NĀ ʻOIHANA A KA POʻE LUNAʻŌLELO 22 - Ka Baibala Hemolele

1 Haʻi akula ʻo Paulo i nā aliʻi i ke kiʻi ʻana mai o ka Haku iā ia e huli ma ka pono. 22 Ka huhū hou o nā kānaka.

MOKUNA XXII.

¹ ¶ “E nā kānaka, nā hoahānau, a me nā mākua, e hoʻolohe mai ʻoukou i kaʻu ʻōlelo hoʻākāka iā ʻoukou.”

² ¶ (A lohe lākou i kāna ʻōlelo ʻana mai iā lākou ma ka ʻōlelo Hebera, hoʻoneoneo loa ihola lākou; a ʻī maila ia,)

³ ¶ “He kanaka Iudaio nō wau i hānau ʻia ma Tareso i Kilikia, ma kēia kūlanakauhale naʻe au i hānai ʻia ai, ma nā wāwae o Gamaliʻela, ua aʻo ʻia au ma muli o ke kānāwai ikaika o nā mākua; ikaika loa nō hoʻi au i ke Akua, e like me ʻoukou i kēia lā.

⁴ “Hana ʻino aku au a make ko kēia ʻAoʻao, me ka paʻa aku i nā kāne a me nā wāhine, a me ka hāʻawi iā lākou i nā hale paʻahao.

⁵ “Ua ʻike pono ke kahuna nui, a me ka Papa a pau o nā lunakahiko; na lākou kaʻu palapala i loaʻa mai ai no nā hoahānau, a hele au ma Damaseko, e lawe mai i ka poʻe paʻa ma laila i Ierusalema, i hoʻopaʻi iā lākou.

⁶ “A i koʻu hele ʻana a kokoke i Damaseko, i ke awakea, ʻanapu koke maila ka mālamalama nui, mai ka lani mai, a puni au.

⁷ “A hina ihola au i ka lepo, a lohe akula au i ka leo, i ka ʻī ʻana mai iaʻu, ‘E Saulo, e Saulo, no ke aha lā ʻoe e hoʻomaʻau mai nei iaʻu?’

⁸ “ʻĪ akula au, ‘E ka Haku ē, ʻo wai ʻoe?’ ʻĪ maila kēlā iaʻu, ‘ʻO Iesū nō wau no Nazareta, ka Mea āu e hoʻomaʻau mai nei.’

⁹ “A ʻike akula ka poʻe me aʻu i ka mālamalama, a makaʻu ihola; ʻaʻole lākou i lohe i ka leo o ka Mea i ʻōlelo mai ai iaʻu.

¹⁰ ʻĪ akula au, ‘E ka Haku ē, he aha kaʻu e hana ai?’ ʻĪ maila ka Haku iaʻu, ‘E kū, a e hele i Damaseko, a ma laila e haʻi ʻia mai ai iā ʻoe nā mea a pau i hoʻomākaukau ʻia ai nāu e hana ai.’

¹¹ “A i ka hiki ʻole ʻana iaʻu ke ʻike, no ka nani o ia mālamalama, alakaʻi lima ʻia aku au e koʻu poʻe hoa hele, a hiki i Damaseko.

¹² “A ʻo ʻAnania, he kanaka haipule ma ke Kānāwai, i hōʻike pono ʻia e nā Iudaio a pau i noho i laila,

¹³ ʻo ia kai hele mai iaʻu, kū mai, ʻī mai iaʻu, ‘E Saulo, e ke kaikaina, e ʻike ʻoe!’ Ia hora nō ʻike akula au iā ia.

¹⁴ “ʻĪ maila ia, ‘Ua koho mai ke Akua o ko kākou poʻe kūpuna iā ʻoe, i ʻike ʻoe i kona makemake, a e ʻike aku hoʻi i ka Mea Pono, a e lohe hoʻi i ka leo o kona waha.

¹⁵ ‘No ka mea, e lilo ana ʻoe i mea hōʻike nona i kānaka a pau, ma nā mea āu i ʻike ai, a i lohe ai nō hoʻi.

