NĀ ʻOIHANA A KA POʻE LUNAʻŌLELO 2 - Ka Baibala Hemolele

1 Ka Penetekota. 14 Ka ʻōlelo a Petero. 41 Ka hope o ia ʻōlelo.

MOKUNA II.

¹ ¶ A hiki ʻiʻo maila ka lā Penetekota, ua ʻākoakoa pū lākou a pau, me ka manaʻo lōkahi.

² ʻEmo ʻole, paʻē maila ka leo, mai ka lani mai, me he makani nui ikaika lā; a hoʻopiha loa ihola i ka hale a pau, kahi a lākou i noho ai.

³ A ʻike ʻia akula e lākou nā elelo manamana, me he ahi lā, a kau maila i luna iho o kēlā mea kēia mea o lākou a pau.

⁴ A piha aʻela lākou a pau i ka ʻUhane Hemolele; a hoʻomaka lākou e ʻōlelo aku me nā elelo ʻē, e like me ka hāʻawi ʻana mai o ka ʻUhane iā lākou e ʻōlelo aku.

⁵ ¶ E noho ana nō ma Ierusalema nā Iudaio, he poʻe kānaka haipule no nā ʻāina a pau ma lalo nei o ka lani.

⁶ A lohe ʻia akula kēia leo, a laila, lulumi maila ua ʻaha kanaka lā, a pili pū ihola lākou; no ka mea, lohe nō kēlā kanaka kēia kanaka i kā lākou ʻōlelo ʻana ma kāna ʻōlelo iho.

⁷ Pilihua ihola lākou me ke kāhāhā o ka naʻau, ʻī aʻela kekahi i kekahi, “Aiʻa, ʻaʻole anei no Galilaia lākou a pau e ʻōlelo mai nei?

⁸ “Pehea hoʻi kēia lohe ʻana o kēlā mea kēia mea o kākou i ka ʻōlelo o kona wahi i hānau ai?

⁹ “ʻO ko Paretia, a me ko Media, a me ko ʻElimai, a me ka poʻe i noho ma Mesopotamia, a ma Iudea, a ma Kapadosia, a ma Poneto, a ma ʻĀsia,

¹⁰ a ma Perugia, a ma Pamepulia, a ma ʻAigupita, a ma nā ʻāina o Libua e kokoke ana i Kurene, a me nā mea malihini o Roma mai, nā Iudaio, a me nā mea hoʻi i huli mai,

¹¹ ʻo ko Kerete a me ko ʻArabia, ke lohe nei kākou iā lākou e ʻōlelo maila i nā mea nui o ke Akua ma kā kākou ʻōlelo iho.”

¹² Kāhāhā ihola ko lākou naʻau a pau, a kānalua nō hoʻi, ʻī aʻela kekahi i kekahi, “He aha lā ke ʻano o kēia mea?”

¹³ Hoʻowahāwahā nō hoʻi kekahi poʻe, ʻī aʻela, “Ua piha kēia poʻe i ka waina hou.”

¹⁴ ¶ A laila kū aʻela ʻo Petero i luna me ka poʻe ʻumikumamākahi, hoʻokiʻekiʻe maila i kona leo, ʻōlelo ihola iā lākou, “E nā kānaka, nā Iudaio, a me nā mea a pau e noho ana ma Ierusalema nei, e ʻike pono ʻoukou i kēia, a e hoʻolohe mai ʻoukou i kaʻu mau ʻōlelo.

¹⁵ “No ka mea, ʻaʻole lākou nei i ʻona, e like me kā ʻoukou e manaʻo mai nei; no ka mea, ʻo ke kolu kēia o ka hora o ke ao.

¹⁶ “Akā, eia ka mea i ʻōlelo ʻia, e ke kāula, e Ioʻela:

¹⁷ ‘«I nā lā ma hope»,’ wahi a ke Akua, ‘E ninini iho au i koʻu ʻUhane ma luna o nā kānaka a pau; A e wānana aʻe kā ʻoukou poʻe keiki kāne, a me kā ʻoukou mau kaikamāhine, A e ʻike ko ʻoukou poʻe kānaka hou i nā hihiʻo, A e moe nō ko ʻoukou poʻe ʻelemākule i nā moeʻuhane.

