuli iā lākou, mai ka pouli mai i ka mālamalama, a mai ka mana o Sātana i ke Akua, i loaʻa iā lākou ke kala ʻana o ka hala, a me ka hoʻoilina ma waena o ka poʻe i hoʻomaʻemaʻe ʻia e ka manaʻoʻiʻo mai iaʻu.’

¹⁹ “No laila, e ke aliʻi, e ʻAgeripa ē, ʻaʻole au i hōʻole aku ia hoʻākakū, mai ka lani mai.

²⁰ “Akā, hōʻike mua akula au iā lākou ma Damaseko, a ma Ierusalema, a ma nā mokuna a pau ma Iudea, a i ko nā ʻāina ʻē, i mihi lākou, a e huli i ke Akua, a e hana i nā hana e kū i ka mihi.

²¹ “No kēia mau mea, lālau mai nā Iudaio iaʻu ma loko o ka luakini, hoʻāʻo maila lākou e pepehi mai iaʻu a make.

²² “No ke kōkua ʻana mai o ke Akua iaʻu, ua kūpaʻa nō wau, a hiki mai nei i kēia lā, e aku hōʻike ana i ka poʻe liʻiliʻi, a me ka poʻe nui, i ka ʻī ʻana aku i kēia mau mea wale nō, i nā mea a ka poʻe Kāula, a me Mose nō hoʻi i ʻōlelo mai ai, e hiki mai ana;

²³ e make nō ka Mesia e pono ai, ʻo ia hoʻi ka mua o ka poʻe make i ala hou mai, nāna nō e hōʻike aku i ka mālamalama i ko ʻoneʻi kānaka, a me ko nā ʻāina ʻē.”

²⁴ ¶ A i kāna hoʻākāka ʻana pēlā i kona iho, ʻī aʻela ʻo Peseto me ka leo nui, “E Paulo, ua hehena ʻoe; na nā palapala he nui ʻoe i hoʻolilo ai i hehena.”

²⁵ ʻĪ akula ia, “ʻAʻole au hehena, e Peseto maikaʻi ē; akā, ke ʻōlelo aku nei au i nā ʻōlelo ʻoiaʻiʻo a me ka naʻauao.

²⁶ “Ua ʻike nō hoʻi ke aliʻi i kēia mea, ke ʻōlelo wiwo ʻole aku nei au i mua o kona alo; no ka mea, ke manaʻo nei au ʻaʻole i nalo iā ia kekahi o kēia mau mea; no ka mea, ʻaʻole i hana ʻia kēia ma kahi nalo.

²⁷ “E ke aliʻi, e ʻAgeripa ē, ke manaʻoʻiʻo mai nei anei ʻoe i kā nā kāula? Ua ʻike nō au, ua manaʻoʻiʻo nō ʻoe.”

²⁸ ʻŌlelo akula ʻo ʻAgeripa iā Paulo, “Ua ʻaneʻane ʻoe e hoʻohuli mai iaʻu i Kristiano.”

²⁹ ʻĪ maila ʻo Paulo, “Ke pule nei au i ke Akua, i ʻole ʻoe ma ka ʻaneʻane wale nō; akā, ma ka ʻoiaʻiʻo e lilo ai ʻoe, a me ka poʻe a pau e hoʻolohe mai iaʻu i kēia lā, i mea e like ʻiʻo ai me aʻu nei, ma nā mea a pau, ʻo kēia paʻa wale nō ke koe.”

³⁰ ¶ A kū aʻela ke aliʻi i luna, a me ke aliʻi kiaʻāina, a me Berenike, a me ka poʻe e noho pū ana me lākou.

³¹ I ko lākou hoʻi ʻana aku, kamaʻilio aʻela lākou iā lākou iho nō, ʻī aʻela, “ʻAʻole i hana kēia kanaka i ka mea kū i ka make a me ka paʻa.”

³² ʻĪ aʻela ʻo ʻAgeripa iā Peseto, “Inā ʻaʻole kēia kanaka i hoʻopiʻi iā Kaisara, inā ua pono ke wehe iā ia.”