NĀ ʻOIHANA A KA POʻE LUNAʻŌLELO 23 - Ka Baibala Hemolele

1 Ka hoʻokolokolo ʻana o Paulo. 11 Kona hoʻohālua ʻia. 35 Hele ʻo ia iā Pelika.

MOKUNA XXIII.

¹ ¶ Haka pono maila ʻo Paulo i ka ʻAha Luna Kānāwai, ʻī maila, “E nā kānaka, nā hoahānau, ua noho kupa wau me ka lunaʻikehala maikaʻi wale nō i ke Akua a hiki mai nei i kēia lā.”

² Kēnā aʻela ke kahuna nui ʻo ʻAnania i ka poʻe e kū kokoke ana i ona lā, e paʻi iā ia ma ka waha.

³ A laila, ʻī akula ʻo Paulo iā ia, “E paʻi mai nō hoʻi ke Akua iā ʻoe, e ka paia i hoʻokeʻokeʻo ʻia! Ke noho nei anei ʻoe e hoʻokō mai i ke Kānāwai iaʻu, a ke kēnā mai nei anei ʻoe, e paʻi ʻia mai au ma ka mea kū ʻole i ke Kānāwai?”

⁴ ʻŌlelo maila ka poʻe e kū ana i laila. “Ke ʻōlelo ʻino nei anei ʻoe i ke kahuna nui o ke Akua?”

⁵ ʻĪ akula ʻo Paulo, “E nā hoahānau, ʻaʻole au i ʻike, ʻo ke kahuna nui ia. No ka mea, ua palapala ʻia mai, ‘«Mai ʻōlelo hōʻino aku ʻoe i ke aliʻi o kou poʻe kānaka».’”

⁶ A ʻike akula ʻo Paulo, he poʻe Sadukaio kekahi o lākou, a he poʻe Parisaio kekahi, a laila hea akula ia ma ka ʻAha Luna Kānāwai, “E nā kānaka, nā hoahānau, he Parisaio wau, he keiki na kekahi Parisaio; a no ka manaʻolana i ke ala hou ʻana o ka poʻe make, ua hoʻokolokolo ʻia mai nei au!”

⁷ A i kāna ʻōlelo ʻana pēlā, kūʻēʻē ihola ka poʻe Parisaio, a me ka poʻe Sadukaio; a mokuāhana ihola ua ʻaha kanaka lā.

⁸ No ka mea, ua ʻōlelo mai ka poʻe Sadukaio, ʻaʻole ala hou ʻana, ʻaʻole ʻānela, ʻaʻole ʻuhane; akā, ʻo ka poʻe Parisaio, hōʻoiaʻiʻo nō lākou i kēia mau mea ʻelua.

⁹ Nui loa ihola ka ʻuā; kū maila nā kākau ʻōlelo no ka poʻe Parisaio, hoʻopaʻapaʻa ikaika aʻela lākou, ʻī aʻela, “ʻAʻole loaʻa iā mākou ka hewa i loko o kēia kanaka. A inā he ʻuhane, a he ʻānela paha i ʻōlelo mai iā ia, mai kūʻē kākou i ke Akua.”

¹⁰ Nui loa ihola ke kūʻēʻē, no ia mea, makaʻu aʻela ka luna tausani o weluwelu ʻo Paulo iā lākou, kēnā aʻela ia i ka poʻe koa e iho i lalo, a e kāʻili mai iā ia mai loko mai o lākou, a e alakaʻi aku iā ia i loko o ka pā kaua.

¹¹ ¶ A ia pō iho, kū maila ka Haku i mua ona, ʻī maila, “E hoʻolana ʻoe, e Paulo; no ka mea, e like me kou hōʻike ʻana aku iaʻu ma Ierusalema nei, pēlā nō hoʻi ʻoe e hōʻike aku ai iaʻu ma Roma.”

¹² ¶ A wanaʻao, ʻōhumu kuʻikahi maila kekahi poʻe Iudaio e hoʻohālua iā ia, hoʻohiki aʻela, ʻaʻole loa lākou e ʻai, ʻaʻole hoʻi e inu, a pepehi lākou iā Paulo.

¹³ He kanahā lākou a keu aku i ʻōhumu pēlā i kēia hoʻohālua ʻana.

¹⁴ Hele maila lākou i nā kāhuna nui a me nā lunakahiko, ʻī maila, “Ua hoʻohiki mākou iā mākou iho i kahi hōʻino nui, ʻaʻole loa mākou e ʻai a pepehi mākou iā Paulo.

¹⁵ “No ia mea, ʻānō, e nonoi aku ʻoukou me ka ʻAha Luna Kānāwai i ka luna tausani, e kaʻi mai ia i o ʻoukou nei, i ka lā ʻapōpō, me he mea lā e nīnau hou aku i mea e akāka ai nona: a ʻo mākou nei, ua mākaukau mākou e pepehi iā ia i ka wā ʻaʻole ia e hiki kokoke mai.”