¹⁸ ‘A i kēlā mau lā, ninini aku nō hoʻi au i koʻu ʻUhane Ma luna iho o kaʻu poʻe kauā kāne a me kaʻu poʻe kauā wahine»; A e wānana aʻe lākou.

¹⁹ ‘«A e hōʻike nō wau i nā mea kupanaha ma ka lani ma luna, A me nā hōʻailona hoʻi ma ka honua ma lalo; He koko, a me ke ahi, a me ke ao uahi.

²⁰ ‘E lilo ʻē nō ka lā i pouli, A me ka mahina hoʻi i koko, Ma mua o ka hiki ʻana o ua lā nui kaulana lā o ka Haku.

²¹ ‘Akā, eia kekahi, ʻo ka mea e kāhea aku i ka inoa o ka Haku, e ola ia».’

²² ¶ “E nā kānaka o kā ʻIseraʻela, e hoʻolohe mai ʻoukou i kēia mau ʻōlelo: ʻO Iesū no Nazareta, he kanaka ia i hoʻākāka ʻia iā ʻoukou e ke Akua, ma nā hana mana, a me nā mea kupanaha a ke Akua i hana mai ai ma ona lā, i waena o ʻoukou, e like me ko ʻoukou ʻike ʻana;

²³ ua hāʻawi ʻia mai ia ma muli o ka manaʻo kūpaʻa a me ka ʻike mua o ke Akua, na ʻoukou ia i hopu, a, me nā lima hewa, i kau ai i ke keʻa a make ia.

²⁴ “Ua hoʻāla hou mai ke Akua iā ia me ka wehe iho i nā apo o ka make; no ka mea, he mea hiki ʻole i kēlā mea, e hoʻopaʻa iā ia.

²⁵ No ka mea, ʻī maila ʻo Dāvida nona, ‘«ʻIke maopopo akula au i ka Haku, e kū mau loa ana ma mua oʻu; No ka mea, aia nō ia ma koʻu lima ʻākau, i ʻole au e nāueue.

²⁶ ‘No ia mea, hauʻoli koʻu naʻau, a ʻoliʻoli hoʻi kuʻu elelo; A e moe mālie nō koʻu kino me ka manaʻolana;

²⁷ No ka mea, ʻaʻole ʻoe e waiho i koʻu ʻuhane ma ka malu o ka poʻe make, ʻAʻole hoʻi e hāʻawi mai i kou mea hoʻāno, e ʻike i ka palahō.

²⁸ ‘Ua hōʻike mai ʻoe iaʻu i ka ʻaoʻao o ke ola; E hoʻopiha mai nō hoʻi ʻoe iaʻu i ka ʻoliʻoli ma kou maka».’

²⁹ “E nā kānaka, nā hoahānau, e hiki mai iaʻu ke ʻōlelo huna ʻole aku iā ʻoukou no Dāvida, ka makua aliʻi, ua make nō ia, ua kanu ʻia hoʻi, a ke waiho nei nō kona hale lua i o kākou nei, a i kēia manawa.

³⁰ “No ka mea, he kāula ia, a ʻike i «ka hoʻohiki ʻana o ke Akua āna i hoʻohiki ai nona, no kekahi hua o kona pūhaka ma ke kino, e hoʻāla mai iā Kristo e noho ma kona noho aliʻi»;

³¹ no kona ʻike mua ʻana i kēia, haʻi maila ia i ke ala hou ʻana mai o Iesū Kristo, penei, «ʻaʻole kona ʻUhane i waiho ʻia ma ka malu o ka poʻe make», ʻaʻole hoʻi i ʻike kona kino «i ka palahō».

