NĀ ʻOIHANA A KA POʻE LUNAʻŌLELO 24 - Ka Baibala Hemolele

1 Ka hoʻopiʻi ʻana o Teretulo iā Paulo i mua o Pelika. 10 Ka hōʻole ʻana o Paulo. 22 Haʻalulu ʻo Pelika ma kā Paulo ʻōlelo ʻana, a haʻi akula ʻo ia iā Iesū Kristo.

MOKUNA XXIV.

¹ ¶ A hala nā lā ʻelima, iho aʻela ʻo ʻAnania, ke kahuna nui, a me nā lunakahiko, a me kekahi loio, ʻo Teretulo, hoʻopiʻi maila lākou iā Paulo i ke aliʻi kiaʻāina.

² Kiʻi ʻia akula ia, hoʻomaka ihola ʻo Teretulo e hoʻopiʻi iā ia, ʻī aʻela, “Ua malu loa mākou iā ʻoe, ua nui loa nō hoʻi nā mea kaulana i loaʻa mai i kēia ʻāina i kou mālama ʻana,

³ e Pelika kiʻekiʻe, ke lawe maikaʻi nei mākou ia mau mea, ma nā wahi a pau loa, me ke aloha nui aku.

⁴ Akā, o hoʻoluhi aku au iā ʻoe, ke nonoi aku nei au iā ʻoe, i kou lokomaikaʻi, e hoʻolohe iki mai iā mākou.

⁵ “No ka mea, ua ʻike mākou i kēia kanaka, ua kolohe, he kanaka hoʻoʻeuʻeu ʻana o ke kūʻē ma waena o nā Iudaio a pau ma nā ʻāina a pau, ʻo ia nō hoʻi kekahi kumu nui o ka papa Nazarene.

⁶ “Ua hoʻāʻo aʻela ia e hoʻohaumia i ka luakini; na mākou ia i hopu iho, a makemake ihola mākou e hoʻokolokolo e like me ko mākou Kānāwai.

⁷ “Akā, hele maila ʻo Lusia, ka luna tausani, a kaʻi akula iā ia me ka ikaika nui, mai loko aku o ko mākou mau lima,

⁸ “Kēnā mai nō hoʻi ia i ka poʻe nāna ia i hoʻopiʻi e hele mai i oʻu nei. A inā hoʻokolokolo ʻoe, e ʻike auaneʻi ʻoe i ka ʻoiaʻiʻo o kēia mau mea a pau a mākou e hoʻopiʻi aku nei nona.”

⁹ ʻAe maila nā Iudaio, ʻī maila, “ʻOiaʻiʻo nō kēia mau mea.”

¹⁰ ¶ Kūnou aʻela ke aliʻi iā Paulo e ʻōlelo mai, a laila ʻī maila ia: “No kuʻu ʻike ʻana, he nui nā makahiki iā ʻoe, i luna kānāwai no ko kēia ʻāina, no ia mea, ua ʻoluʻolu loa wau e ʻōlelo aku i nā mea noʻu iho.

¹¹ “E hiki nō iā ʻoe ke hoʻomaopopo, he ʻumi aʻe nei lā wale nō i hala, a me kumamālua, mai koʻu piʻi ʻana aku i Ierusalema e hoʻomana.

¹² “ʻAʻole hoʻi au i loaʻa iā lākou ma loko o ka luakini, e hoʻopaʻapaʻa ana me kekahi, ʻaʻole hoʻi e hoʻohaunaele ana i ka lehulehu, ʻaʻole ma loko o nā hale hālāwai, ʻaʻole hoʻi ma loko o ke kūlanakauhale.

¹³ ʻAʻole hoʻi e hiki iā lākou ʻānō ke hōʻoiaʻiʻo i nā mea a lākou e hoʻopiʻi mai nei iaʻu.