¹⁶ A lohe ke keiki kāne a ke kaikuahine o Paulo i ko lākou hoʻohālua ʻana, hele akula ia, komo akula i loko o ka pā kaua, a haʻi akula iā Paulo.

¹⁷ A laila, hea akula ʻo Paulo i kekahi o nā luna haneri, ʻī akula iā ia, “E alakaʻi ʻoe i kēia kanaka ʻōpio i ka luna tausani; no ka mea, he ʻōlelo kāna e haʻi aku ai iā ia.”

¹⁸ No laila, lawe aʻela ʻo ia iā ia, alakaʻi akula i ka luna tausani, ʻī akula, “I hea mai nei iaʻu ʻo Paulo ka mea i paʻa, a nonoi mai iaʻu e alakaʻi mai i kēia kanaka ʻōpio iā ʻoe, he ʻōlelo kāna e haʻi aku ai iā ʻoe.”

¹⁹ A laila, lālau aʻela ka luna tausani i kona lima, a hele malū aʻela, nīnau akula, “He aha kāu mea e haʻi mai iaʻu?”

²⁰ ʻĪ akula ia, “Ua ʻōhumu ka poʻe Iudaio e nonoi aku iā ʻoe e kaʻi aku iā Paulo i ka ʻAha Luna Kānāwai, i ka lā ʻapōpō, me he mea lā e nīnau hou aku i mea nona e akāka ai.

²¹ “Mai ʻae aku ʻoe iā lākou; no ka mea, ke hoʻohālua nei nona hoʻokahi kanahā kānaka, a keu o lākou; ua hoʻohiki lākou iā lākou iho i kahi hōʻino nui, ʻaʻole e ʻai, ʻaʻole hoʻi e inu, a pepehi lākou iā ia; ʻānō hoʻi ke mākaukau nei lākou, e kakali ana no kāu ʻōlelo.”

²² No laila kuʻu maila ka luna tausani i ua kanaka ʻōpio lā, pāpā maila, “Mai haʻi aʻe ʻoe i kekahi kanaka i kou hōʻike ʻana mai iaʻu i kēia mau mea.”

²³ No laila, kiʻi akula ia i nā luna haneri ʻelua, ʻī akula, “E hoʻomākaukau i nā koa, ʻelua haneri, e hele i Kaisareia, a me nā hoʻoholo lio, he kanahiku, a me nā kānaka ihe, ʻelua haneri, i ke kolu o ka hora o ka pō.”

²⁴ A e hoʻomākaukau i nā holoholona hoʻi, i kau lākou iā Paulo ma luna, a e lawe maikaʻi aku iā ia i o Pelika lā, i ke aliʻi kiaʻāina.

²⁵ Kākau akula ia i kekahi palapala, penei:

²⁶ ¶ “ʻO Kelaudio Lusia, i ke aliʻi kiaʻāina hanohano, iā Pelika, aloha.

²⁷ “Ua hopu ʻia kēia kanaka e nā Iudaio, a mai pepehi ʻia ʻo ia e lākou; a laila, hiki ʻē akula au me ka poʻe koa, a hoʻopakele iā ia, no koʻu lohe ʻana, he Roma ia.

²⁸ “A i koʻu ake ʻana e ʻike i ke kumu a lākou i hoʻopiʻi ai iā ia, kaʻi aʻela au iā ia i loko o ko lākou ʻAha Luna Kānāwai;

²⁹ a ʻike akula au iā ia, ua hoʻopiʻi ʻia ʻo ia no kekahi mau mea o ko lākou Kānāwai, ʻaʻole hoʻi lākou i hoʻopiʻi mai iā ia, ma ka mea e pono ai ka make, a me ka paʻa.

³⁰ “A i haʻi ʻia mai iaʻu ka hoʻohālua ʻana o nā Iudaio i ua kanaka lā, hoʻouna koke akula au iā ʻoe, a kauoha akula nō hoʻi i ka poʻe i hoʻopiʻi mai iā ia, e haʻi aku i mua ou i ka mea a lākou i ʻike ai iā ia. Aloha ʻoe.”

³¹ ¶ A laila, lawe aʻela ka poʻe koa iā Paulo, e like me ke kēnā ʻana mai iā lākou, a alakaʻi akula iā ia i ka pō, i ʻAnetipateri.

³² A ia lā aʻe, waiho ihola lākou i ka poʻe hoʻoholo lio, e hele pū me ia, a hoʻi akula lākou i ka pā kaua.

³³ A hiki akula lākou i Kaisareia, hāʻawi akula lākou i ka palapala i ke aliʻi kiaʻāina, a hoʻokū ihola iā Paulo i mua ona.

³⁴ A heluhelu ihola ke aliʻi, a nīnau maila ia, No ka panalāʻau hea ia? A lohe ia, no Kilikia;

³⁵ ʻī maila ia, “A hiki mai ka poʻe hoʻopiʻi iā ʻoe, a laila e hoʻolohe aku au iā ʻoe.” Kauoha aʻela ia e mālama ʻia ʻo ia ma loko o ko Herode hale aliʻi.