³² “ʻO ua Iesū lā, ʻo ia kā ke Akua i hoʻāla mai ai, he poʻe ʻike maka mākou a pau ia mea.

³³ “Ua hoʻokiʻekiʻe ʻia aʻela ia e ka lima ʻākau o ke Akua, ua loaʻa nō hoʻi iā ia, na ka Makua mai, ka ʻōlelo hoʻolana o kona hāʻawi ʻana mai i ka ʻUhane Hemolele, no ia mea, ua hāʻawi nui ʻo ia i kēia mea a ʻoukou e ʻike nei, a e lohe nei.

³⁴ “ʻAʻole i piʻi ʻo Dāvida i ka lani; akā, nāna nō i ʻī mai: ‘«ʻŌlelo maila ka Haku i koʻu Haku hoʻi, “E noho ʻoe ma koʻu lima ʻākau,

³⁵ A hoʻolilo ai au i kou poʻe ʻenemi i keʻehana wāwae nou».”’

³⁶ “No ia mea, e ʻike pono ka ʻohana a pau a ʻIseraʻela, ua hoʻolilo ke Akua iā Iesū nei, i ka Mea a ʻoukou i kau ai ma ke keʻa, i Haku a i Mesia hoʻi.”

³⁷ ¶ A lohe lākou i kēia, walania ihola ko lākou naʻau, ʻī akula iā Petero, a i nā lunaʻōlelo, “E nā kānaka, nā hoahānau, he aha kā mākou e hana ai?”

³⁸ A laila ʻī maila ʻo Petero iā lākou, “E mihi, a e bapetizo ʻia ʻoukou a pau i loko o ka inoa ʻo Iesū Kristo, i kala ʻia mai nā hala, a e loaʻa iā ʻoukou ka haʻawina o ka ʻUhane Hemolele.

³⁹ “No ka mea, no ʻoukou ka ʻōlelo hoʻolana, a no kā ʻoukou poʻe keiki, a no ka poʻe i kahi mamao aku, a no nā mea a pau a ka Haku, a ko kākou Akua e hea mai ai.”

⁴⁰ A ma nā ʻōlelo ʻē aʻe he nui loa, hōʻike akula ʻo ia, a nonoi aku hoʻi, ʻī akula, “E hoʻōla ʻoukou iā ʻoukou iho mai waena mai o kēia hanauna kolohe!”

⁴¹ A laila, ʻo ka poʻe ʻae maoli aku ma muli o kāna ʻōlelo me ka ʻoliʻoli, bapetizo ʻia ihola lākou, a ia lā nō, hui pū ʻia mai ʻekolu tausani kānaka.

⁴² A hoʻomau lākou ma ka ʻōlelo a ka poʻe lunaʻōlelo, a me ka launa pū, a me ka wāwahi berena ʻana, a me ka pule.

⁴³ ¶ Loʻohia ihola nā kānaka a pau e ka makaʻu; ua hana ʻia hoʻi nā mea kupanaha e ka poʻe lunaʻōlelo, a me nā hōʻailona he nui loa.

⁴⁴ A ʻo ka poʻe a pau i manaʻoʻiʻo, noho pū lākou, a hui pū ʻia kā lākou mau mea a pau.

⁴⁵ A kūʻai akula i ko lākou waiwai a me ka ukana, a puʻunaue akula no kēlā mea kēia mea, e like me kona hemahema.

⁴⁶ Hoʻomau lākou ma loko o ka luakini, i kēlā lā i kēia lā, me ka manaʻo hoʻokahi, a me ka wāwahi berena ʻana i kēlā hale i kēia hale, a ʻai ihola lākou i ka ʻai me ka ʻoliʻoli, a me ke akahai o ka naʻau,

⁴⁷ Me ka hoʻomaikaʻi aku i ke Akua, a me ke aloha ʻia e nā kānaka a pau. A hoʻokomo hou maila ka Haku i ka ʻekalesia, i kēlā lā i kēia lā, i poʻe e hoʻōla ʻia ana.