ʻO KA ʻEPISETOLE LUA A PAULO KA LUNAʻŌLELO IĀ TIMOTEO 3 - Ka Baibala Hemolele

1 No ka hewa ʻana o kānaka; no ka pono o ka Palapala Hemolele.

MOKUNA III.

¹ ¶ Eia hoʻi kāu mea e ʻike ai; a i nā lā ma hope e hiki mai ana nā manawa pōpilikia.

² No ka mea, e lilo ana nā kānaka i poʻe makemake iā lākou iho, puni kālā, hōʻoiʻoi, hoʻokano, hōʻino wale, hoʻolohe ʻole i nā mākua, aloha ʻole, huikala ʻole,

³ ʻaʻole aloha maoli, pale berita, niʻaniʻa wale, kuko ʻumi ʻole, huhū, hoʻowahāwahā i nā mea pono,

⁴ kumakaia, paʻakikī, naʻau kiʻekiʻe, makemake i ka leʻaleʻa, ʻaʻole makemake i ke Akua.

⁵ Hoʻokokohu manaʻo i ke Akua; akā, e hōʻole ana i ka mana o ia mea; e hoʻokaʻawale aʻe ʻoe mai ia poʻe aʻe.

⁶ ʻO kekahi o ua poʻe lā, nā mea i komo i loko o nā hale, e alakaʻi pio ana i nā wāhine lapuwale i kaumaha i ka hewa, a i alakaʻi ʻē ʻia aʻe hoʻi e kēlā kuko a e kēia kuko,

⁷ e aʻo mau ana hoʻi; akā, ʻaʻole loa e hiki iā lākou ke ʻike i ka ʻoiaʻiʻo.

⁸ A, me kā Iane, a me kā Iamebere i kūʻē mai ai iā Mose, pēlā hoʻi ua poʻe lā i kūʻē mai i ka ʻōlelo ʻoiaʻiʻo; nā kānaka naʻau ʻino, a ma ka manaʻoʻiʻo ua hoʻohewa ʻia lākou.

⁹ Akā, ʻaʻole lākou e hiki i ke kauwahi hou aku; no ka mea, e akāka ana nō i nā kānaka a pau ko lākou lapuwale e like me ke akāka ʻana o ko lāua lā.

¹⁰ Akā, ua ʻike paka ʻoe i kaʻu aʻo ʻana, noho ʻana, manaʻo ʻana, paulele ʻana, hoʻomanawanui ʻana, aloha ʻana, ahonui ʻana,

¹¹ A me ka hoʻomaʻau ʻia a me ka ʻehaʻeha, me ia i loaʻa iaʻu ma ʻAnetioka, ma ʻIkonio, ma Lusetera, nā hoʻomaʻau ʻana aʻu i hoʻomanawanui ai; akā, ua hoʻōla mai ka Haku iaʻu mai loko mai o ua mau mea lā a pau!

¹² ʻOiaʻiʻo hoʻi, ʻo ka poʻe a pau e noho haipule ana i loko o Kristo Iesū, e hoʻomaʻau ʻia ana hoʻi lākou.

¹³ Akā, ʻo kānaka hewa, a me ka poʻe hoʻopunipuni, e māhuahua ana ko lākou hewa, e hoʻopunipuni aku ana me ka hoʻopunipuni ʻia mai.

¹⁴ Akā hoʻi, e noho paʻa ʻoe ma nā mea āu i aʻo iho ai, a i manaʻoʻiʻo ai hoʻi, me ka ʻike aku i ka Mea nāna ʻoe i aʻo mai.

¹⁵ A, mai kou wā kamaliʻi ʻuʻuku mai, ua ʻike ʻoe i ka Palapala Hemolele, i ka mea e hiki iā ia ke hoʻonaʻauao iā ʻoe e ola ai, ma ka manaʻoʻiʻo i loko o Kristo Iesū.

¹⁶ ʻO ka Palapala Hemolele a pau, ua hāʻawi ʻia mai ia e ka ʻUhane o ke Akua, he mea ia e pono ai, no ke aʻo ʻana, no ka pāpā ʻana, no ka hoʻopololei ʻana, no ka hoʻonaʻauao ʻana ma ka pono;

¹⁷ i hemolele ai ke kanaka o ke Akua, i mākaukau leʻa ai hoʻi i nā hana maikaʻi a pau.