¹⁶ ‘ʻĀnō hoʻi, e aha ana? E kū i luna, e bapetizo ʻia, e holoi aku i kou hewa, a e hea aku i ka inoa o ka Haku.’

¹⁷ “A i koʻu hoʻi hou ʻana mai i Ierusalema nei, i kaʻu pule ʻana ma loko o ka luakini, loaʻa iaʻu ka hihiʻo;

¹⁸ a ʻike akula au iā ia i ka ʻī ʻana mai iaʻu, ‘E wiki ʻoe, a e hele koke ʻoe ma waho o Ierusalema nei; no ka mea, ʻaʻole lākou nei e mālama mai i ka mea āu e hōʻike aku ai noʻu.’

¹⁹ “ʻĪ akula au, ‘E ka Haku ē, ua ʻike nō lākou, ʻo wau nō ka mea i hoʻokomo i loko o ka hale paʻahao, a hahau akula ma loko o nā hale hālāwai, i ka poʻe manaʻoʻiʻo aku iā ʻoe.

²⁰ A i hoʻokahe ʻia ai hoʻi ke koko o Setepano, ʻo kou mea hōʻike, e kū ana nō wau ma laila me ka ʻae aku i kona make, a naʻu nō i mālama ka ʻaʻahu o ka poʻe i pepehi iā ia.’

²¹ “ʻĪ maila kēlā iaʻu, ‘Ō hele; no ka mea, e hoʻouna aku ana au iā ʻoe i kahi lōʻihi aku, i ko nā ʻāina ʻē.’”

²² ¶ Hoʻolohe akula lākou iā ia a hiki i kēia hua, a laila hoʻokiʻekiʻe loa aʻela lākou i ko lākou leo, ʻī aʻela, “E kiola aku iā ia pēlā, mai ka honua aku; no ka mea, ʻaʻole ia e pono ke ola!”

²³ I ko lākou kāhea ʻana pēlā, hemo akula lākou i ko lākou ʻaʻahu, a kūehuehu akula lākou i ka lepo i luna ma ka lewa;

²⁴ kauoha aʻela ka luna tausani e kaʻi iā ia, i loko o ka pā kaua, kauoha aʻela, e hoʻopoʻipoʻi iā ia me ka hahau aku, i ʻike pono ia i ke kumu a lākou i ʻuāʻuā ai iā ia.

²⁵ Hīkiʻi ihola lākou iā ia i nā kaula ʻili, ʻī akula ʻo Paulo i kekahi luna haneri e kū ana i laila, “He mea pono anei ke hahau ʻoukou i ka Roma, me ka hoʻokū ʻole mai i ka hala?”

²⁶ A lohe ka luna haneri, hele akula ia a haʻi akula i ka luna tausani, ʻī akula, “He aha kāu e hana nei? No ka mea, he Roma kēia.”

²⁷ A laila, hele maila ka luna tausani, ʻī maila iā ia, “E haʻi mai ʻoe iaʻu, he Roma anei ʻoe?” ʻĪ akula ia, “ʻAe.”

²⁸ ʻĪ maila ua luna tausani lā, “He kumu kūʻai nui koʻu i loaʻa mai ai iaʻu kēia kupa ʻana.” ʻĪ akula ʻo Paulo, “Ua hānau ʻia mai au, pēlā.”

²⁹ No laila haʻalele koke ihola ka poʻe hoʻopoʻipoʻi iā ia; a ʻike ka luna tausani, he Roma ia, makaʻu ihola nō ia, no kona hoʻopaʻa ʻana iā ia.

³⁰ ¶ A ia lā aʻe manaʻo ihola ia e ʻike pono i kona mea i hoʻopiʻi ʻia ai e nā Iudaio, wehe aʻela ʻo ia iā ia, a kauoha akula i nā kāhuna nui, a me ka ʻAha Luna Kānāwai a pau, e hele mai, a alakaʻi maila ʻo ia iā Paulo, a hoʻokū ihola iā ia i mua o lākou.