¹⁴ “Akā, ke haʻi pono aku nei au iā ʻoe i kēia, ma ka ʻAoʻao i ʻōlelo ʻia ai e lākou, he ʻaoʻao kūʻē, pēlā nō wau e hoʻomana aku nei i ke Akua o koʻu mau kūpuna, e manaʻoʻiʻo aku ana i nā mea a pau i kākau ʻia ai ma ke Kānāwai, a ma kā nā Kāula.

¹⁵ “Ke lana nei koʻu manaʻo i ke Akua, ua ʻae mai nō hoʻi lākou i kēia, i ke ala hou ʻana o ka poʻe make, ʻo ka poʻe pono a me ka poʻe pono ʻole.

¹⁶ “Ma laila nō hoʻi au e hoʻoikaika nei e loaʻa mau ka lunaʻikehala hewa ʻole i mua o ke Akua a me nā kānaka.

¹⁷ “A hala nā makahiki he nui, hele akula au e lawe i ka waiwai manawaleʻa, a me nā mōhai, no nā kānaka o koʻu ʻāina.

¹⁸ “Loaʻa ihola au ma loko o ka luakini i kekahi mau Iudaio, mai ʻĀsia mai, ua huikala ʻia, ʻaʻole me ka lehulehu, ʻaʻole hoʻi me ka hoʻohaunaele.

¹⁹ “Inā i loaʻa iā lākou kekahi hewa noʻu, e hoʻopiʻi mai ai, inā ua pono ʻo lākou kekahi pū mai i mua ou.

²⁰ “E pono nō hoʻi iā lākou nei ke ʻōlelo mai, inā paha ua loaʻa iā lākou koʻu hewa, iaʻu i kū ai i mua o ka ʻAha Luna Kānāwai;

²¹ no kēia leo hoʻokahi wale nō aʻu i hea aku ai, i koʻu kū ʻana i waena o lākou, ‘No ke ala hou ʻana o ka poʻe make, ʻo ia koʻu mea i hoʻokolokolo ʻia mai ai i mua o ʻoukou i kēia lā.’”

²² ¶ A lohe ʻo Pelika i kēia, hoʻopaneʻe aku iā lākou a ʻike maopopo akula ʻo ia i nā mea o kēia ʻAoʻao, ʻī aʻela, “A iho mai ʻo Lusia, ka luna tausani, a laila, e hoʻomaopopo leʻa au i kā ʻoukou.”

²³ A laila, ʻōlelo akula ia i ka luna haneri e mālama iā Paulo, ʻaʻole hoʻi e paʻa maoli, ʻaʻole e pāpā aku i kekahi o kona mau makamaka, ke lawelawe nāna, a e hele mai hoʻi iā ia.

²⁴ ¶ A hala kekahi mau lā, hiki maila ʻo Pelika me kāna wahine, ʻo Derausila, he Iudaio nō ia, kiʻi akula kēlā iā Paulo, hoʻolohe akula iā ia no ka manaʻoʻiʻo i loko o Kristo.

²⁵ A i kāna kamaʻilio ʻana no ka pono, a me ka pākiko, a me ka hoʻokolokolo ʻia e hiki mai ana ma hope, haʻalulu ihola ʻo Pelika, ʻī akula, “Ō hoʻi ʻoe i kēia wā; a loaʻa iaʻu ka manawa kaʻawale, e kiʻi hou aku nō au iā ʻoe.”

²⁶ E manaʻolana ana hoʻi ia e hāʻawi ʻia mai e Paulo nā kālā nāna, i wehe ʻia aku ai ia e ia. No ia mea, kiʻi pinepine akula ʻo ia iā ia, i kamakamaʻilio lāua.

²⁷ A hala aʻela nā makahiki ʻelua, hiki aʻela ma ko Pelika hakahaka, ʻo Porekio Peseto, a waiho ihola ʻo Pelika iā Paulo e paʻa ana, no kona makemake e hōʻoluʻolu i nā Iudaio.